Ilang araw ding nagmukmok si Lyrica. Nasa dulo pa rin ng dila niya ang pait. Buo ang loob niyang makuha ang puso ni Morris, ngunit sobrang talim ng dila nito. Hiniwa ng mga katagang nanulas sa mga labi nito ang puso at katatagan niya.
Tuwing ipipikit niya ang mga mata ay malinaw niya pa ring nakikita ang matalas na kislap sa itim nitong mga mata.
Hindi talaga ito nagdahan-dahan sa pagsagasa sa damdamin niya. Rumaragasa ito. Binangga siya nang malakas, kaya heto at nalugmok ang puso niya. Nagkandapira-piraso. Ngunit sa kabila ng lahat ay natagpuan niya ang pusong maigting pa ring tumitibok para sa binata.
Kung akala niya ay kukupas ang nararamdaman niya para rito sa paglipas ng mga araw ay nagkakamali siya. Lalo lang iyong lumakas. Lalong tumatag. Sa totoo lang ay hindi niya maintindih
