“Maraming salamat talaga, Doc Caty. Ang laking tulong ng ginawa ninyo kagabi sa amin,” ani Minda na sinadyang dumiretso roon sa silong upang personal na magpasalamat kay Phillian. At nang makita nitong naroon din si Caty ay napatayo pa ito at hindi magkandaugaga sa pagpasalamat.
“Kung hindi sa gamot na nireseta ni Doc Caty ay baka hindi kami nakatulog na mag-asawa kagabi, at baka naubusan ng lakas si Maricel sa labis na pagsusuka. Hinang-hina na ang anak namin kagabi, eh, kaya nagpasiya na kaming dalhin na sa ospital,” sabi naman ni Boy na kay payapa na ng mukha ngayon kompara kagabi. Nakaupo na ang mga ito sa mahabang silya sa loob ng silong, at kalong-kalong ni Boy ang anak na maayos na ang pakiramdam ngayon. Hindi na namumutla tulad kagabi. "Kung hindi siya k
