NANG MAGISING AKO KINABUKASAN ay mag-isa na lamang ako sa kama.
Tumingin ako sa digital clock sa ibabaw ng nightstand ko. Alas siyete na ng umaga.
Payak pa akong napangiti habang nakatingin doon. Himalang umaandar pa ang orasan, kahit ilang buwan na akong nawala. Sabagay, bagong palit naman kasi ang baterya niyon bago ako umalis noon.
Luminga ako sa aking tabi. Nasa unan pang hinigaan ni Kael ang bakas nito, ngunit wala na roon ang lalaki. Hinawi ko ang kumot na nakabalot sa katawan ko at bahagyang iniangat, hindi katulad kagabi na natulog ako, mayroon na akong suot na damit ngayon. Suot ko na ang hinubad na damit ni Kael, na halos lamunin ang katawan ko sa laki. Wala nga lang akong kahit na anong panloob, bukod doon. Marahil ay ang lalaki ang nagbihis sa akin bago ito lumipat sa kabila
