Chapter Seventeen
1047 Words
San Isidro Police Department
April 02, 2015
4:12 PM
“Ginawan na naman nila ng kwento,” komento ni Homer habang nakatingala sa TV ng kanyang office. Si Rick Pria uli ang tampok ng mga balita kahit saan mang istasyon. Kinukwestiyon ng mga komentaryo ang mensaheng nakasulat sa likuran ng bata.
Nag-flash sa TV ang litratong kuha lang kanina. Mababasa ang mga katagang: “Come to me those of you who have sinned this man.” At ang isang kadugtong nitong putol na salita na kapag ita-translate, ang katumbas lang ay, “Re”.
“Ano pa ba ang aasahan mo sa media?” sabi ni Andy na kapapasok lang at may dala-dalang dalawang cups ng kape. Sa kili-kili niya’y may nakasingit na naka-ziplocked na files. Umupo ito sa desk, katapat si Homer, saka inabot ang isang cup ng kape sa kaibigan. “Trabaho nila iyan. At naniniwala sila sa kasabihang, “Strike while the iron is hot”.”
“Sabagay.” Humigop si Homer sa kanyang cup.
“Anong hula mo roon sa last word?” nakangiting panghahamon ni Andy.
“Last word?”
Umirap si Andy sa kabagalan ni Homer. “‘Yung Re. ’Yung nasa likuran ni Rick?”
“Ahh, re... uhh...” Pumikit muna siya habang nag-iisip. “Return?”
Bahagyang natawa si Andy habang nilapag sa desk ang kanyang kape. “Mali. Repent.”
“Repent? Paano mo naman nasabi?”
“Basta.” Iwinasiwas ni Andy ang kanyang ga-leeg na buhok, gesture na nagsasabing, magaling ako e. Kinuha uli nito ang kanyang kape.
Repent? Naisip ni Homer. Sasabihin ba iyon ng sumanib kay Rick?
Ngumisi na lang siya habang ina-acknowledge ang kayabangan ng kasama. Napatingin uli siya sa files na dala nito na hanggang ngayon ay nasa kili-kili pa rin nito.
“Ano iyang hawak mo?” sabi ni Homer.
“Kape.”
Umasim ang mukha ni Homer. Pinaglololoko mo ba ako?
“Iyang nasa kili-kili mo.”
“Ahh.” Binitawan ni Andy ang mga hawak at pinatong ang mga ito sa desk. Dalawang ziplocked files. Ang unang ziplock niyang nasilip ay puno ng mga pictures.
Habang sinusuri ni Homer ang mga litrato, si Andy naman ay nagkuwento, “Napag-alaman ko kanina na bago natin makuhanan ng interview itong si Justin, pumunta muna siya sa bahay ng mga Pria. Nakikiusap na papasukin kahit pa alam niyang hindi siya papayagan. Pinagdudahan ko ang kinilos niyang iyon. And you know what?” Ngumiti siya. “Mukhang iyan ang dahilan kung bakit niya gustong pumasok.”
Sa mga hawak-hawak ni Homer ngayon na litrato, makikita sina Diane at Justin na sobrang malapit sa isa’t isa. May isa pang kuha na parehas nakahubad pang-itaas ang dalawa, magkayakap habang si Diane ay naka-bra lang.
“Under intimate relationship ang dalawang 18-years ang gap sa isa’t isa,” sabi ni Andy. “Nagtanong-tanong ako kung may alam ba ang mga kapitbahay tungkol dito, pero wala, wala silang kaalam-alam.”
Inangat ni Homer ang mga pictures. “Pinakita mo itong mga pictures sa kanila?”
“Syempre hindi. Nagtanong lang naman ako.”
“Okay, good.”
Niyakap ni Andy ang mga braso niya. “Malaki rin kahit papaano ang maitutulong nito sa kaso, knowing na hindi niya binanggit ang tungkol dito noong ma-interview natin siya kanina.”
“Baka hindi nabanggit dahil hindi naman natin natanong?”
Tumango-tango itong si Andy. “Pupwede. Pero atleast, ngayong nasa atin iyan, mas lalo nating malalaman ang background story ng pamilya Pria. Malay mo, napaka-importante pala niyan?”
Kumiling ang mukha ni Homer. “Tama. Kahit anong dagdag na impormasyon, pupwedeng makatulong sa pagsulong ng kaso. Sige bukas, kokontakin natin uli itong si Justin, tignan natin kung anong masasabi niya kapag nakita niya itong mga ito.”
Intimate relationship, naisip ni Homer. Hindi niya mawari kung anong pumapasok sa kokote ng Justin na iyon kung bakit nakikipagtalik iyon sa isang halos dalawang dekada na ang tanda sa kanya. Mula sa pag-interview niya rito noong nakaraan, parang hindi ganoong klase ng tao iyong binatang iyon. Ano naman kaya ang dahilan no’n? Matatandang babae lang ba ang tipo niya? O baka dahil sa pera? O gawa lang ng madalas nilang pagsasama sa bakery nila?
Pinatong ni Homer ang kamay niya sa natitirang ziplock. “Anong laman nito?”
Pero bago pa niya iyon makuha, hinarang muna ni Andy ang kamay niya.
Na siyang kanyang ipinagtaka. “Bakit?”
“May random question lang ako,” sabi ni Andy. “Magkakilala ba kayo ni Rick Pria?”
Kumunot ang buong mukha ni Homer. “Hindi. Bakit? At anong klaseng tanong iyan?”
“Sigurado ka?”
Napilitan tuloy siyang bisitahin ang kanyang pumupurol nang memorya. Ang sigurado lang niyang kilala niya ay si Diane, dahil parehas sila ng bayan na kinalakihan. Posibleng nalaman niya na noon na may anak na ito, oo, pero kung ang tanong ni Andy ay kung kilala niya ang bata nang personal? Natitiyak niyang hindi.
“Oo nga,” iritang sagot ni Homer.
Binawi ni Andy ang kamay niya. “Okay, sige. Tignan mo na iyang file at tignan natin ang magiging reaksyon mo sa sandaling mabasa mo iyan.”
Tinitigan niya tuloy nang masama ang laman ng ziplock. Pakiramdam niya ay parang nakapaloob doon ang isang bagay na sisira nang husto sa pangalan niya.
Pero kung ganoon, bakit naman iyon matatagpuan sa bahay ng mga Pria?
Hindi naman siguro malaking bagay iyon, ‘no? Dahil kung ganoon, malamang hinuhuli na dapat siya ngayon ni Andy.
O baka naman isa itong patibong?
Kinakabahan man, binuksan pa rin niya ang ziplock at saka binunot ang papel nitong laman. Sa hitsura pa lang nito, alam na agad ni Homer na punit na pahina ito ng isang diary.
At nang mabasa ang nakasulat doon, tumulis ang kanyang mata. “Anong—?”
“Oh, kita mo na?”
Sa diary ni Rick Pria, may nakalista roon na sampung pangalan.
Para itong isang hate list. Naka-in-order ito.
1. Clyde Natividad
2. Diane Intal
3. Renz Intal
At nakalagay mismo sa fourth spot ang pangalang pinagtataka ni Homer. Pangalang naiisip niyang isang malaking pagkakamali na maisama roon.
Ang pangalang iyon ay ang pangalan niya mismo.
4. Homer Zapanta
- Writer
