“Nangingitim ang ilalim ng mga mata mo. Napuyat ka ba kagabi?” puna ng nanay niya sa kanya.
Hindi nakaimik si Anemone. Tahimik lang siyang nagpatuloy sa pag-aalmusal. Hindi naman na nakapagtatakang nangingitim ang ilalim ng mga mata niya ngayon dahil madaling araw na sila tumigil sa pagpapalitan ng text messages ni Nazaron.
Pero okay lang dahil hindi mapapantayan ang saya niya. Marami itong ikinuwento sa kanya. Galit ito sa mga magulang nito. Hindi rin ito komportable kay Luther. Sinabi naman niyang mabait si Luther at marahil ay mag-iiba ang tingin nito sa kapatid kung sa Santa Catalina rin ito pumirmi.
"Hindi po, 'Nay." Minadali na niya ang pagkain at hinugasan ang pinagkainan. Baka kung ano pa ang itanong sa kanya ng ina.
Nagkasundo silang magkikita sa tabing ilog bandang alas kuw
