RAY
ALAS siyete pa lang ay nasa F&M DV building na ako. Sanay talaga ako pumasok nang maaga kahit sinasaway ako ni Mama. Kami raw ang may-ari ng company kaya okay lang kahit late na akong pumasok. Para saan pa raw ang pagiging boss ko kung mas maaga pa akong pumapasok kaysa sa mga empleyado ko.
Pero wala naman iyong problema kay Papa. In fact, mas natutuwa pa nga siya. Nagpapakita lang daw iyon na isa akong magaling na leader. At isa iyon sa magagandang katangian na kailangang taglayin ng isang CEO. Ang pagiging maagap. Kaya nga kung alas siyete ako pumapasok, madalas, six-thirty pa lang ay nasa office na niya si Papa.
Ang F&M DV na lang kasi ang isa sa nagpapasaya at kumukompleto sa bahay ko. Bukod sa family ko, friends, at kay Lizzy, dito ko na lang masasabi na may silbi ang buhay ko.
