Jelaine's POV
"LOVE.."
Muntik na akong mahulog mula sa pagkakaupo ko nang marinig ang mahinang tinig ni Gian sa tabi ko. Kanina pa ako hindi mapakali dahil kanina ko pa ito gustong makita. Nagtataka na ako sa sarili ko dahil pakiramdam ko hindi buo ang araw ko kapag hindi ko siya nakikita o naririnig ang boses niya.
Pakiramdam ko ay tumayo ang mga balahibo ko sa aking batok nang maramdaman ko ang mga kamay nitong yumakap sa beywang ko. Halos manlambot na naman ang buong katawan ko nang humiga ito sa malaking bato na kinauupuan ko. Ginawa nitong unan ang mga hita ko.
Pagkatapos ko siyang sagutin tatlong araw na ang nakakalipas ay mas naging malambing ito sa akin. Minsan naiisip kong daig pa nito ang babae sa pagiging malambing.
Masuyong hinaplos ko ang malambot at mabango nitong buhok.
