MABILIS na tumayo si Nikko at hinila si Marcus. Nagawa nitong masuntok sa mukha si Marcus pero agad din namang nasuntok ni Marcus sa mukha si Nikko. Duguan ang pisngi ni Nikko at susugod na naman sana ito pero muli itong naunahan ni Marcus. Lalapitan na naman sana ito ni Marcus pero mabilis niya itong pinigilan sa braso.
"Tama na, Marcus," mahinahon niyang sabi rito. Kahit siya ay gustong suntukin sa mukha si Nikko pero mas gugustuhin na lamang niyang umalis na ito.
Napatingin siya kay Marcus at galit na galit itong nakatingin kay Nikko at parang gusto pa nitong suntukin ito hanggang sa mawalan ito ng malay. Dahan-dahan na tumayo si Nikko at tumingin sa kanilang dalawa. Naiinis nitong pinunasan ang dugo sa gilid ng labi nito.
"Is he your boyfriend now?" galit na tanong nito sa kanya.
