الملاك السجين

"الملاك السجين" الجزء السابع عشر

فلاش باك .. ملك واقفة في فرح بعيد كده لوحدها و بتتف*ج و شهد واقفة بتغني و ترقص مع صحابها .. اتخنقت من الجو و جالها صداع من دوشة الاغاني ف اخدت نفسها ب هدوء و خرجت برة القاعة .. كان فيه زي جنينة صغيرة و فيها زي ميني كافيه كده بيقدموا فيه المشروبات و حاجات سريعة .. راحت قعدت شوية و طلبت قهوة و هي قاعدة كده سرحت شوية و من غير ما تحس تليفونها وقع من ايديها و مخادتش بالها .. و شربت قهوتها و حاسبت و قامت عشان ترجع الفرح لا شهد تدور عليها متلاقيهاش رغم انها متأكدة أن شهد اصلا مش مركزة معاها بالمرة .. قامت و مشيت لكن طول ما هي ماشية حاسة زي ما يكون فيه حاجة ناقصة أو فيه حاجة هي ناسياها .. وقفت مكانها و بقت عمالة تكلم نفسها ب صوت مسموع شوية و تقول أنا ناسية ايه ؟ نسيت احاسب .. لأ انا حاسبت والله حتى المبلغ كان كذا .. طيب نسيت شنطتي ؟! برضه لأ ايه الغباء ده ما هي في ايدي اهي .. اومال انا ليه حاسة أن فيه حاجة ناقصة .. طب ارجع مكان ما كنت قاعدة تاني طيب و اشوف ايه الحاجة اللي انا ناسياها و اللي انا مش عارفة هي ايه اصلا .. طب هقول للناس هناك بدور على ايه يا جدعان .. يا خرابي عليا و على الكنافة ب المانجة اللي انا عايشة فيها .. قاطعها صوت جاي من وراها و هو بيقول لها .. طب انتي قولتي كل حاجة و افتكرتي كل حاجة و جيتي على اهم حاجة و مجيبتيش سيرتها .. ملك لفت ب خضة كده عشان تشوف اللي بيكلمها ده مين و بيكلمها هي ولا بيكلم حد تاني .. عشان اول ما تلف تلاقي قدامها شاب زي القمر سرق قلبها من أول نظرة لدرجة أنها تنحت له ل كام ثانية كده و بعدين ركزت و قالتله .. حضرتك بتكلمني ؟ قال لها و هو بيبص حوالين منه .. انا مش شايف حد غيري انا و انتي هنا بصراحة ف لو مش بكلمك انتي يبقى انا حاجة من الاتنين يا مجنون يا ملبوس .. ضحكت ملك ضحكة خفيفة كده و قالتله .. حضرتك كنت بتقول ايه بقى .. قال لها حضرتي كان بيقول انك فعلا عايشة في الكنافة ب المانجة .. حضرتك افتكرتي كل حاجة الا تليفونك .. ملك ب هي بتخبط ب ايديها على راسها .. أيوة صح .. يا ربييي عليا .. هو معاك .. قال لها .. أيوة يا ستي اهو .. قالتله انت عرفت منين أنه تليفوني .. قال لها انا شوفته لما وقع منك و انتي قاعدة و كنت هقولك بس جالي مكالمة و اتسحلت فيها ف نسيت و لما خلصت ببص على الترابيزة اللي كنتي قاعدة عليها ملاقيتكيش قاعدة بس بصيت على الأرض عشان أتأكد انك شوفتي تليفونك لاقيته واقع مكانه ف دورت ب عيني كده شوفتك و انتي ماشية و جيت وراكي لاقيتك وقفتي و بتكلمي نفسك كده .. قالت له انت حضرت الحديث كله بقى .. قال لها كلله لا حرف زاد ولا حرف نقص .. قالت له يادي النيلة على الإحراج .. طيب هاته بقى .. حسن طلع التليفون من جيبه و قال لها اتفضلي .. في نفس الوقت كانت شهد جاية من بعيد و هي بتنادي على ملك و في نفس اللحظة كان فيه شاب من بعيد برضه بينادي بيقول يا حسن عشان حسن يلف ل صاحبه و ملك تلف ل اختها .. حسن كان بيشاور ل صاحبه أنه جاي و ملك على ما حاولت تبعد شهد و تخليها تستناها مكانها كانت شهد وصلتلهم و هي باصة ل حسن ب تركيز و بتقولها ..

شهد : ايه انتي رحتي فين كل ده انا قلبت عليكي الفرح

ملك : صدعت شوية من الدوشة ف خرجت جيبت قهوة و شربتها و كنت راجعة تاني بس تليفوني وقع مني و استاذ حسن ... مش استاذ حسن برضه ؟

حسن ب ابتسامة : ايوة بالظبط كده

ملك بتكمل : استاذ حسن لاقاه و نده عليا عشان يرجعهولي

شهد ب تحاول تجر كلام مع حسن : ميرسي يا حسن .. هي ملك كده دايما دماغها مش فيها

حسن : لا عادي كلنا بنسقط كده احيانا

شهد بتحاول تخلع ملك : طيب ملك .. انچي كانت بتدور عليكي روحي شوفيها عايزة ايه

ملك : طيب ياللا

شهد : لا روحي انتي انا كمان صدعت شوية و عايزة

افصل

ملك مش مرتاحة ل اختها : طيب .. شكرا اوي يا استاذ حسن و اسفة اني لففتك ورايا كده

حسن : ولا يهمك .. اتشرفت ب معرفتك جدا

ملك ب ابتسامة : الشرف ليا .. عن اذنك

وقتها ملك مشت شوية و وقفت بعيد عنهم عشان تشوف اختها هتعمل ايه .. و فعلا فضلت واقفة تجر معاه كلام لغاية ما طلبت منه رقم تليفونه .. و طبعا لأن حسن يعتبر متربي و عايش حياته كلها بره مصر ف الموضوع ده مفارقش معاه في حاجة و شاف أنه عادي .. و بدأت شهد و حسن يتكلموا كتير لغاية ما حصل اعجاب و الاعجاب بقى حب و الحب وصل ل خطوبة و الخطوبة وصلت لترتيبات الجواز .. ملك اعجبت ب حسن من اول ما شافته يعني من قبل شهد و يمكن شهد لو مكانتش جات و اتدخلت بينهم يوميها كان الموضوع بقى له شكل تاني .. ملك عشان طيبة و على نياتها قررت انها تكتم مشاعرها دي جواها و تفضل بتتعامل مع حسن على أنه خطيب اختها و اللي هيكون جوزها مش اكتر .. لكن ده ميمنعش أن بييجي عليها وقت مشاعرها دي بتسيطر عليها جدا و بتبقى محتاجة تخرجها .. خصوصا أن هي و حسن فيهم كتير من بعض في الطباع و الأسلوب و طريقة التفكير و الطموح .. و شهد متشبهش حسن في اي حاجة .. لكن شهد ب جمالها و دلعها و اهتمامها بيه عرفت تسيطر على حسن .. لكن ده ميمنعش أن حسن مع الوقت و العشرة و المعاملة كان بيفضل أنه يقعد مع ملك و يتكلم معاها اكتر لأنه كان بيشوف أنها بتفهم دماغه اكتر من شهد و انها اعقل كتير منها و ده احيانا بيخلي شهد تغير من ملك جدا و عشان كده بتحاول طول الوقت تقلل منها في وجوده ..

ملك .. اخت شهد و اكبر منها ب سنة .. يعني عندها 27 سنة خريجة كلية سياسة و اقتصاد .. بنت هادية جدا و محبوبة من كل اللي حواليها ل جمال اخلاقها و أسلوبها و تواضوعها على ع** شهد تماما يعني و كمان على ع** باباها و مامتها .. مبتحبش الزحمة و الدوشة ولا بتحب المظاهر الكدابة اللي محاوطاها من كل ناحية .. و بتعيش قصة حب جميلة و قاسية و مؤلمة جدا من طرف واحد و من غير ما حد يعرف عنها حاجة و من غير وجود حد يحس بيها .. بس يا ترى هتفضل على الوضع ده على طول ولا فيه حاجة هتحصل و هتشقلب لها حياتها دي 180 درجة ؟!