حالة وفاة

4421 Words

ارهنت عمري بارت ٤ نورا ناصر .. الاعجاب هو التوأم الوسيم للحب .. ( احلام مستغانمي) ابوي كام على حيله وكلش معصب لف عبايته الرجالية وعدل غترته عاكد حواجبه ومصوب نظراته باتجاه امي الي دنكت راسها مرعوبة منه وخجلانة من كلامها ومصدومة شلون تجرأت ووكفت بوجهه هيج. تكلم بنرفزة ؛- انه كلت كلمتي بديوان ومات**رها مرة ومو انت الي تتشرطين عليه .. وعياش ابن اخوي واخوي ميت ومايتعوض وانت مرة وتتعوضين وهذا البيت الكاعدين بي مو ملكج حتى بكيفج تطردينه.. لا هذا ملك ابوي الله يرحمه وانت تعرفين اخواني خذوا حصصهم بس ويلاد المرحوم ابو عياش ظلوا وياي وكدام عين امي لين كلبها م**ور بموتة ابوهم وبقوا بالبيت.. وراح يبقون ويمته مايعجبهم يطلعون مو انت الي تطلعينهم بشروطج ، وهاي كدام ابوج الرجال الخير انه ارفض شروطج واكلج كعدي هنا ابركلج وورقة طلاكج توصلج لعندج . صباح بخوف ؛- بس اسمعني ابو حاتم .. الشيخ عزام بحزم ؛- العندي كلته ويلله بويه حاتم جيب اختك وتعال وراي . بقيت حاضنة امي وابجي وحاتم يجر بيه صاح عليه بعصبية كوة كاتمها يله خيتي يله امشي وياي .. باوعت لامي وعيوني كلها دموع ، اباوعلها بأسى وبقهر ورفض .. مشيت وحاتم لازمني من ع**ي ويمشي بيه وانه امسح بدموعي وصوت نشغاتي مسموعة .. وصلنه للبيت ونزلنه .. تبعت ابوي للديوانية ورحت يمه كلي اصرار اغير من وضعي صار الي ايام حالتي حالة بعد ماسمعت ابوي مكعدني لعياش .. بنبرة كلها ارتباك وتلعثم كتله؛- بببوية انه ما اريد عياش عفية لاتزوجني اله . وختمت كلامي بالبجي . كال تعاي يمي واشرلي بصفة على الكاع .. رحت كوة امشي واعصر بصابيعي .. كعدت بصفه ، خله ايده على راسي وسحبني اله وباسني على راسي . وتكلم بنبرة حنية ؛- ليش بويه عياش ونعم منه وانه لو ما اعرفه ما اخليج بركبته حجيت ببراءة ؛- بس بويه هو مجرم وبس يكتل جنه تاز المشا** . _ من يشوفج هادئه وحبابه راح يتطبع بطبعج يبعد ابوج وعياش رغم مسودن بس داخله نضيف انه ربيته صح مو ذيج التربيه لان بي رس مال خبال من خواله.. بس يضل الزلمه مثل الطفل يتقشمر بكلمه الحلوه واكو مثل يكول ابنج علئ ما ربيتي و رجلج علئ ما علمتي .. وانه من انطيتج العياش ردت ابين الخوالج بين تربيتي وتربيتهم الرجال يتقشمر بالكلمه الحلوه وانتي بنت ابوج اكيد ترفعين راسي . ظليت بس اهز براسي بقبول وساكتة ودموعي تجمهرت بعيوني .. ظل يلعب ب*عري ويباوعلي مبتسم .. كال ؛- اي هاي بنيتي الي انه ربيتها . دنكت وتجمهرت الدموع بعيوني ، ترخصت منه ومشيت .. رحت على غرفة حازم دكيت الباب كال تفضل فتحت الباب ودخلت باوعتله وعيوني كلها دمع اباوعله بعتب وحقد اجه باتجاهي شبيج ؟ _ تسالني شبيج ابوي راح يطلك امي وانت ماحركت ساكن ، ادري مرة ابوي مربيتك اكثر شي ومرضعتك بس هاي امك الي ولدتك شبيك حازم ؟ جر نفسه بقوة وتخصر يباوع ع الكاع بأسف ويحجي _ هيه امج هم صوجها شكو توكف ويا سميحة ام ل**ن ماتنجرع عبالك ل**ن دلالة والله حقه عياش يطيح حظها _ هسه انت ماعليك بسميحة وعياش جاي احجيلك عن امي وابوي سويلك همة ورجعهم لبعضهم حاجي ابوي حاجي امي تاخذ بكلامك وطول عمرها تريد رضاك وتريد ترجعك الها بس انت مبتعد عنها هسه اجه دورك حازم باوعلي مستغرب من كلامي هز راسه؛- عاد هسه كلامي مدري شراح يأثر بيهم _ ميخالف حجاية التنكال واذا ماياثر على ابوي ياثر على امي ويخليها تتراجع عن شرطها .. حط ايده على جتفي كال يصير خير باجر اروح احجي ويه امي والله كريم انت روحي نامي هسه وبسج بجي عيونج راحت .. هزيت راسي ومسحت دموعي ورحت لغرفتي .... *** كاعد بغرفتي واحرك بهالجكاير ، ضايج من روحي جي وياي وكاره الدنيا والايام مادري شون كاعد تمشي ، مشتاك لوليدي واريدن اشوفه عطشان على ملگاه .. دخلت عليه فختية تتبسم سدت الباب واجت كعدت يمي .. جيتي والله جابج بس انتِ الي تسليني خلي انصب عليج شوية .. كالت جايبتلك اخبار بس على شرط .. ابتسمت الها :- تشرطي عمة فختية تشرطي .. كامت على حيلها كالت لو تموت ما احجيلك مدام هاي سوالفك ماتبطلها .. صحت عليها تعاي تعاي والله ماعيدهه واشرت على شفايفي وظليت ارسم خط متعرج بالهوا بمعنى خيطت حلكي وبعد ما احجي .. كالت اولا الشرط .. _ والي اوله شرط اخرته نور بس احجي .. _ اسمع ولك عويش بعد ماتصيحلي فختية يله احجيلك .. ضحكت وكتلها تدللين اصيحج جمرية . خزرتني وهيه ساكتة .. حركت راسي :- وشبيها الجمرية حلوة ولونها بنفسجي واذا شدت حيلها تظل تغرد .. رفعت ايدها ونزلتها على فخذهه وض*بته بقوة وعصبية .. فركت ايديه بحمساس كتلها ببغاء ؟؟ شنوو رأيج .. كتفت ايديها ومخنزرة بس انه ادري بيها ماتضم حجاية وتريد تطلعها .. _ يله ولايهمج كناري طير حب كوكتيل دجاجة بطة ياعمة يا فختية ترة والله ذول حلوين ومايتهيون ارضي بنصيبج شسويلج هو هذا اسمج هيج .. صاحت بوجهي ولك كرهتني بالطيور اسكت اسكت .. _ يله جا احجي ، سألتها .. _ سمعت خبر صباح حاطه شرط اله انتَ تطلع من البيت يله ترد اله .. وماراضية على خطبتك لميسم هيج سمعت .. كمت على حيلي والغضب وناره استباحوا اعماقي وصحّت الكراهية تجاه هالانسانة بداخلي (صباح).. _ وهاي شتريد مني مكفاهه ورطتني ويا بنت اخوها واخوانها الطايحين الحظ تريد تطلعني من البيت ، شتريد مني هاي ليكون مغرك مراكبها انه ومادري بروحي.. لا هو مو بالحجي اني صح جنت مأجل زواجي من ميسم وعليش اجله اله اخذهه عناد بيها هين يا صباح تحطين راسج براسي ودوبج من دوبي سهلة .. عفت ام فخري بالغرفة وطلعت واعصابي نار طلعت بالحديقة ،جريت باكيت الجكاير وظليت ادخن جكارة ورة جكارة .. شفت سيارة حازم دخلت للكراج ونزلت منها ميسم جانت تضحك ويا حازم وتسولف ويا بس شاف*ني صنمت ووكفت بمكانها ... ظلت تباوعلي بخوف ممزوج بحزن جانت تعبانة هيج مبين على شكلها وهيئتها لازمة كتبها بيدها وجنطتها على ظهرها ، غمضت وفتحت عيونها بجهد ورفرفت اهدابها بتوتر زمت شفايفها باستياء وتن*دت باستسلام .. ودخلت جوة تمشي ببطئ عبالك تجر روحها جر .. شوفتي الها قلبت كل الموازين وخلتني اراجع حساباتي ، لا مستحيل انه مخبل اذا اتزوجها هسه ، ماجاي اشوفها غير طفلة ونظرتي الها ماجاي تتغير .. لازم اثبت موقفي انه ومااخلي صباح بحقدهه تأثر عليه مستحيل ما اريد اظلم ميسم وياي مو كوة هيه ولااريد ابني زواجي من ميسم على انقاض زواجي من سميحة لازم اصحح مسار حياتي بالاول.. هميت روحي ودخلت جوة لغرفتي وانه حاس بالوحدة عبالك انه الوحيد عايش بهذا الكون وفكرت بابني لازم احاجي عمي واطلب اشوفه وهم اطلك سميحة باكرب وكت ماريدهه على ذمتي بعد كل الي جرالي بسبتهه هيه .. *** ميسم... خلص دوام المدرسة وكفت يم الباب الرئيسي اتاني حازم يجي عليه شفت وردة بت خالي جايه من بعيد هيه وصديقاتها ودعتهن واجت ووكفت يمي كالت ها ولج شو واكفة ماتولين لبيتكم ..؟ جاوبتها .. خو ما ادكهه مشي مناااااااا لبيتنا غير يجي عليه حازم وياخذني بالسيارة بيتنه كلش بعيد عن هاي المدرسة من نقلونه هنا لهسه صدك معاناة حازم يشلع كلبي علما يجي واظل واكفة هنا وحدي .. _ اي كليلي خو وانه ابقى وياج علما يجي اخوج وياخذج .. _ اي مو ماتصدف و اشوفج وانتِ بالرابع وانه ثالث. _ اي والله هم صحيح .. _ .وهم انت سجاجة نهار كله عيونج بالكتب.. _ ولج ابوي وعمي كل سنة يكلولي هاي اخر سنة .. _ لا انت شاطرة ومن يشوفون درجاتج عالية يخلونج تستمرين بالدراسة _ الله يسمع منج ان شاءالله وكون يخلوني ادخل كلية شو كلهم متحلفيلي ويكلولي ماتدخلين كلية لاتفرحين لو ترحين معهد معلمات لو تكعدين بالبيت يعني بعد هالتعب هذا وانه احب العلميات اروح معهد معلمات والله ظلم ياربي شهالهمج الي انه عايشة وياهم دخيلك يا الله .. _ على كيفج يمعودة لاتبجين ترة انه البيه كافيني والله _ جاشسوي اذا كلها متحلفتلي حتى بيت عمي متخبلين عليه ياهو الي يكضني مو تفرحين ماتدخلين كلية وتديحين ويا الطلاب هناك.. بالله هسه انه اريد ادرس لو العب بالكلية شون تفكير هذا تفكيرهم .. كامت طلعت ككو من جنطتها وظلت تعلف .. باوعتلها بنظرة جانبية .. كافي كافي راح تصيرين شكدج من البلع شوفي خدودج راح ينفجرن .. _ شسوي تعبت اليوم من كد القهر ومن الجوع كتاب الفيزياء ردت اكله اكل من الدراسة كلساع ارجع ع المسائل احلهن .. صفنت عليها والله ما اعرف شون اواسيها شكد مظلومات احنا بهذا المجتمع كل وحدة ضيمها شكل خو ضيمي انه غير عن الكل .. تن*دت وذبيتها حسرة شكبرها وباوعت لبعيد كتلها ها اجه حازم يلله باي .. عدلت جنطتي ولزمت كتبي الي بيدي قوي ورحت لسيارة حازم فتحت الباب الص*ر ودخلت بالسيارة _ هلو حازم ترة تأخرت عليه هواي .. ظل يباوع صوب المدرسة وتحديدا بالمكان الي بي وردة جاي تمشي . كال وهو مبتسم يمج هاي البطبوطة تسليج بينما اجي .. سرحت بنظراتي عبر جامة السيارة كتله على منو تقصد وردة ؟ _ هيه اسمها وردة ؟ _ اي هاي وردة بت خالي شبيك نسيتها .. حجاهه وهو صافن ترة صدك وردة .. _ ها شبيك حازم بت خالك همين ؟؟ _ أأأ تذكرتها والله كبرانة جا مادامها بت خالي ماتصعدينهه وياج مو خطية ماتعرفين تكليلها تعاي ويانه نوصلج بدربنه تروح مشي ويذبلن خديداتها .. باوعتله وفتحت عيوني على اوسعها .. ضحك كال اشاقة شبيج .. جاوبته_ وين تجي ويانه انت مو تدري احنه عداوة ويه خوالي سبب ابن عمك المصون عياش .. _ وهيه شعليها بيهم ... ووكف السيارة يم وردة الي جانت جاي تمشي بصف الشارع العام .. كال كليلها خل تصعد .. فتحت الجامة كتلها صعدي وردة نوصلج بدربنه .. هاي ماكالت باطل فتحت الباب الورة وشمرت جنطتها بقوة خلتنه نزينه وطبت بالسيارة وسدت الباب حيل وكالت السلام عليكم وهيه تتنفس بتعب وصوت انفاسها مسموعة .. رد عليها حازم بصوت مسموع وعليكم السلام .. تدنت وكعدت بالنص خلت ايد على المقعد الي انه كاعدة عليه والايد الثانية على المقعد الي كاعد عليه حازم .. وانفاسها متسارعة وحجت .. _ شعجب حنيتي عليه وراح توصليني ست ميسم .. _ والله بصراحة مو انه حازم كال نوصلج واله انه اريدج تمشين حتى ينزل وزنج صايرة شكدج .. _ هسه انت شعليج واحد شايل لحيته والثاني تعبان .. _ علواه ع اللحية هيه جم شعرة وخفاف اله انت شحم ولحم .. التفتت لحازم وحجت ويا _ مشكور حازم ماقصرت هاي بت عمتي بذاته كتلها راح اوكف يمج اطرد عنج الوحدة علما يجي اخوج وكفت يمها ورجليه ت**رت وتالي ماتالي بس اجيت عليها عاف*ني ولا بالجذب كالت صعدي وياي نوصلج .. جاوبها حازم والابتسامة شاكة حلكه .. _ هاي انتي كلتيها بذاته شسويلها امسحيها بيه وهسه تدللين انه اوصلج .. باوعت لحازم عينه بالمراية وهاي وردة كاعدة بالنص شكدهه وشكبرهه .. كتله حازم عينك ع الطريق مو بالمراية .. _ اي غير جاي اباوع ع الطريق _ هو الطريق كدامك لو وراك .. _ اباوع للسيارات الوراي يافهيمة .. _ منين اكو سيارات ورانه هو فرع وطريق ترابي قابل شارع عام .. وردة ؛- انت ليش ماتسوقين بداله مو احسن ... باوعت الها ورفعت حاجبي بتساؤل .. ودرت عنها ادري بي جاي يباوعلها يمكن عجبته وهو اكيد صاير هواي ماشايفها اصلا حازم ابد مايروح صوب بيت خوالي .. وصلنه لبيتهم كبل لاتنزل كلتله مشكور حازم جاوبها تتدللين وردة .. خذت جنطتها وكبل لاتنزل كلتلي تعاي ميسم شوية .. _ شتردين مابيه انزل .. _ شكد عجوزية تعاي انطيج حاجة . نزلت شاورتني كالت اخوج شكد حلوة بحلكه من يكول اسمي .. حجتها والضحكة مالية وجهه .. خزرتها وكتلها ادبسز هذا العندج؟ولج احجي شتردين كالت هذا هو ولي .. وطبت لبيتهم وتسويلي بيدها باي وتضحك وعين ع السيارة او بالاحرى علي بداخلها (حازم).. غميتها وصعدت بالسيارة شفت حازم يعاين عليها ومبتسم ونظرات الاعجاب من عيونه تشع .. من دخلت كال هاي بس جم سنة ماشفتها كبرت هيج وصارت حلوة ... باوعتله كتله ها ؟ دار وجهي بيده وكال ماكو شي وحرك السيارة وصلني للبيت نزلت من السيارة بالكراج جاي اضحك ويا حازم اكله ها مو عيب زلغت روحك على وردة .. جاوبني هيه وردة لو تنكط عسل .. _ ماتفيدك ماتفيدك عدنه عداوة وياهم لو نسيت..حاجيته وميتة ضحك .. وجان اشوف عياش كبالي كاعد بالحديقة بيده الجكارة ويدخن انتبه عليه صار يباوعلي بنظرات قاتلة لو كانت النظرات تقتل لكنت مقتولة الان.. تلاشت ضحكتي وعجزت عن الحركة وبداخلي اتقدت الحسرة والخيبة غصة كبيرة تمنعني من التنفس ردت بس اتبخر بالجو واختفي ، كوة جريت روحي جر ودخلت جوة ردت بس اتوارى عن نظراته .. دخلت لغرفتي ركض .. سرحت بنظراتي بالفراغ و ماكدرت اسيطر على الغدد الدمعية المتمردة عليه تسارعت العبرات لتسيل الدموع على وجنتي وب**ت مطبق .. فكرت بعد ماكدر اعيش هنا وامام انظاره اخاف منه ارجف مو بيدي ابد .. انوب امي مو يمي طلعت من الغرفة رحت حاجيت حازم كال العصر اروح لامي واحجي وياهه صار العصر وشفته طلع وبالليل اجه ركضت للغرفة احاجي بس شافني ابتسم باستهزاء _ كلتي امي تريد رضاي موو؟ اصلا بس حاجيتها كالت لاتحجي ولا تتعب نفسك انه وعياش مانرهم ابيت واحد ... ياخوية يا ميسم هاي مو نهاية الدنيا يردون يتطلكون خليهم يتطلكون شسويلهم يعني ؟ دنكت راسي ورجعت لغرفتي .... مرت الايام وابوي طلك امي وعياش طلك سميحة جانت من اصعب الايام ماجنت اكدر استوعب بيوم من الايام امي وابوي يتطلكون .. وبهاي الفترة جدي ابو امي توفى وبقت امي وبيبيتي بس هما عايشين ببيت جدي لان خوالي كل واحد بيت وحده .. عانيت هواي بالمدرسة بعيدة لان مدرستنا القريبة بيها اعمار وماتجهز اله السنة الجاية فنقلونه لغير مدرسة وبغير منطقة .. قررت احاجي ابوي عسى ولعل يخليني ابقى يمها وارجع ويه وردة مشي لان حازم يتأخر عليه .. رحتله وجان كاعد وحده .. دخلت عليه خجلانه وخايفة لايرفض طلبي كتله .. يابه انته تعرف انه ما راضيه بعياش بس انه لخاطرك وخاطر عيونك ولا ا**ر كلمتك انت تفصل وانه البس .. بس يابه مثل ما انه احبك واحترمك ولا ا**ر كلمتك اريد منك طلب وما يرد الكريم اله البخيل ..كرصني من خدي كال كبرانة وصايرة خوش تحجين يله كولي شعندج وشرايدة ؟ يا عيون ابوج الج امري . ؟ _ اسم الله على عيونك .. يابه تعرف مدرستنه نقلوهه لغير منطقة وكلش جاي اعاني من تاخير حازم عليه وانت بيت جدي الله يرحمه قريب كلش على المدرسة ووياي بت خالي ، انه اكول اذا تقبل انت اروح اكعد وياهه بايام الدوام وبالعطل ارجع هنانه .. اذا تقبل يعني حجيتها وانه مبتسمة .. مد ايده ولزم حنكه وظل يحك بلحيته ويفكر شويه بعد ثواني رفع راسه وكال اي بنتي مابيها شي روحي يم امج وبايام الجمعة والعطل يجيبج حازم هنانه .. فرحت كلش ورحت حضرت جنطتي خليتلي بيها ملابس وشغلات احتاجها ، اخذت موبايل حازم وخابرت امي وبلغتها فرحت كلش هواي.. مرت الايام وتزوج اخوي حاتم ، زوجته زينة حلوة وشوية مغرورة ودائما توكف يم سعيد ابن عمي وتدك سوالف وضحك ويا ومرة سعيد تغار منها ودائما تصير مشاكل بينهم .. وبيوم جنه بالمطبخ جاي يسوون عشا وانه كاعدة يم باب المطبخ وانطي اكل للطيور واسمع زينة صرخت .. طفرت من مكاني ودخلت للمطبخ .. كتلها شبيج .. دارت وجهه عليه وكالت شبيه بعد شبيه هاي هاي مخليه المس (لجفجير )ع الجدر وصاير حار كضيته وجان احترك من الله لاينطيج كون .. التفتت عليها مرة سعيد مخنزرة كالت ولج هاي عليمن جاي تحجين تقصدين منو ؟ .. جاوبتها :- امي ... عليمن بعد عليج اكو غيرج ؟ شوفي ايدي شون احتركت ؟ _ حل بيج وعساج تستاهلين .. _ ها ها ها متقصدة تحركيني موو؟ الله ياخذج ياحقيرة ... وجان تهجم مرة سعيد على مرة حاتم وتلزمها بحركة كلب مال ووحدة متحملة هواي وض*بتها على وجهه بقوة .. زينة خلت ايدها على وجهه وصرخت تطكيني يالعوبة ؟يالوصخة المبهذلة رجلج مايشتهي يباوع بوجهج من كد وصاختج وبهذلتج .. فخرية جانت كاعدة على صفحة وتكرط بالكرزات عبالك جاي تتف*ج فلم .. من شافت زينة هيج تصيح جان تكلها هو هذا الي الله كدرج عليه توج ماكلة راشدي هجمي يحظي هجمي لو منج اذ*حها واشرب من دمها .. زينة وعلى كلام فخرية تحمست هواي وجان تهجم على مرة سعيد وتلزمها من شعرها وظلت تفر براسها وتسحب ب*عرها بقوة .. وفخرية تكرز وتشمر عليهن الكشور وانه واكفة اجر بيهن ومايفيد وكلساع تجيني دفرة تطيحني بالكاع واكوم واعيد الكرة لحد ما طاحن بالكاع ووحدة مجلبة بالثانية من شعرها ووحدة تسب وتغلط بالثانية .. فخرية ض*بت كف ايدهه على الميز وكالت يا صارت صدك راحت يمهن وظلت تباعد بينهن ويرجعن ولايفيد راحت جابت ماسحة وتض*ب عليهن وهم ما كو ولا وحدة فكت الثانية .. كالت بوعيد انه اعلمجن ترست سطل ماي بارد وجابته ظليت اباوع عليهن ميدرن شراح يصير بيهن الجو بارد شهر الواحد وموجة برد بيبتي تسميها الچلة من شدة برودتها .. مرة سعيد بصياح .. ياعيارة يا كلبة انه وصخة ولج منية الي تكعد ب ١١ الظهر انضف من خلقتج انه مرة حاتم ...دولي شوفي جهرتج جنج رجال خطية رجلج شكد ظالمينه بيج .. مرة سعيد .. ولج لاتجيبين سيرة رجلي على ل**نج لا مرة الثانية اكصه الج .. مرة حاتم .. كصي هسه شوفيني سباعيتج بالله .. وهنه على هذا الحال ومتلازمات زينة لازمة مرة سعيد من شعرها ومرة سعيد هم نفس الشي والصوابات صوتها مسموعه ، وبلحظة وحدة ام فخري شالت سطل الماي االبارد وكلبته فوكاهن خلتهن نزززن ووحدة تركت الثانية وصارن يتلف*ن منا ومنا ويرجفن ميتات برد وثبتن نظراتهن على ام فخري .. الي بدورهه كلتلهن يلله خلصت المسرحية روحن بدلن .. بعد هاي العركة زادت مشاكلهن وصار البيت بس مشاكل وماينطاق قرروا عائلة عمي المرحوم ابو عياش يطلعون من البيت بعد ما بنوا الهم بيت بصف البيت الي كاعدين بي احنا وماتفصلنا عنهم بس ١٠٠ متر تقريبا حتى سياج مابيننا .. وبهذا ارتاحيت من عياش وصار قليل اشوفه كلش ومن يجي لبيتنا ما اطلع .. ارتاح راحة مو طبيعية من خله البيت منه وماخذة راحتي بي .. انتقلت ويا امي كعدت بوقت الدوام وايام الجمعة والعطلة اروح لبيت ابوي وتجي يمي وردة تبات يمي وندرس .. يوم الخميس اخر امتحانات نصف السنة العصر رجعت لبيت ابوي .. وصرت بين هنا وهناك وابوي مايكول شي خطية يسمحلي ومرت ايام وراحت ايام خلصت السنة ونجحت من الثالث و انتقلت لمدرسة اعدادية غير الي جنت بيها واغلب ايامي يم امي بس بداخلي مامرتاحة خايفة لايجي يوم وابوي يزوجني لعياش بقيت قلقة وميتة خوف .. بيوم جنت يم امي دك تليفوني شفته حازم كال بيبيتي ماتت وسداه بسرعة .. لطمت على وجهي وركضت لامي ابجي ... يمه بيبيتي ماتت .. ظلينه نبجي انه وامي كتلها يمه امشي خلي نروح للفاتحة مسحت دموعها كالت انه حالفة ما اخطي ذاك البيت بعد خابري على وردة بت خالج خليها تروح وياج ركضت على التليفون خابرت وردة وابجي وردة تعاي لبيتنه عفية ولج بيبيتي ماتت اريدج ترحين وياي لبيت ابوي بيبيتي ماتت ما اكدر اروح وحدي تلكيها الدنيا مكلوبة هناك .. _ يا الله يرحمها هسه بس دقايق واجيج _ لبسي اسود خوش _ خو ما اجي بالاحمر .. سدته وانه رحت لبست اسود وحضرت عباية وكعدت انتظرها ، ربع ساعة واجت خذيتها وطلعنا ، بس فتحنا باب الشارع شفت سيارة حازم يم الباب .. نزل الجامة وطل منها :- السلام عليكم وردة شلونج ؟ جاوبته وردة :- عليكم السلام هله بيك حازم البقية بحياتك .. _ حياتج الباقية يلله صعدو صعدنا بسرعة اثنينه بالورة ، مديت راسي ؛- اكلك حازم شو ماكلت راح اجي عليج جرتني وردة من كتفي :- هسه مو زينة منه من اجه بعد شنو هالسؤال .. ظليت اباوعلها ورافعة طرف شفتي العلوية وتك حاجبي موكلينها دفاع حضرتها فريت ايدي وغميتها . اجه صوت حازم مستبشر :- اي يا وردة بس انتِ تفتهمين عليه . جاوبته وردة ؛- تدلل حازم بخدمة الطيبين احنه ومبتسمة .. انه عين عليها وعين عليه اخر شي استقريت بنظراتي عليها فاتحة حلكها وتضحك وتباوع ليكدام .. طكيتها على چتفها نزت وارتفعت چتافها تباوعلي بفهاوة .. _ ترة رايحين لفاتحة احنه مو ظلين فاتحة حلكج ومسلهمة .. حازم ؛- على كيفج ويا البنية ميسم شسالفة ترة بعدنا ما وصلنا للفاتحة . _ اكلكم ليش ماتنزلوني هنا اروح اكمل مشي وانتوا اخذو راحتكم . حازم :- تسوين فضل والله كالها وهو يضحك ، وذيج هم تضحك ، ظليت افر بيدي شبيهم ذوول .. وصلنا يم باب بيت ابوي ، الدنيا مكلوبة صايرة كولبة ماباقي احد ما جاي بسرعة نزلنا من السيارة ودخلنا جوة ، الكل موجود والصريخ والبچي سيد الموقف كعدت ابجي وياهم واتذكر سوالف بيبيتي ماشفنا منها اذية بالع** مرة كلش طيبة وحكيمة وما أذت احد .. جابو التابوت زوروها بيتها لاخر مرة ونقلوها لمثواها الاخير .. صار مغرب وردة ندستني :- ولج تأخرت هسه ابوي يحجي عليه .. _ انه ما اروح خلي اشوفلج حازم بلكي يوصلج _ ولج استحي بس وحدي اروح ويا مططت شفايفي ورفعت عيوني للسكف في حركة هازئة :- لعد منو الي يدافعله بالسيارة ومسويها ويا دبس ودهن .؟ طكتني على ركبتي شبيج ترة بس كدامج خليت وكمت كتلها رايحة اشوفه الج وينه حتى يوصلج _ خوش روحي وانه طالعة برة اتانيج وها كليله خلي يذبني يم بيت عمتي وانه اروح لبيتنا خاف ابوي عمامي اخواني يشوفوني وتصير مصيبة .. هيه طلعت وانه رحت ادور على حازم بغرفته مالكيته طلعت بره للكراج شفته واكف يم السيارة وبيده السويج مالته ووردة لابسة عبايتها مالة الراس و واكفة يمه صايرين مثل رقم عشرة بالانكليزي هيه مثل الصفر وهو مثل الواحد هيه دبدوبة وگصيرة ، وهو طويل وضعيف .. واكفين وواحد منجذب للثاني هيه تحجي ومبتسمة وتدنك وهو صافن عليها ومفترسها بنظراته يربي هذول شجاي يسوون بس لا يردون يرتبطون صدك يحجي حازم ؟ شنو نسى المشاكل الي بين اهل ابوي وبين اهل امي ؟ انه شون اتصرف هسه ؟ زين ليش اسبق الامور هما هسه مابينهم شي .. رحت وتقربت منهم :- ها ولج وريدة انتي هنا لمن شفتي حازم غير ترجعين وتكليلي شفته لا تدورين . _ شفته لو برطمته ؟ وظلت تضحك هيه وحازم _ ترة بايخة ماتضحك .. واثنينكم تافهين ... ظلو واحد يباوع للثاني ويضحكون ، ظليت افر بيدي دخلت وردة بالسيارة وكعدت ورة وحازم حرك السيارة وطلعها من الكراج . بقيت الليل ببيت ابوي بس ماشفته اجه ونمنا وكت وكعدت يوم ثاني من الصبح ودك شغل .. صاحت عليه بنت عمتي وبيدها جدر جبير كلش ناوشتنيا وحجت بتذمر وبنبرة هجومية _ هاج غسلي ع السريع محتاجته ناولتني الجدر بقوة واخذته منها بتعب .. طلعت برة وره المطبخ اخذت جلافة وبديت اجلف بالجدر والشمس تدك براسي ، اجلف وضايجة كلش من معاملة بنت عمتي عبالك خدم جوة ايديها ماعدها اسلوب وذوق ابد .. هسه ندري فاتحة ثكيلة وهيه لازمتهه بس مو هيج تعاملنه واحنا مامقصرين بشي ادردم واتأفف والشمس سمطتني سمط والرغوة مالة الجلافة وانه افرك تطفر عليه ، علما غسلته طلعت روحي من خشمي ورحت وديته الها وهيه بالمطبخ .. المطبخ هوسة ماكو مكان احط رجلي بي ، متروس بنات يشتغلن وجدورة وبريمزات جاي يطبخون عليهه طلعت من المطبخ ، احس اختنكت كلش وهوسة .. طبيت بالهول هم متروس نسوان اذا ينشمر الملح مايبين ... وانه جاي ادور على مكان اكعد اجر نفس بي واشوف فخرية .. شفت ام فخري تأشر الي من بعيد ، ظليت اشبخ بالنسوان واريد اوصل الها ، وهاي الي ادوس على ايدها وهاي ادك براسها ماادري وذيج الي ادوس على عبايتها واتبسم الهن واتعذر .. لحد ما وصلت لام فخري جرتني من عبايتي الاسلامية هيه جرة وهيه كعدة وهيه طيحة ، كرفصت وكعدت يمها .. كالت ولج مصخمة شعدج تتبسمين مو فاتحة بيبيتج فاتحة الحلك من الذان للذان بحلكج فجوج ذهب وتردين تراوينهن .... سكتت واباوع الها وكاتمة ضحكة ... كالت جاوبيني بحلكج فجوج ذهب ؟ كتلها لاع .. كالت ووشلاع يشلعج من السمه للكاع .. اريد اطكها ضحكة كرصتني بفخذي كرصة قوية خليت ايدي على حلكي اكتم ضحكي وصوتي وانه اتألم .. اجن نسوان يمها وانه اريد اكوم جلبت بهدومي وماتخليني اوخر.. كلولها يلله ام فخري يلله خية كومي اكليلج لكمة .. كالت ؛ لا ابد مايدخل الاكل لحلكي واختي كبرها خضر(اخضر) .. وحدة من النسوان كلتلها ؛ خية هذا كله مايرجعها اندعيلهه بالرحمة واقري الفاتحة على روحها يلله خية كومي اكلي .. خذت طرف فوطتها وخلته على خشمها عصرته عصر ومنا هو مدبدب جنه فلفل ابو خنفورة ( فلفل بارد ) .. وظلت تتصنع البجي وتسوي صوت ئهي ئهي اختي راحت وعاف*ني ولج خية المن عفتيني ولج خية يردني اكل وانتي جوة التراب .. تحجي وتسوي روحها تبجي وانه اباوع لعيونها ولا دمعة طاحت منهم .. صيحت ع النسوان وهيه عود تبجي ؛ وخرن مني يلله وخرن خلني بحالي اريد ابجي على اخيتي .. كامن النسوان وظلن يحجن ؛ اي حكج خية امشينه نروح عنها خطية احسللهه ظل وحيدهه .. جرتني وظلت تهمس بأذني كالت ؛ اكلج شطابخين اليوم ؟ كتلها ؛ مطبك مرك أأأ مطبك لحم .. كالت وثول حجايتين مادبرتيهن ... ظليت اباوعلها .. كالت بحدية ؛ باعي ولج اريدج تاخذ*لي فد بلم بي تمن ومطبك وكثريله حشو .. كتلها ؛ الحشو مابقى بالجدر كله خلو ع التمن وبالصحونة .. طكتني على جتفي كالت طبكيلي بلمين سوة وكثريلي حشو .. كتلها خوش بصدمة .. كالت وبعد مرك مامسوين ؟ كتلها لا ماكو .. كالت ؛ سوب مال لحم هم ماكو ؟ _ اكو .. _ روبة بطل لبن وخضرة زلاطة وطرشي وبصينية وصعديهن فوك لغرفة الحجية بس لا احد يدري الي املص ذاناتج وابقز عيونج والله اذا احد درة .. اريد اكوم رجعت جرتني ولزكتني بالكاع كالت ؛ وهم اذا فواكه حلاوة وراس بصل هم كشريلي وخلي وياهن .. هزيت راسي وكلت خوش ونفس الشي شقيت طريقي بين النسوان ورحت للمطبخ سويت نفس ما كلتلي واخذت الصينية وصعدت فوك ، فتحت الباب الضوة طافي والبردات ثخينة وضوة الشمس مامخترقهن .. ويه ماطبيت دك تليفوني خليت الصينية بالكاع ودرت على نقطة الكهرباء فتحتها وبعدني دايرة ع الباب ، رفعت عبايتي الاسلامية ليفوك وطلعت التليفون من جيب البنطرون .. باوعت شفت امي تتصل جاوبتها ... هلا يمه شلونج ؟ _ ها ميسم متصلة عليه ؟ _يمه شسالفة غير فاتحة بيبيتي زحمة من ابوي عشرة عمر هاي تعاي تخلفيله .. _ ما اجي كتلج انه حالفة _ خوش جا بكيفج محد مفتشل غيري انه الكل يسأل عنج وسديته .. رفعت العباية وخليت التليفون بجيب بنطروني ، تصنمت حسيت اكو شخص وراي يحوس .. التفتت وانصدمت بعياش كاعد ع الجرباية .. لابس قميص اسود وفاتح الدكم مالاته كلهن وجوا القميص كيمونه بيضة ، مخلي ايده على وجهه ويباوعلي ويفرك بلحيته ومنعس .. انصدمت ونزلت عبايتي وظليت اعدل بهدومي واباوعله بصدمة حجيت ؛ يمممه هاي شبيك خوف*ني .. انصدم من النبرة الي حاجيته بيها لان ماجنت احجي ويا هيج من كبل .. حجه وهو منعس وايده على راسه ؛ كال خوفتج مو ؟ بلله شكلتي لروحج من سويتي اقتحام فتحتي الباب وسفطتي الصينية ع الكاع بكل قوتج وشعلتي الضوة ونوب ما اكتفيتي ظليتي تلعلعين بالتليفون وتكولين خوف*ني وانه نايم وماصار جم ساعة من اجيت من دفن بيبيتي ؟ جاوبته بارتباك ؛ وانه شدراني بيك هنا ما ما ماشفتك شجابك هنا.. احجي وايدي على مقبض الباب .. كال ؛ ما شفتيني رجال طول بعرض ولج جرباية ام نفرين مامكفيتني ، شنو كدامج انه نملة وماتشوفيني.. ظليت ساكتة واحجي بداخلي حييل صار شكد ماشايفته يمكن سنة واخر مرة يمكن شفته دقيقة مو اكثر والكبلها ماادري يمته ؟ كام نزل من الجرباية وكابل الاكل وتربع وكعد يريد ياكل .. كال بسم الله وشكل رداناته .. كتله بذعر ؛ اوكف اوكف هذا اكل بيبيتي ام فخري .. رفع راسه عليه يباوعلي كال ؛ فختية ؟؟ معليج موزين عليها الاكل توه اختها ميتة .. انفتحت الباب وطبت فخرية لابسة دشداشة سودة كودري كطمة طالع شويه من سيقانها لانها كلش طويلة وضخمة.. والدشداشة مابيها عرض كلش كصتها كصة جيس الطحين ، لابسة عصابة على راسها وفوك العصابة لافة فوطة مسويتها جنها عمامة بس ارفع من العمامة.. هيه طبت وصاحت ؛ حلاااااال دم الغزااااال شجاي تسوون ولكم؟؟؟؟ ... يتبع ..

Free reading for new users

Scan code to download app

App Store Google Play

Facebookexpand_more