Nakangiting bumaba ako sa kusina at naabutan ko si Nana Ising na tinatanggalan na ng balat ang mais na dala ni Six. Napatingin ito sa akin nang lapitan ko siya.
"Lalagain ko ito o may gusto kang ibang luto?"
"Okay lang pong nilaga, Nana," nakangiting sagot ko at natatakam na sa mais na hawak niya.
Ngumiti sa akin si Nana. Muli akong umakyat dahil tinatawag daw ako ni Lolo.
Wala ito sa opisina niya kaya nagtungo ako sa kwarto niya. Kumatok muna ako bago pumasok. Inilibot ko ang tingin sa buong kwarto pero hindi ko nakita si Lolo.
Napatingin ako sa may side table niya at napansin ang bagong bulaklak na naroroon. Palaging may bulaklak na gardenia sa ibabaw ng side table ni Lolo. Hindi talaga iyon nawawala mula nang dumating ako dito sa mansyon. Iyon yata ang paborito niyang bulaklak, at
