KINABUKASAN, paggising ni Ricky ay agad siyang bumangon. Napangiwi nga siya nang makaramdam ng hapdi sa kanyang kalamnan at mga hita. Mukhang nanibago ang kanyang katawan sa laro kahapon, pero hindi naman ito magiging hadlang sa kanyang pag-eehersisyo ngayong umaga. Matapos niyang maghilamos at magpalit, ay nag-push-ups at sit-ups muna siya. Pagkatapos nito ay lumabas na siya na dala ang bola. Ito na muli ang kanyang normal na routine sa kanyang paggising. Kailangan niyang mas maging matibay sa mga laro at maging mas matatag sa malalaking makakalaban.
Nang pabalik na uli siya sa Canubing ay napadaan siya sa tapat ng bahay nina Rich sa kabilang barangay. Sarado ang ilaw rito at iba ito kumpara dati na madalas ay bukas kapag siya ay dumaraan. Nilampasan na lamang niya ito at hinayaan na
