مجموعة قصص قصيرة

غلطة عمرى

الفصل الثانى

رونى محمد

( اللهم صل وسلم وبارك على سيدنا محمد وعلى اله وصحبه وسلم )

دخل مراد ومعاه حمزة وساعتها طبعا محدش كان يعرف التانى ليلى عرفتهم على اساس ان البنات يبقوا ولاد صحبتها بس مقلتش انهم بنات نجوان .. اما مراد فكان ابن ليلى وعرفتهم بحمزة انه صاحبه ..

حمزة ومراد استاذنوا ودخلوا المكتب عشان يشتغلوا عالمعلومات الى معاهم ويوصلوا للبنت والى ميعرفهوش بقى ان البنت موجودة معاهم في نفس البيت ... يعنى القطة كانت جوة عرين الأسد ...

داخل المكتب

مراد : انا مش فاهمك يا صاحبى من امتى الانتقام بقى في طبعك كده ما تفكك من البت دى وسبها بكرة ربنا ينتقم منها على الى عملته ..

-: انا عاوزها مش عشان الانتقام بس .. انا عاوز اعرف هل فعلا البنت دى سرقت الورق فعلا ولا لأ ..

-: يعنى ايه ؟

-: يعنى انا شاكك في شريف !! اقنعنى انت ازاى واحد بنزاهة شريف وعجرفته هيركب اتوبيس نقل عام وكمان معاه شنطة فيها ورق يساوي ملايين ...

-: طب ما الورق ده يضره قبل ما يضر الشركة انت ناسي انه شريك ابوك فالشركة ..

-: لا مش ناسي بس هو طول عمره كان بيحاول ياخد الشركة لوحدة عشان الصفقات المشبوهة الي بتم من تحت الترابيزة ..

-: لا يا عم ده كان زمان انما دلوقتى الموضوع اختلف ..

-: مختلفش ولا حاجه شريف زى ما هو عاوز يكوش على كل حاجه .. الطمع عامى قلبه ..

-: طب ماهو الى حصل ده هيوقع الشركة ويخسر شريف كل حاجة ..

-: مين قال كده شريف مش خسران حاجة ابويا الي كان حاطط كل فلوسه فالصفقة دى مش شريف وبعدين حتى لو الشركة افلست .. شريف ممكن يكون بايع الورق الصفقة ده بتمن الشركة كلها ..

-: عموما متسبقش الاحداث مسير الحقيقة تبان ..

-: اتاكد بس من الى فى دماغى وساعتها همسحه من على وش الأرض

-: بس يا حمزة فى حاجة لفتت نظرى

-: ها قول

،-: البنتين الى برا شبه اليدصور الى الرسام رسامها

،-: الظاهر انك جالك عما من كتر الصور الى بحلقنا فيها بقينا بنشوف البنات كلها شبه بعض ..

خارج المكتب عند ليلى

ليلى : خلاص زى ما اتفقت معاكم انتم هتقضوا معايا اليوم النهاردة ولو حابين تقعدوا معايا يومين تلاتة انا معنديش مانع ..

مى : لا احنا مش عاوزين نتقل على حضرتك كتر خيرك ان حضرتك وافقتى تقفى معانا ..

ليلى : عيب يا ميوش الكلام ده .. وبعدين ده ميجيش حاجة من الي عملته زمان نجوان معايا ..

فات يومين ومى وداليا مشيو من بيت ليلى على امل انهم هيزروها من وقت للتانى بعد ما ليلى وفرتلهم شقة قريبة منها يعيشوا فيها وكمان وعدتهم انها تشغلهم في شركة من شركات العيلة ..

بعد اسبوع

في فيلا حمزة الصياد ..

كان في بنت داخلة بتتسحب على اطراف صوابعها وفجأة شغلت التليفون على اغانى شعبية بصوت عالي .. قام حمزة مفزوع من النوم اما هى فوقعت عالارض من كتر الضحك ..

حدفها حمزة بالمخدة و قالها بغضب

-: في حد يصحى حد كده .. انتى عقلك ده مش هيكبر ابدا يا نغم !!

ردت نغم وقالت : بالع** ده كبر والدليل انى مجبتلكش جردل التلج وفضيته فوق دماغك !!زى ما كنت بعمل زمان ..

حمزة شال الغطا وقام وقف وقال

-: ده انا كنت **رت دماغك ...

نغم : طب يلا فوق كده وتعالا ورايا ماما مستنياك بقالها ساعة عالفطار ..

حمزة وهو داخل الحمام قالها

-: طيب روحى انتى وانا جى وراكى ..

في بيت مراد

ليلى كانت قاعدة بتفطر مراد قرب عليها وباسها من دماغها وقال

-: صباح الخير على احلا عيون فالدنيا !!

-: اقعد يا بكاش عشان في طلب عاوزة اطلبه منك ..

مراد قعد جنبها وقال

-: اؤمرينى يا ست الحبايب ..

-: حبيبي الامر لله وحده ... فاكر البنتين الي عرفتك عليهم من فترة وقولتلك انهم ولاد واحدة صحبتى !!

-: اه مالهم !!

-: عوزاك تشوفلهم شغل في اى شركة من شركات العيلة ..

-: اممم ماشي خليهم يجيبوا السي في بتاعهم ويقابلوا اي حد من ال اتش ار وانا هوصي عليهم ..

-: ماشي يا حبيبى انا هكلمهم وهخليهم يروحوا النهاردة ولا بكرة ..

حط مراد اخر لقمة في بقه بعد ما شرب العصير وقال

-: طيب وابقى بعتيلى اساميهم بالكامل عالواتس.. سلام ..

-: ماشي يا حبيبي مع السلامة ..

عند حمزة كان قاعد مع والدته واخته نغم وقال

-: انا عارف ان دى وصيته .. طب قولولى انا هدور عليها ازاى وانا معرفش اى حاجه عنها ولا عن بناتها ..

ردت ام حمزة الي اسمها سهير وقالت

-: بص يا مراد دور على عمتك نجوان ودي اسمها معروف وساعتها ابقى اتعرف على بناتها لما يجو هنا وابقى اتجوز واحدة منهم وحقق وصية ابوك ..

حمزة : انا طول الوقت كنت مستغرب ازاى بابا كان عاوز يجوزنى لوحده انا معرفهاش ولا حتى شوفتها وليه عمتى نجوان كانت بعيدة عنهم طول الوقت ..

سهير : هقولك على كل حاجة نجوان زمان غلطت غلطة كبيرة لما هربت يوم فرحها عشان تروح وتتجوز الي بتحبه .. ساعتها جدك غضب عليها واتبرى منها هو واعمامك .. هما مكنوش يعرفوا هي اتجوزت مين ولا حتى اسمه ايه لغايه من عشر سنين تقريبا جوزها ده مات وهى الدنيا ضاقت بيها ملقتش حد تروحله فجت لعمك شريف كان ساعتها ابوك مسافر المانيا عشان كان بيستورد حاجات من هناك .. المهم هي لما قابلت شريف وتقريبا كانت بتطلب منه فلوس و حقها فالورث

..... شريف ض*بها وطردها هي وبناتها انا شوفت الي حصل ده كله بعينى .. ولما جلال رجع انا حكتله ..

حمزة قال : طب وبابا كان رد فعله ايه ؟

سهير : بباك كان حنين غير شريف نهائى قلبه وجعه على اخته وفكر ان طالما لجأت لهم كده يبقى البيبان اتقفلت في وشها ...

نغم : وبعدين ايه الى حصل ؟

سهير : ابوك دور عليها كتير وملقاهاش حتى حاول يعرف اسم جوزها ايه معرفش ..

حمزة : ماشي طب انا هدور على عمتى وبناتها واجبهم كمان يعيشوا هنا طب ايه لازمتها الجواز !!

-: جلال الله يرحمه كان عارف بالى شريف ناوي عليه وهو انه هيحرم نجوان وبناتها من حقهم في الميراث وبما انهم بعد موت جلال ملهمش ضهر ولا حد يدافع عنهم غيرك .. عشان كده جوازك من بنت نجوان هيرجعلها حقها في الميراث وفي نفس الوقت يخليها ترجع تعيش معانا ...

عند شريف

الي كان واقف في مكان صحراوي وكل شوية يلتفت حواليه ويبص في ساعته واخير جت عربية ونزل منها راجل وقرب من شريف وهو بيمد ايده بشنطة سودة وقال

-: ده حقك فالعملية الاخيرة ..

شريف بص للشنطة بطمع وقال

-: هما .. دول كام ها ؟

-: اتنين مليون زي ما اتفقنا ..

-: مم ماشي ماشي .. المهم عملتولى ايه في الشركة الي قولتلكم عاوزها !!

-: صاحبها مش عاوز يبيع !!

-: منا عارف انه مش عاوز يبيع .. امال انا مدخلكم ليه ؟

-: طب ايه رأيك عندي فكرة حلوة

-: قول وهات من الاخر ..

-: اقتله واتجوز مراته ..

-: مراته ايه بس الى اتجوزها دى واحده مشلولة ..

-: انا كنت عاوز اعرف انت ليه عاوز الشركة دى بالذات ..

شريف : انا عاوز يبقى انا الوحيد في مصر الى محتكر صناعة الحديد والصلب وطبعا حاليا مكنش فيه غير شركتين هما الي مكتسحين السوق واحدة كانت بتاعتى انا وجلال والتانية بتاعت سالم ..

-: بس سالم يبقى ابن عمك يعنى صياد بردو ..

-: بس شركته مش بتاعتى وم**بها مبيخشش جيبي .. المهم هتعرف تحل الموضوع ده ولا اشوف ناس غيركم ..

-: خلاص متشغلش بالك اعتبر ان الموضوع اتحل والشركة بقيت بتاعتك ..

-: متأكد يعنى اعتمد عليك !

-: طبعا خلاص ..

عند داليا ومى

مى : اش اش ايه الشياكة دي كلها يا دودو دانا معرفتكيش ..

داليا : احم انا بس كنت بحاول اداري جمالى الفتاك عشان الرجالة متتهبلش ..

مى : هههههههه وبينتيه ليه بقى ان شاء الله ..

داليا : انترفيو بقى وشغل لازم الواحد يلبس ويتشيك ..

مى : يا واد انت يا خطر .. طب يلا بينا عشان منتأخرش ...

مى وداليا راحو الشركة الي ليلى قالتلهم عليها وقابلوا الاتش ار ورغم ان شهادتهم قليلة الا ان وافق عليهم بأمر من مراد بس حطهم في شغل الارشيف ..

فاتت الايام وداليا ومى حياتهم اتظبطت فالشغل الجديد ومى وداليا قرروا انهم يكملوا تعليمهم بجانب شغلهم ويدخلوا كلية التجارة ..

هنروح في مكان جديد اول مرة نروحه وهو مجموعة من الشباب قاعدين مع بعض وبيشربوا م**رات واحد منهم اسمه عادل قال

-: الصنف النهاردة عالى اوى ..

واحد تانى اسمه وائل قال

-: امال الواد خالد فينه مجاش ليه كان جرب الصنف الجديد ده معانا ..

ردت بنت واسمها شيري وقالت

-: انا كلمته وقالى جي فى السكة ..

جرس الباب رن وخالد دخل وقال

-: من غيري يا اندال ازاى تبداوا السهرة منغيرى ..

وائل : ما انت الي اتاخرت هنعملك ايه ؟

خالد : ابويا مقفلها عليه اليومين دول ال ايه بيفكر يجوزنى ههههههه

عادل : ياقتى قميلة هتتجوزى يا بيضة وتروحى بدرى وتجيبي عيش وزبادي ..

شيرى : ههههههه لا ومتنساش الزبالة وانت نازل ..

خالد : ماتلم نفسك انت وهي انت يعنى شايفنى وافقت ..

وائل : امال ايه ماهو طالما شريف باشا حط حاجة في دماغه بينفذها ...

خالد : عادي ومين قالك انى مش عاوز اتجوز الى قال عليها

عادل : وهي مين بقى العروسة نعرفها !!

خالد : دى نغم بنت عمى الى لسه ميت قريب !!

وائل : يبقى اكيد عشان الورث ما ابوك ده مش ساهل ابدا ..

خالد : يلا بس قفل عالسيرة دى وادينى التذكرة بتاعتى عشان انا جسمى خلاص هيتفرتك ..

شيرى : براحه طيب على نفسك الديلر ده جديد قلنا نجربه ..

خالد : وماله القديم ما كان شغال !!

وائل : بيتنطط علينا فالفلوس وكل شوية يعلى علينا ...

غرس خالد الحقنة في دراعة ورجع لورا وهو في عالم تانى . .