LYKA
SIMULA kanina nang makilala ni Pablo ang kaniyang Lola Lucila ay sumama na siya rito at kay Stella sa ibaba para daw maglaro. Hanggang ngayon na mag-aalas siyete na ng gabi ay hindi pa rin siya bumabalik dito sa kuwarto.
Ayaw ko nga sanang pumayag noong una dahil sa pag-aalala ko na baka kung ano ang gawin sa kaniya ng dalawa. Pero ayaw namang magpapigil ng aking anak. Nangako rin naman si Verex na babantayan siya. Pinilit nga ako ni Pablo na sumama pero nagdahilan ako na may gagawin pang importante.
Bagaman at totoo naman talaga dahil nang masolo ko ang kuwarto ay nagsimula na naman akong maghanap ng heart donor niya sa online. Ngunit bigo pa rin ako.
Halos kaka-shut down ko lang ng laptop na ginamit ko nang may marinig akong katok sa pinto. Akala ko agad na baka si Pablo iyon.
