مجموعة قصص قصيرة

وحش الداخلية ١

وحش الداخلية في مهمة كوميدية

روني محمد

( اللهم صل وسلم وبارك علي سيدنا محمد وعلى اله وصحبه وسلم)

بتبدأ حكايتنا مع الظابط أدهم ومعاه الظابطة رنا الاتنين أتكلفوا بمهمة أنهم يهجموا على مبنى بتاع واحد من كبار تجار الم**رات ، المبنى ده كان فيه المصنع الي بيصنعوا فيه الم**رات وبردو كان يعتبر المخزن الي بيخزنوا فيه السم الي بيبعوه للناس...

أدهم ورنا قدروا انهم ينزلوا المبنى ده عن طريق هليكوبتر وكمان قدروا انهم يزرعوا قنابل وديناميت في كل مكان بالمبنى ده ، بعد طبعا ما عطلوا كاميرات المراقبة عشان محدش من الع***ة يشوفهم والمهمة تبوظ ، بس للأسف الهليكوبتر مش هتنفع ترجع تاخدهم تاني فالمفروض انهم هينطوا من الدور الأول في حمام السباحة وبعديها هيكون باقي القوات منتظراهم ويبعدوهم عن المبنى قبل ما ينفجر...

أدهم : نطي..... نطي بسرعة

رنا : أنط ايه بس مش واخدة بالي !!!

-: نطي من الشباك خلصي المبنى هينفجر..

-: طب ما ينفجر ولا يولع حتى ، انت عارف انا لو نطيت المسافة دي ممكن رجلي تت**ر ولا رقبتي تتقطم هستفاد انا ايه دلوقتي..

أدهم لنفسه : أستغفر الله العظيم ده ايه المصيبة الي ربنا بلاني بيها دي...

أدهم بصوت عالي : لو منطتيش دلوقتي انا هشيلك واحدفك بأيدي..

رنا : لا بقولك ايه انا مبخفش انت عشان عندك عضلات بقى ومسمينك الوحش ، هتخوفني ، لا بقولك ايه انت وحش على نفسك مش عليه...

أدهم بيضغط على اسنانه بغيظ : هو أنتي دخلتي كلية الشرطة ازاي ؟

رنا : بص بصراحة مخبيش عليك انا كان نفسي ادخل فنون جميلة وبعدين بابا الى هو اللوا طارق الدمنهوري اكيد عارفه طبعا هو الي دخلني شرطة غصب عني...

أدهم : يا مصبر الوحش عالجحش طلعتلي من أهني بلوة دي يا بنتي انتي هتحكيلي قصة حياتك ، نطي عشان مينفعش انط وأسيبك..

رنا : لأ عندك..... كلو الا الغلط مسمحلكش تقول عليه جحش..

أدهم لنفسه : أعمل ايه بس يا ربي انا لو قتلتها وخلصت من غباءها ابوها مش بعيد يقتلني فيها ، ولو مشيت وسبتها هتموت والعملية كده فشلت.. اعمل ايه بس

حاول ادهم انه يتكلم معاها بهدوء

أدهم : بصي المسافة مش عالية أوي نطي بقى

رنا : أنسى انا متجننتش عشان انط المسافة دي كلها ..

أدهم : بصي كده في تحت بسين فيه ميه..... الله حلو شوفي ده فيه كمان عوامة بطة ...نطي بقى مش هتموتي ولا هيجرالك حاجة..

رنا : هو أنا مقولتلكش...

أدهم بغيظ : ياااارب صبرني قولي..

رنا : أصل انا وانا في تلاتة ابتدائي غرقت فالبانيو وانقذوني ومن ساعتها وانا بخاف من الميه فوبيا يعني ... ده أنا بستحما بعوامة!!

أدهم : يا سيتي انتي جاية تحكيلي مشاكلك هنا نطي فاضل 10 ثواني والمبنى ينفجر..

رنا : يا باشمهندس انت منفعل ليه كده قدر موقفي انت مفروض اكتر حد يحس بيه ..

ادهم : باشمهندس مين هو انا جي أصلحلك الشباك ولا اركبلك جلدة الحنفية !!

رنا : طب يا كابتن يا حضرة القعيد ولا النقيد أنت معندكش اخوات بنات ؟

أدهم: قعيد واخوات بنات ..... أنا ليه حاسس ان دراعي اليمين منمل كده وايه النهجان والعرق ده كله

رنا : دي اعراض الزبحة الص*رية أصل تيتا الله يرحمها كانت عندها كده قبل ما تموت.... الله يرحمك يا تيتا... أهئ أهئ أهئ

أدهم : انتي جاية تعيطي هنا ، متزعليش اهو احنا رايحنلها دلوقتي .... أشوف فيكي يوم يا بعيدة...

أنا أدهم بيسموني وحش الداخلية مفيش عملية بدخلها الا وبنفذها على أكمل وجه ، ديما بتخطى اي صعب قصادي ، ياما قدرت أقبض على أكبر تجار سلاح وم**رات واثار ومافيا وغيرو ، المافيا الايطاليين عرضوا عليه اني اشتغل معاهم بس أنا رفضت ، انا اتولدت عشان أكون ظابط شرطة مش حاجة تانية......

الستات بالنسبالي كائن رزل ملوش غير فالنكد وقعدة البيت ، اتفاجأت لما لقيت اللوا طارق الدمنهوري جايب لنا دفعة بنات عشان يدربوا ويكونوا تحت قيادتي واعلمهم أصول شغلنا ، بس فالاول وفالاخر بردو كائنات رزلة ، لما كنت بطلع مهمات كنت بطلع لوحدي او معايا حد من زميلنا الرجالة بس اتفاجأت النهاردة ان اللوا طارق كلف ضابط بنت تطلع معايا وقالي مترجعش من غيرها... واهو شكلنا مش راجعيين خالص .....

1----2----3 بوووووووووم

المبنى انفجر.....

في المستشفى

في أوضة رنا

رنا نايمة عالسرير ومامتها قاعدة جنبها ووخداها في حضنها ، واللوا طارق الدمنهوري والد رنا قاعد قصادهم مضايق.. وبيشرب سجاير....

رنا بدموع : شوفتي... شوفتي يا ماما كان هيموتني.. ده شالني هيلا بيلا ولا كأني شوال بطاطا وحدفني من الشباك ،، أهئ أهئ أهئ

الام : لا وانتي فكرانا هنسكت عالاهمال ده ازاي يعمل فيكي كده مش مفروض يكون في باراشوت ولا مراتب سفنج تنطوا عليها..

خرجت رنا من حضن امها وقالت

-: باراشوت ايه يا ماما احنا نطينا من الدور الأول... وبعدين المراتب دي بتكون في التدريبات بس..

الام : بردو يا حبيبتي ده خطر عليكي..

رجعت رنا تاني لحضن امها و قالت

-: ده أنا عيطله وقولتله على الفوبيا الي عندي من الميه... تصوري يا ماما مهتمش ولا عملي اعتبار.. أهئ أهئ أهئ...

الام : الأهتمام مبيطلبش يا حبيبتي وطالما هو مش مهتم يبقى خلاص نفضها سيره ونشوفلك ظابط تاني تشتغلي معاه...

وهنا اللوا طارق مقدرش يمسك نفسه أكتر من كده ، من كتر ما كان غضبان رمى السيجارة الي كانت في ايده وقام وقف قصادهم وقال

-: بطلي بقى دلعك ده... وبعدين اهتمام ايه الي عوزاه يهتم بيها هو جوزها!!! ده ظابط ، ومش اي ظابط ده من أكفئ ظباط الداخلية .... عمره ما دخل مهمة وخسر ولا مكملهاش ولا حتى اتصاب بخدش واحد ... بس هنقول ايه بتك ماشاء الله جابت أجله..

لوت الام شافيفها وقالت

-: هيكون جراله ايه يعني ؟

-: **ر ضلعين و شرخ في الأيد اليمين..

رنا : مانا بردو عندي اصابات مش هينه

الأم : ايوه يا حبيبتي قوليله على اصاباتك ده بدال ما يحمد ربنا انها جت على قد كده..

نفخ بضيق وقرب منهم خطوتين وقال.

-: منا شايفك زي القردة اهو والدكتور قال مفكيش حاجة...

رنا بدموع : ما أنت مش حاسس بيه ، أنا فضلت أربي فيه 3 شهور بحالهم وفالاخر الوحش الهمجي ده **رهولي وأحنا بنط..

اللوا طارق : هو ايه الي بتربي فيه و**رهولك انا مش فاهم حاجه

رنا : ضفري يا بابا هيكون ايه يعني!!!

اللوا طارق : لا اله الا الله يا مصبر الوحش عالجحش

رنا قعدت على السرير بسرعة وحطت ايدها في جنبها وقالت بغيظ

-: ماهو شتمني وقالي كده بردو...

بقلمي روني محمد

في غرفة ادهم

حاتم (زميل أدهم) : بس غريبة يعني دي اول عملية تتصاب فيها... داحنا كنا بنقول انك متأمن ضد الأصابات...

ادهم : منها لله .... البركة فيها.. انا مغلطش لما قولت انهم كائنات رزلة...

أستغرب حاتم من كلامه وقال

- : انت تقصد ايه.؟ اوعي يكون قصدك الملازم رنا بنت اللوا طارق..

رد عليه أدهم بغيظ وقال

-: وهو فيه غيرها... تصور يا حاتم بقولها نطي تقولي لأ بخاف من الميه ومش عارفة فوبيا واعدت تحكيلي قصة حياتها من تلاته ابتدائي .....

حاتم اول ما سمع كلامه مقدرش يمسك نفسه من الضحك ، وأدهم كان هينفجر من الغيظ

رد عليه أدهم بغيظ وقال

-: أنت بتضحك... انا مش عارف ازاي دي دخلت كلية الشرطة دي بتستحما بعوامة...

وهنا وقع حاتم على الأرض من كتر الضحك...

أدهم : أضحك أضحك اخف أنا بس وأعرفك الضحك عامل ازاي

حاتم بدموع من كتر الضحك : أعزرني يا ادهم يا أخويا انا بجد أول مره أسمع حد خريج شرطة يعمل كده..

أدهم : هو انا مقولتلكش دي كان نفسها تدخل فنون جميلة وابوها مرضاش...

حاتم : كمان فنون جميلة انتو كنتو بتتفسحوا ولا كنتم في مهمة ؟

أدهم: احنا خلصنا المهمة بدري وقولنا نعد نتساير شوية عقبال مالقنابل تسخن...

حاتم : هههههههه لا بجد خلاص مش قادر كفاية.. كفاية لغاية هنا...

رنا لسه عاملة مفاجات كتير لادهم وحاتم كل ده هنعرفه فالحلقات الى جاية ..