الملاك السجين

"الملاك السجين" الجزء الخامس عشر

اسر متنح و باباه متفاجئ و قطع صدمتهم دي صوت مديحة و هي بتقول ..

مديحة : أيوة و بعدين يعني هتفضلوا تصوروني ب عينيكوا كده كتير ولا ايه ؟!

نبيل : انتي بتتكلمي بجد يا مديحة ؟!

مديحة : لا بهزر معاه .. اصل ده شكل واحدة بتهزر

نبيل : لا انا مش حاسس انك بتهزري انا حاسس انك مقولتيش الجملة نفسها اصلا و انا اللي سمعت غلط او بيتهيألي .. انتي كنتي رافضة تشوفي صورتها حتى .. انا توقعت انك هتقوليله سيبلي وقت افكر و ارد عليك او مثلا تقوليله احكيلي عنها و عن أهلها اكتر و ساكنين فين و بيشتغلوا ايه عشان أسأل عليهم .. لكن انك تطلبي مقابلتها كده فورا ف انا مش قادر اقتنع أن مديحة مراتي هي إللي بتطلب الطلب ده

مديحة : اممم .. و انت حضرتك هتفضل متنح كده كتير مش ناوي تقولي كلمتين زي اللي باباك قالهم

اسر ب ينتبه : احم .. انا مش عارف .. حضرتك فعلا عايزة تقابلي فرح ؟

مديحة : أيوة .. و لو السؤال ده لو اتسأل تاني انا هسحب كلمتي و كأني مقولتش حاجة من الاساس

اسر : لا لا لا .. تسحبي ايه ده انا ما صدقت .. بس معلش انا عندي استفسار بسيط لو تسمحيلي ؟

مديحة : استفسار ايه ؟!

اسر : حضرتك عايزة تقابليها ليه ؟

مديحة ب نفاذ صبر : يعني انت بقالك ساعة قاعد تسمعني في محاضرات و واخدلي اجازة مخصوص من شغلك عشان تقنعني بيها و لما اقولك عايزة اقا**ها تقولي انت ليه !! ده ايه شغل الجنان ده ؟!

اسر : مش قصدي يا ماما .. انا قصدي هدفك ايه من مقابلتك ليها ؟ يعني عايزة تشوفيها عشان تتعرفي عليها و تدي ل نفسك فرصة انك تقربي منها و تشوفي إذا كانت حد مناسب فعلا ولا لأ ؟ ولا حضرتك عايزة تقابليها عشان تبيني ليها انك مغصوبة على مقابلتها و عليها هي شخصيا و انك قاعدة معاها عشان بس تطفشيها و تنهي معاها الموضوع ؟!

مديحة : لا ده ولا ده انا عايزة أشوفها عشان عندي فضول اعرف البنت اللي مخلية ابني الوحيد عنده استعداد يخسرني و يعمل حاجة انا رافضاها عشان خاطرها بس دي شكلها عامل ازاي

اسر : مش عشان خاطرها بس .. عشان خاطري انا كمان .. عشان انا كمان بحبها و عايزها زي ما هي بتحبني و عايزاني و يمكن اكتر كمان .. يا ماما اوعي تكوني فاكرة أن تمسكي بيها ده لمجرد اني ارتبطت بيها و علقتها بيا و عودتها على وجودي بس .. الموضوع مش شفقة ولا صعبنيات .. انا فعلا بحبها جدا و شايف أن مفيش حد ممكن يحبني و يقدرني و يخاف عليا و يحافظ عليا قدها هي .. ده بعد حضرتك طبعا .. ارجوكي يا امي .. لما تقعدي معاها حسسيها انك حابة تعرفيها و تقربي منها و تحاولي تشوفي الحلو اللي فيها اللي انا و بابا شوفناه من اول يوم عرفناها فيه .. و حطي في بالك طول الوقت أن الفلوس مش كل حاجة .. و أن الفلوس مش هتبسطك ولا هتعملك اللي انتي بتفكري فيه طول ما ابنك حبيبك مخنوق و مش مرتاح و تعبان .. هتحسي ساعتها انك **بتي فلوس و ثروة بس هتبقي خسرتي اهم حاجة في حياتك .. ابنك .. اللي بيتمنى يجيبلك السما و الجنة كلها بين ايد*كي عشان بس ترضي .. اعملي الحاجة و انتي في نيتك انك تفرحيني مش تزعليني .. لاني حتى لو خطبت فرح و اتجوزتها و انتي من جواكي مش راضية عن ده و زعلانة انا عمر فرحتي ما هتكون كاملة و طول الوقت هكون حاسس ان فيه جزء كبير جوايا م**ور و فاضي .. عشان خاطري يا امي

نبيل : اسمعي كلام ابنك يا مديحة .. جربي تريحيه و تريحي بنت الناس اللي قلبها و حياتها كلها متعلقة ب ابنك و ب كلمة واحدة منك و ريحي نفسك انتي كمان .. لأن موضوع كاميليا ده موضوع فاشل و عمره ما هيحصل .. و انا مراتي حبيبتي و عشرة عمري واثق انها مش أنانية و لا تحب تبني فرحتها و سعادتها على حساب اللي حواليها و كمان اقرب الناس ليها .. صح ؟

مديحة حست انها بدأت تقتنع بكلامهم بس مش عايزة تبين ده : كله هيبان بقى لما أشوفها .. يمكن تطلع ع** ما انتوا شايفين كده و محدش منكم فاهمها و انا بس اللي افهمها صح فيكم

اسر : يا ست الكل ماشي .. بس اهم حاجة تعامليها ب طريقة لطيفة و متجرحيهاش ب كلمة حتى لو مقتنعتيش بيها .. عامليها حلو و تعالي بلغيني ب قرارك و انا هبقى اشوف هتصرف ازاي .. لكن برضه ده مش معناه انك لو جيتي قولتيلي انا مقتنعتش بيها و هي معجبتنيش انا هسيبها و هقولك خلاص اللي حضرتك تشوفيه .. لأ انا برضه هنفذ اللي قولته من شوية و هاخد خطوة رسمي فعلا سواء فيه قبول أو رفض .. اتفقنا

مديحة : بلغها ان ميعادي معاها بكرة الساعة 4 في النادي

اسر : اشمعنى بكرة ؟!

مديحة : انت مش هتقابل مامتها هي كمان بكرة .. ف انا كمان عايزة أشوفها بكرة .. و اهو كمان عشان ابقى ضامنة انك مش هتيجي و تبقى معانا عشان انا عايزة اقعد معاها لوحدنا و على انفراد .. تمام

اسر ب قلق : تمام .. و ربنا يستر بقى

في بيت شهد .. كانت شهد عاملة انقلاب في البيت كله بسبب وصول حسن و انها اخيرا هتشوفه النهارده و كمان هيقدملها الهدية الغالية اللي كانت قاعدة بتحلم بيها و بتتخيلها طول فترة سفره .. حسن وصل و قاعد في الصالون تحت و شهد حابسة ملك اختها معاها في الاوضة عشان تاخد رأيها و تظبطها قبل ما تنزل ل حسن ..

شهد : هموت و اشوف الهدية اللي جايبهالي .. و الهدايا اللي جابها لكم برضه

ملك : يا بنتي بقى ارحميني .. انتي ليه بتتعاملي و كأننا ورثنا الراجل ب الحيا اتلمي بقى متبقيش مادية كده طول الوقت

شهد : طب اتلهي اتلهي .. انتي ب فقرك ده هتتجوزي واحد مش لاقي ياكل و ساعتها هنبقى نشوف بقى القنوعة هانم هتكون عاملة ازاي و بتتصرف ازاي .. انا بجد مش عارفة انتي ازاي طالعة كده .. مش شبه حد فينا خالص .. اكيد مامي و بابي لاقوكي على باب جامع زي ما بنشوف في الافلام .. بس لأ للاسف انا و انتي شبه بعض جدا و احنا الاتنين شبه بابي .. يا ترى انتي جايبة البؤس ده منين يا لوكا

ملك : بطلي رخامة و تقل دم .. انا مش طالعة ل حد ولا انا شبه حد .. انا شبه نفسي و بس .. و بعدين انا حاسة انك ملهوفة على الهدية اكتر من خطيبك .. هو مين اللي كان مسافر و مشوفتيهوش بقالك سنتين أو اكتر .. حسن ولا الهدية !!

شهد : خليكي في حالك و قوليلي كده حلو ولا لأ .. انا حاسة أن فيه حاجة غلط

ملك : لا كده رقيقة و شكلك مناسب .. ياريت بقى تفتحي الباب ده عشان أخرج لأني اتخنقت من الحبسة دي و كمان عشان انزل اسلم عليه .. و ياريت انتي كمان سيادتك تتكرمي و تتفضلي و تتعاطفي على الراجل الغلبان اللي تحت ده و اللي مستنيكي بقاله ساعتين و تنزلي له

شهد : انا فعلا لازم افتح الباب ده و اخرجك عشان انتي كلام مستفز و بيضايقني

ملك : عشان بقول الحق .. شهد حبيبتي .. لو انتي فعلا بتحبي حسن لازم تغيري من طريقتك و اسلوب حياتك اللي انتي عايشة و بتتعاملي بيه ده شوية .. لا مش شوية .. تغيري منه كتير و اوي كمان .. حسن بيحبك و بيتغاضى عن كل عيوبك عشان هو فعلا بيحبك و برضه عشان هو مش عايش هنا و مش موجود جنبك طول الوقت ف يعتبر مش شايف عيوبك دي ب شكل مستمر و عشان كده هو مش مركز و بيتغاضى عنها .. لكن لو هو فعلا ناوي يستقر و يقعد في مصر على طول و طبعا هتتجوزا إن شاء الله ف عيوبك دي هتكون بالنسباله عاهة مستديمة .. عرض مستمر .. حاجة هيكون شايفها طول الوقت و ده هيقفلوا منك .. لو بتحبيه لازم تحافظي عليه .. حسن مش مادي و مبيحبش كده و ده اللي اي حد هيشوفه في حسن من اول مرة يتعامل معاه فيها يعني مش لازم يكون الشخص مركز اوي معاه أو عشرة عمر له عشان يفهم حسن .. لكن انتي اللي مش عايزة ولا حابة تشوفي اللي بيحبه و تعمليه و تشوفي اللي بيكرهه و تتجانبيه زي ما هو بيعمل معاكي .. حاولي متضيعيهوش من ايد*كي .. ده لو سمحتي .. انا خلصت كلامي و خلصت ضميري قدام ربنا ب النصيحة و الكلمتين دول .. عايزة تعملي بيهم يبقى خير و بركة .. مش عايزة و هتسوقي في العوجان بتاعك ده يبقى انتي حرة و انتي اللي خسرانة برضه ..