XII.
“HINDI KA RIN makapaniwala, ’di ba?” tanong ni Kirsten. Pinisil-pisil niya ang braso ng asawa.
Tumango lang si Ice. Hindi ito makasagot. Hindi lang ito makapaniwala na magagawa iyon ni Marissa. Nakilala nito ang ginang bilang mabait at mapagmahal nitong yaya. Pero iyong pumatol sa mayroon ng asawa ay ibang usapan na iyon.
Bumuntonghininga si Kirsten, nakikita niya sa mga mga mata ng asawa ang pagkadismaya. Hindi rin niya ito masisisi. Kahit pagbaliktarin man ang mundo ay alam niyang mali ang pumatol sa may asawa. Pero hindi niya rin pwede isisisi ang lahat sa ina niya. May kasalanan din dito ang ama niya.
“Kung ganoon man ang nangyari, Tin. Posible kayang kaibigan ni Dad ang totoong ama mo?” si Ice. Makikita sa mukha nito na interesado itong malaman ang tungkol sa buhay ng asawa.
