Magkayakap
KAMILA
“Oo, Zar, papasok ako. Male-late lang ng onti–napuyat ako ni misis, pinaghanap ba naman ako ng mangga na walang buto kagabi–eh siyempre hindi ako nakahanap. Pinagbigyan ako, maghanap daw ako ngayon–talaga? May ganoon? Sindhu? O sige sige, samahan mo ako mamaya. Sige salamat, pare.”
Natatawa kong tiningnan si daddy na kumamot-kamot pa sa ulo niya matapos malalim na bumuntonghininga na tila nakahinga nang maluwag.
“Nahihirapan ka na sa mga pinaglilihian ni mommy, dad?” bungisngis ko.
Tumigil siya dahil red light at nakatikim ako ng kurot sa pisngi. “Oo at hindi nakakatulong na inaasar n’yo pa ako ng ate mo. Noong isang araw puto bumbong eh malayo pa ang pasko, ang layo nang narating ko makahanap lang no’n tapos biglang ayaw niya na? Parang ang selan masyado ng kapatid
