مجموعة قصص قصيرة

غلطة عمرى ٣

الفصل الثالث

اللهم لك الحمد كما ينبغى لجلال وجهك وعظيم سلطانك

رونى محمد

مراد كان داخل مكتبه ومكنش مركز لانه كان بيكلم حمزة فالتليفون ولكن اتفاجأ انه خبط في واحدة وتليفونه وقع الواحدة دي بقى كانت مي

مى : ما تحاسب يا اخ انت !!

مراد رد عليها بغيظ وقال : اخ !!

-: انت لسه هتبلم يلا لم الورق الي وقعته !!

كان هيمشى ويسبها بس رجعت قالتله

-: استنى هنا هو انا مش بكلمك لم الورق الى بعترته ده وياريت بقى ترتبه زي ما كان والا متزعلش من الى هيحصلك ...

-: هههههههه مزعلش من الى هيحصلى لا بجد شوقتى انتى يابت متعرفيش انا مين ؟

-: اه انت شكلك مش غريب عليه بس تلاقيك موظف ولا سواق من الي فالشركة عموما مش فارقة المهم تلم الورق ..

-: لأ مش هلمه وعاوز اعرف بقى هتعمليلى ايه ؟

ردت بكل ثقة وقالت : هدعى عليك وما أدراك من دعائى ده منه للسما على طول ...

-: ششش عطلتينى روحى لمى الورق ده وحسابى معاكى بعدين انا لو كنت فضيلك كنت عرفتك مقامك كويس ...

مشى وسابها وهي قالت بصوت واطي

-: ربنا يوعدك بجاموسة هبلة ..

لسه مكملتش كلامها وكان الساعى طالع من مكتب السكرتيرة فى نفس الوقت الى مراد كان داخل فيه وهوب الاتنين لبسوا في بعض هدوم مراد كلها اتبهدلت ... اما مى فكانت شايفة كل ده وهى بتلم والورق وقالت بصوت عالى عشان تسمعه

-: شوفت مش قولتلك الى يجى عليه مبي**بش ابدا واهو الي حصلك ده بداية ا****ة حضر نفسك بقى للي جاى ..

مراد عنيه احمرت وقرب عليها وهو متغاظ ساعتها مى لمت باقي الورق بسرعة وجريت استخبت منه ..

داليا كانت قاعدة بتشتغل على مكتبها وقالت

-: رجعتى ليه مش كنتى رايحة تودي الورق ده للبت المسرسعة الى كل شوية تكلمنا ..

-: قابلنى قطر الهى ينشك في معاميعه خبطنى ووقعلى الورق كله اتلغبط ..

-: هههههه لمى ل**نك الا حد يسمعك وبعدين مين القطر الى يقدر يقف في وشك ..

-: اهو واحد من الى شغالين فالمخروبة دى ..

-: يا بت اكتمى الا كد يسمعك ..

-: ما يسمعونى انا زهقت طول ما انا قاعدة كده تحت فالخنقة دى وسط والورق والتراب اهو احنا شغالين بقالنا كام شهر محدش جه بص في وشنا ..

-: عشان شغلهم معظم الوقت عالكومبيوتر كل حاجه متسجله عليه اما الارشيف مفيهوش، غير شويه ملفات وعقود قديمة ..

-: طيب اهو كويس اننا قدمنا فالتعليم المفتوح خلينا نخلص جامعة يكش يرقونا ويشغلونا شغلانة عدلة ..

-: احمدى ربنا يا اختى وبوسي ايدك وش وضهر مش احسن من المرمطة الى كنا فيها واحنا بنشتغل من محل لمصنع لكشك اهي شغلانتنا هنا عليها القيمة ..

-: هههه متفكرنيش فاكرة لما كنت شغالة عند المعلم سردينة بتاع السمك ...

-: ههههه مش عارفة كان عقلك فين ساعتها ..

-: يعنى انا كنت لقيت شغل تانى وقلت لأ ..

ساعتها التليفون الارضى رن وكانت السكرتيرة بتستعجل الورق الي طلبوه ...

-: روحي بسرعة ودي الورق عشان البت المسرسعة متصدعناش ..

-: طيب انا خلاص ظبطه زي ما كان هروح اهوه ..

-: اه بتقولك روحى على اوضة الاجتماعات على طول هتلاقيها فالدور الاخير الاوضة الى عاليمين ...

-: ماشي ماشي ...

بعد دقايق دخلت مى اوضة الاجتماعات و مخدتش بالها من مراد الي كان واقف بيتكلم عالسبورة وبيشرح للمدراء فكرة المشروع الجديد عطت الورق للسكرتيرة وكانت لسه هتخرج الا ان مراد قال

-: استنى عندك !!

لفت مى وبصتله واستغربت لما لقيته واقف بلعت ريقها وهي خايفة وقالت

-: اا انا

-: ايوه انتى اقعدي استنينى برا متمشيش..

مى : حح حاضر ..

طلعت مى واعدت استنته بس كانت طول ما هي قاعدة

-: هو انا مالى خايفة كده ليه هو يعنى هياكلنى ده كان واقف بيشرح وماسك اريال فايده ولا عصاية اكيد اكيد ده مدرس وجى يديهم درس ....

خبطت ايدها في دماغها وقالت

-: درس ايه يا ع**طة لا ده اكيد بيديهم مجموعات تقوية عشان يتعلموا كده ويتنوروا ..... بس شكله ميديش على مدرس ابدا ... ولله تحسيه كده شبه ممثل اجنبي حلو كده بعنيه الخضرا دى الي شبه البرسيم .. ده ايه ده هو في راجل يبقى عنيه خضرا..

مى كانت قاعدة بتكلم نفسها ولقيت الى بيحط ايده على كتفها وبيقول

-: سكتى ليه كملى ..

انتفضت مى وبعدت عنه وقالت

-: مش تكح ولا تعطس،ولا حتى تزمر خضتنى يا شيخ ...

-: ازمر انتي يا بت بتض*بي حاجة قولى متخافيش انا ممكن اساعدك ..

-: اا انت كنت واقف هنا من امتى !! يعنى سمعتنى وانا بتكلم ؟

-: اه بامارة مجموعات التقوية الي كنت بديها جوة ..

-: ههه انت سمعتنى يالاهوي طب بعد اذنك بقى انا رايحة اشوف شغلى ..

-: لا استنى متمشيش ..

-: لا بص انت هتعطلنى والمدير هنا مبيرحمش ده لسه من يومين خا**لى ١٥ يوم من مرتبى ..

-: ١٥ يوم !!

-: اه شوفت راجل مفتري يلا بقى ربنا يسهله المهم انا لازم امشي الا حد يزعقلك انت كمان ويخ**لك ...

-: انا محدش يقدر يزعقلى ..

-: ليه ان شاء الله هو انت مفكر نفسك صاحب الشركة ولا حاجة ..

مراد ابتسم وهز دماغة وقال

-: اه صاحبها .. وانا ابقى المدير الى خ**لك ال١٥ يوم مش كده ..

مي ساعتها رجليها مقدرتش تشيلها ووقعت اغما عليها بعد وقت فاقت لقيت نفسها في مكتب غريب عليها ولقيت مراد قاعد جنبها وماسك برفان

مراد بقلق : انتى كويسة !!

مي اتخضت وبعدت عنه وقالت

-: هو ايه الي حصل انتى عملتلى ايه ؟

استغرب كلامها وقال

-: معملتلكيش حاجة انتي الى وقعتى واغما عليكى ..

بصت حواليها وقالت

-: وايه الى جابنى هنا انت اكيد رشيت عليه حاجه ..

-: انتى يا بت ع**طه ولا ايه بالظبط دانا شلتك جبتك هنا وضهرى اتقطم هو انتى كام كيلو ؟

-: على فكرة بقى انا خفيفة بس انت الى تلاقيك خرع ومتعرفش تشيل يلا عدينى بقى خلينى اروح اشوف شغلى ...

مى قامت تمشي ومراد ابتسم وهو بيبصلها لغاية لما فتحت الباب ومشيت ....

عند حمزة

المحامى كان قاعد بيتكلم مع حمزة بخصوص العمارة الى وقعت وقال

-: للاسف الشركة جالها قرار من المحكمة بوقف كل نشاطتها لغاية لما يتشكل لجنة و تبحث في كل الشغل الى عملته الشركة ...

حمزة غضب وقال

-: ازاى ده يحصل امال انت بتعمل ايه انت عارف قرار زي ده هيخسرنا اد ايه ؟

-: للاسف يا حمزة بيه في كذه عمارة من الى الشركة كانت بنياهم وماسكة مشروع الانشاء اصحابها مقدمين بلاغات ضدك ..

-: بلاغات ده ليه بقى ان شاء الله ..

-: بيقولوا انهم شاكين في الاساسات وان البعض منهم بيدعى ان العمارة قايلة للسقوط وفي عمارة منهم فعلا لما الشرطة راحت وعينتها لقيت ان فيها اكتر شرخ كبير في العمدان ..

-: لا لا الموضوع ده مش بالصدفة .. الموضوع ده وراه حد والحد ده مخطط ومدبر كويس وعارف هو بيعمل ايه ؟

-: عندك حق ممكن بس ده مينكرش ان المصيبة فعلا موجودة ..

سهير راحت تزور ليلى وقالتلها

-: اول ما كلمتينى اجيلك بصراحة كنت قلقانة اوي وخايفة يكون في حاجة ..

ليلى ابتسمت وقالت

-: لا متقلقيش .. انا بس كنت عاوزة احكيلك عن حاجه بس اوعدينى ان الموضوع ده يفضل بنا ..

سهير : طبعا يا ليلى احنا اصحاب وانتى عارفة اننا طول عمرنا احنا التلاتة سر بعض .. بس لولا الظروف الى فرقتنا عن نجوان ..

ليلى قالت بحزن

-: ماهو انا بعتالك عشان عاوزة اكلمك بخصوص نجوان ..

سهير قالت بفرحة

-: صحيح بجد ها قولى انتى عرفتى مكانها ؟

ليلى هزت دماغها وقالت وهي بتعيط

-: نجوان تعيشى انتى راحت عند الى خالقها ...

سهير حطت ايدها على وشها وعيطت

بعد وقت سهير مسحت دموعها وقالت

-: وو وانتى عرفتى ده ازاى وهي ماتت ازاى ؟

ليلى : البيت الى كانت عايشة فيه وقع وهي كانت جوه وعلى المسعفين وصلوا كانت الروح طلعت للى خالقها ..

سهير : يا حبيبتى يا نجوان عاشت عمرها كله بتتعذب .. ربنا يرحمها يارب ويغفرلها ..

ليلى : يارب ..

-: بس انتى عرفتى الى حصل ده ازاى احنا من زمان واحنا بندور عليها هى بناتها ومعرفناش نوصلها ..

-: بناتها كلمونى لما الدنيا ضاقت بيهم وبقوا فالشارع وجم اعدوا معايا يوم هنا وقدرت انى ادبرلهم شقة كويسة يعيشوا فيها ...

-: طب ومقولتليش ليه كنت جيت وشوفتهم ...

-: الكلام ده كان من كام شهر كان بعد وفاة جلال بكام يوم قلت انتى اكيد مش فايقة انى اكلمك واحكيلك .. عموما انا بعتلك دلوقتى عشان عاوزة اعرفك عنوانهم وتبقى تروحى من وقت للتانى تسألى عليهم ..

-: لا طبعا انا هجبهم يعيشوا معانا

-: لا اوعى هو شريف هيوافق !! جلال الله يرحمه هو الى كان بيقفله انما دلوقتى مين هيقف ويحميهم ..

-: حمزة !! حمزة ابنى مش ممكن يسمع لشريف اردة وبعدين انتى عارفة ان وصية جلال قبل ما يموت ان حمزة يتجوز واحدة من بنات نجوان ...

-: مش عارفة بقى المهم انتى بس مهدي لشريف ولا سمية وجسى نبضهم ايه عشان ميحصلش مشاكل والدنيا تقوم حريقة .. انتى عارفة انتم عايشين في فيلا واحدة ومش هينفع بنات نجوان يجوا يقعدوا معاكم في نفس البيت طول ما شريف مش موافق ..

-: طيب هشوف كده وربنا يستر وان شاء الله شريف يكون قلبه حن شويه بعد ما يعرف ان خلاص نجوان ماتت ...

عند خالد الى كان راجع وشكله كان سكران نغم كانت واقفة فالمطبخ مفيش حد فالفيلا غيرها بعد ما مامتها راحت تزور ليلى ...اما سمية ومنى راحوا النادي والباقى راح شغله وعشان حظها الوحش ان الشغالة كانت اجازة ...

نغم لقيت الي قرب عليها وكتم بقها حاولت تفك ايده وتصوت بس مقدرتش التفتت لما لقيت خالد مسكت السكينة الي كانت بتقطع بيها السلطة ولفتها عشان تض*ب بيها خالد كتفها تانى عشان يسيطر عليها وهي مش عارفة تتخلص منه ...