Sobrang sakit ng ulo ko, parang binibiyak na ewan. Pumipintig-pintig pa sa tuwing iginagalaw ko. Ito na yata ang pinakagrabeng hangover ko sa tanang buhay ko. Paano ba naman kasi ay halos maglunod kami sa alak ng mga kaibigan ko kagabi dahil may pa-mini bar pala ang kompanya para sa after party. Pero hindi talaga dahil sa libre kaya ako uminom nang marami, kundi para lasingin ang sarili ko at makalimutan ko ang problemang kakaharapin ko sa oras na pumasok ako sa opisina.
Mahina akong napamura nang muli ko na namang maalala ang lahat. Napapadyak ako sa hangin bago bumangon. Agad kong hinagilap ang eyeglasses ko at tumingin sa salamin. Sabog-sabog ang buhok ko at may natuyong bakas pa ng laway sa gilid ng bibig ko. "Ano na, Gina? Kaya pa?" sambit ko sa sarili ko bago napailing.
Napaupo na
