وحش الداخلية ٣

1321 Words

الفصل الثالث -: رنا شكلها اتخ*فت -: ياريت ولله يبقى خلصنا منها.. -: ادهم فوق انا بتكلم بجد رنا شكلها فعلا اتخ*فت .. -: تلاقيها راحت تشتري اي حاجة ولا بتعمل شوبينج ، انت عارف البنات وتفاهتهم... حاتم : مانا فكرت كده بس لقيت تليفونها واقع عالأرض وكمان شنطها مفتوحة وزي ما يكون كانت بتتفتش وفي هدوم واقعة فالارض ، وشكل الاوضة مريب... أدهم قام قعد وقال -: أنا عارف ان البت دي جايه عشان تعطلنا مش بعيدة تكون راحت دلوقتي تسأل المراكبية عن العصابة... وتكشفنا... حاتم :أكيد هي مش بالغباء ده ؟ أدهم : طب عيني في عينك كده بذمتك طب هي ممكن تعملها ولا متعملهاش ؟ حاتم : تعملها طبعا هههههههههه أدهم : بتضحك ؟ حاتم : المهم اللوا طارق قارفني اتصالات عاوز يوصلها ومش عارف ، ولما رحت خبطت عليها وفتحت الأوضة بالمفتاح الاحتياتي ملقتهاش... أدهم : اقفل تليفونك وابقى قول انه فصل شحن لغاية لما نعرف البلوة دي راحت فين.... حاتم : ادهم انت لسه هتنام ادهم : اووف قمت اهوه خلاص استريح منك لله يا رنا انتى وابوكى اشوفكم متعلقين من رجليكم يارب ... ********************** عند رنا رنا استغلت ان دي اول مرة تزور فيها أسوان وقررت انها تنزل تعمل جولة أستكشافية وكمان أخدت معاها أسكتش الرسم عشان تعد ترسم أكتر أماكن عجبتها هناك وخصوصا ان الأضواء على النيل والليل مع طلوع الشمس كان يهوس.... بصت فالساعة لقيت ان الوقت جرى بيها وان الشمس طلعت وهي لسه منمتش حست بتعب فقررت انها ترجع الفندق عشان تنام..... لما رجعت الأوضة وفتحت الباب اترعبت لما لقيت في حد قاعد فالضلمة ، حطت ايدها عالنور بسرعة واتفاجأت لما لقيت أدهم هو الي قاعد... اخدت نفس براحة لما لقيته وقالت -: يالاهوي خضتني يا شيخ حرام عليك... انت دخلت هنا ازاي ؟ ادهم بغيظ : ايه فكرتيني عفريت!! رنا حطت شنطتها والحاجة الي في ايدها علي الترابيزة وقالت -: نعم عاوز ايه وبعدين انت ازاي تدخل أوضتي كده من غير ما أكون موجودة... ادهم قام وقف وحط ايده في جيبه وقالها. -: كنتي فين ؟ رنا ربعت ايدها ووقفت قدامه وقالت بتحدي -: وانت مالك ؟هو انت كنت ولي أمري وأنا معرفش... أدهم : ان شالله كنتي تتخ*في ولا يقطعوكي حتت حتى ميهمنيش ، كلمي أبوكي الي خلانا نصدع من كتر أتصالاته... ادهم كان رايح ناحية الباب . رنا : خد الباب في ايدك وانت طالع أنا عاوزة أنام.. أدهم تنح من أسلوبها المستفز ورفع صبعه في وشها وكلمها بتحذير -: اخر مرة تتكلمي معايا بالأسلوب ده ، واعتبري ان ده انذار و رنا قطعت كلامه وهي بتبصله بتحدي -: ولله انت عاوزني بقى اكلمك ازاي لما أرجع ألاقيك قاعد في أوضتي زي الحرامية .... ادهم بصلها بغيظ وكان هاين عليه يولع فيها وقال -: انا مش هسكت على الي حصل ، وزي ما أبوكي دخلك الشرطة بالواسطة انا هعرف أطلعك منها....... وسابها ومشى... رنا اتجهلت كلامه ودخلت غيرت هدومها وافتكرت كلام أدهم وحاتم لما دخلت بالصدفة البلكونة بعد ما وصلوا الفندق وسمعتهم لما قالوا عليها غ*ية وملهاش لازمة ولما بتدخل أي حاجة بتبوظها..... فقررت انها تتجاهلهم خالص وانها كمان تطلب من والدها ميشغلهاش معاهم... ********************** فات يومين وأدهم وحاتم زي ما هما بيتبادلوا على المراقبة.. أما رنا فعايشة حياتها بالطول وبالعرض كل يوم تخرج ومترجعش غير آخر النهار وأدهم وحاتم مش مهمتمين ولا حتي بيسألوا عليها لغاية لما في يوم اللوا طارق أتصل بيهم وفاجئهم ان العملية فشلت والسلاح وصل للسودان وانهم لازم يرجعوا .. اللوا طارق : انتم أزاي نايمين على ودانكم شحنة السلاح عدت من قدامكم ازاي ؟ أدهم كان هيتجنن ده مكنش بينام تقريبا هو وحاتم وكانوا طول الوقت قاعدين فالبلكونة بيراقبوا المراكب ، ازاي مشفوش المراكب الي نقلت السلاح ... أدهم : مش عارف أقولك ايه يا فندم بس في حاجة غلط ، احنا تقريبا مكناش بنام لأننا طول الوقت كنا اعدين نراقب كل حركة فالنيل مش عارف ازاي ده حصل اللوا طارق كان غضبان وقال -: اتفضلوا لموا حاجتكم وتركبوا اول طيارة ترجعكم وابقى اتعامل بقى مع القيادة وتبرر الي حصل ده بايه .. رنا طبعا والدها كلمها قبلهم وعرفته انهم مخلوهاش تشترك أصلا معاهم في حاجة وكانوا مش عاوزينها ، جمعت شنطها وراحت عالمطار وكلهم ركبوا الطيارة ورجعوا للقاهرة.... تاني يوم أدهم راح شغله واتفاجأ انه اتعرض للتحقيق بسبب مخلفته للأوامر ومخلاش رنا تشترك معاهم وانه كان مهمل في أداء المهمة ، وده الي خلاها فشلت ... ولما اتعرض على الرؤساء أكتفوا بلفت نظره الا في حالة تكرار هيتعرض للمسائلة القانونية.... ادهم رجع على مكتبه وكان متغاظ وكان بانتظاره حاتم... أدهم بغيظ : بقى انا يتعمل معايا كده يقولولي نكتفي بلفت نظرك ،أنا وحش الداخلية ان الكل كان بيعملي اعتبار الكبير قبل الصغير ، يفشل في مهمة وألاقي الواد الثقيل الي أسمه صبري يقولي خيرها في غيرها ده أنا كان هاين عليه أطلع السلاح وافرغه فيهم كلهم ..... حاتم :أهدى بس يا أدهم ولازم نفتكر ازاي شحنة السلاح تعدي من قدامنا واحنا مشفنهاش.... أدهم بص لحاتم وكان قاصد انه يتهمه وقال -: أسأل نفسك ازاي ده حصل ، أنا متأكد ان مفيش دبانه عدت من قدام عنيه فالوقت الي انا كنت براقبهم فيه... شوف انت بقى كنت سرحان في ايه ولا بتعمل ايه لما عدوا و نقلوا السلاح وانت مشفتهمش... حاتم بتحذير : أدهم!!! خد بالك من كلامك انا مقصرتش في حاجة وبعدين دي مش أول مهمة نطلعها مع بعض !! ادهم : أنا هتجنن مش عارف ده حصل ازاي وبعدين تعالى هنا أشمعنى انا اتعرض للتحقيق وأخد لفت نظر وانت لأ... حاتم بغضب : أدهم انا مش هسمحلك بالي انت بتحاول توصله ده ، انا عمري ما كنت موضع شك وبعدين هما عرضوك لوحدك للتحقيق عشان انت القائد مش أنا وبعدين انت الي رفضت ان رنا تشترك معانا فالمراقبة وهي سمعتك بنفسها وراحت بلغت القيادة ... ادهم بغيظ : ياريتها كانت اشتغلت معانا عالأقل كنا هنلاقي حد نتهمه ونقول انه السبب في ان العملية فشلت... قاطع كلامهم صوت خبط عالباب ، وبعدين الباب اتفتح ورنا دخلت وكان معاها ملف وظرف لونه أبيض رنا كانت فرحانة فيهم بس حبت تثبتلهم انها ممكن تكون أذكى منهم لما اشتغلت لوحدها رنا : ها خلصتو خناق ؟ أدهم اتكلم من بين أسنانه وقال -: عاوزة ايه ؟ طبعا جاية تفرحي فينا... رنا حطت قدامه الملف والظرف الي معاها وقالت -:حاشالله انا بردو أفرح.... تؤتؤ ده أنا هموت من السعادة..... المهم مش وقته دلوقتي أفتح الملف وشوف الصور وانت تعرف كل حاجة... أدهم فتح الملف وكمان الظرف الي فيه الصور وكان مش فاهم أي حاجة ، راح قالها -: ايه ده مش فاهم.. مشيت خطوتين وراحت قعدت قدامه عالمكتب وقالت -: الي فالملف ده خط سير شحنة السلاح ... ادهم :ايه الارقام دي أنا مش فاهم حاجة. ... وبعدين انتي عرفتي ازاي ؟ رنا : ببساطة الشحنة دي عشان تتنقل من مراكب للعربيات مش هتاخد أقل من أربع أو خمس ساعات وازاي وانتوا كنتو منتبهين ال 24 ساعة ومراقبنهم... ادهم : اخلصي عدت أزاي.. رنا : عدت قبل ما نروح... السلاح أتنقل أصلا قبل ما نوصل أسوان... حاتم أخد الملف من أدهم وفضل يقلب يبص فيه وبعدين قال : طب وانتي عرفتي المعلومات الي فالملف ده منين ؟ رنا : الفترة الي قعدت فيها بأسوان اتعرفت على راجل مراكبي كان بياخدني كل يوم يفسحني فالنيل فضلت أخد منه معلومات عن المراكب وخطوط سيرها وغيرو لغايه لما عرفت بالصدفة ان قبل ما نوصل بيوم وقفوا سير المراكب فالنيل بحجة تطهير مية النيل وتنضفها ودي حاجة متدخلش عقل وان كل المراكبية اعترضوا على ده ومكنوش مقتنعين لأن شغلهم بيكون باليومية ومش حمل وقف الحال.... لغاية لما عرفوا ان المعلم الكبير بتاعهم والي بيمتلك أكبر أسطول مراكب هناك ، هو الوحيد الي نزل المراكب بتاعته وشغلها فمحدش قدر يتعدى عليه... أدهم : بردو مش دليل ، ممكن يكون تخمينك مظبوط وممكن لأ.. رنا : صح.. انت صح بس مش قبل ما تفتح الصور وتبص فيها... ادهم طلع الصور من الظرف وأتصدم من الي شافه لما لقى صور لشحنة السلاح بالتفصيل وهي بتتنقل من المراكب للعربيات بس المفاجأة بقى الي لجمته وخلت حاتم وشه يصفر ان حاتم كان موجود فالصور دي وكان من ضمن العصابة...... أدهم قام وقف وقرب من الكرسي الي حاتم كان قاعد عليه ومسكه من ياقة قميصه وقال -: كنت حاسس انك وراك ملعوب وفي حاجة مخبيها ، بس متخيلتش انك تكون بالقذارة دي... يتبع بقلمي روني محمد

Free reading for new users

Scan code to download app

App Store Google Play

Facebookexpand_more