خطوبة

4264 Words

#أرهنتُ_ عمري الجزء السادس^^^^^^ نورا ناصر ... كيف يُمكن لشخص واحد أن يكون حُباً وأذى في نفس الوقت؟ ☆☆☆☆ باوعت شفت ايدي على ايد عياش ! بمكان ماالزم سياج الحديقة .. رفعتها بسرعة وخليت ايدي على حلكي وغصت بنص النسوان ورحت للجهة الثانية وجسمي يرجف من فوك ليجوة .. واتمتم وادعي ياربي كون ماحس بيه انه لا شلون ماحس وهو جان يباوعلي ! بس لا ماشاف فخرية وهيه تدفعني شون اذا ماشافهه وشنو من نظرة راح ياخذهه عليه ، وهسه شيكول ، شكول عليج ام فخري .. لحد ماوصلنا للسيارة وعيوني ع الارض ، دحست روحي بسرعة وصعدت واحس مختنكة .. فتحت الجامة وظليت اشتم هوا واشوفه تعدى من يم السيارة الي انه بيها .. كبل جريت البردة الي مخلينها ع الجامة وخليت ايدي على كلبي اريد اهدأ نبضاته العنيفة الي اخذتني اخذ وتض*ب على اضلاعي بقوة .. ركبن النسوان بالكوستر وصارت دحسة دحيسة وحمدت الله وشكرته لان حصلت مكان .. سمعت صوت ابن عم ابوي واكف بباب الكوستر ويصيح ؛ منو منكم تروح لليوگن مالة عياش بيها مكان فارغ ... بس سمعت هيج نزلت راسي جوه الكشن وختلت بس لايصيحولي اروح .. راحن نسوان وحركت الكوستر وانا جريت نفس براحة .. وصلنا للنجف زرنا الامير الامام علي عليه السلام وبعدها توجهنا للمقبرة زرنا الاموات وقرينا قران وصلينا .. قررو يروحون لكربلاء رأسا مايباتون بالنجف .. طلعتلهم ام فخري لفت عبايتها على كرشهه ورافعة اصبعها السبابة وتهد ؛- والله فلا ابقى هنانه دقيقة هسه تودوني لكربله شعندي باقية بالنجف اول وتالي راح اندفن بيهه واشبع شبع منها واذا ما خذيتوني اروح ابحدي .. بقت مبسطة بنص المقبرة وماتقبل تكوم معاندة والغضب محتل كل ملامحها .. الى ان رضخوا لطلبها واستجابوا الها .. وانطلقت بينا السيارة لكربلاء ... وصلنا لكربلاء بالليل كالو باجر نزور رأسا رحنا على البيت بكربلاء البيت صغير مكافنا كلنا واحنا عشيرة قسمونا قسمين جماعة راحو للفندق وجماعة بقوا انه رحت ويا خواتي زمن ولمياء للفندق ... وصلنا للفندق هلكانيين من التعب صلينه وانه نمت حتى بدون عشه ، يوم ثاني بس اذن الفجر توضينا بالفندق ونزلنا رحنا صلينا صلاة الفجر بالامام وقرينا قرأن والدعاء ورحنا زرنا العباس عليه السلام وصلينا بي وقرينا دعاء ، طلعنا منه مرقد العباس عليه السلام ورحنا للسوك اخذنا ريوك **ون ، كيمر وجاي وكعدنا نتريك ، افترينا شوية ورجعنا للفندق ارتاحينا شوية وكالن يلله ننزل للسوك طلعنا من الغرفة شفت سعيد ابن عمي رايح كبل ، وصلنا للمصعد تذكرت جزداني الي بي فلوسي نسيته بالغرفة اخذت مفتاح الغرفة من زمن ورجعت اجيبه واجي من رجعت شفت زينة مرة حاتم تمشي وتتلفت وراحت باتجاه المكان الي راح بي سعيد جيت اصيح عليها اكلها بس لا متيهة اتجاه غرفتها منا بس مالحكت عليها ورأسا تبعت خواتي ... بقينا يومين بكربلاء وبعدها اخذونا لبغداد زرنا الامام الكاظم ، وهناك صاح عليه ابوي واخذنا انه وحازم وخواتي وبيبيتي فخرية لبيت عمي ابغداد .. وصلنا لبيتهم واستقبلونا .. عمي ابو اسعد بس شافني اجه يمي وخلى ايده على راسي يبوعلي ومبتسم _ هاي ميسم كبرانه اشو ماشفتها بفاتحة امي ماجيتي سلمتي عليه ؟ جاوبته بخجل ؛- والله عمو جنت جوة وعدنا خطار هواي ... جاوبه ابوي ؛- هيه ميسم كلش خجولة تستحي عمي؛- انه عمها لاتستحي ولا تخجل ولج ظليت عدكم اسبوع وماشفتج ... _ ان شاءالله عمو ع جايات ... ابوي؛- يله هسه هيه تعنتلك لبغداد واجت تسلم عليك ... ضحك عمي وكال هذا هو مسامحها... دخلنا جوة بالصالة مالتهم وابوي وعمي وحازم ظلو بالاستقبال ... اجت عيني على صورة ولد شاب معلكة بالحايط ماشايفته من قبل او شايفته وناسيته ، سرحت بنظراتي عليه ، صفنت بي وبملامحه احساس غريب شدني اله حسيت نبضات قلبي اختلفت بعد هاي النظرة .. لحظات ووعيت على نفسي اني بحكم المنهي عليها ومقيدة بقيود شخص ثاني مكعديني لعياش مايحق الي احلم بأي شخص او احب احد ... اجن بنات اثنين سلمن علينا وحدة على ايدها طفل والثانية حامل .. مرة عمي ؛- هذول جنايني ... فز قلبي من مكانه رجعت نظري على الصورة ، يعني هذا الي بالصورة متزوج ! رجعت بنظراتي عليها هيه اشرت على الي بيدها طفل كالت هذه شهد زوجة اسعد .... واشرت على الحامل كالت هذه سارة زوجة رأفت .. دنكت راسي واكول همزين طلع متزوج احسن حتى لا اظل افكر بي اكثر .. مايحق الي افكر باحد واتعب نفسي .. بعدها طلعنا من يمهم اكو بايات يم الباب جاي اريد انزل وجان تزلك رجلي واتسرسح لابسة فلات ويزلك والارضية جنها سيراميك بعدني اريد اطيح انلزمت من واحد ماباوعت بالبداية بس هو لزمني من ايدي قوي .. فشلت وخجلت كلش وكفت واعدل بعبايتي واسمعهم يحجون ويا ويكلوله سيف باوعت عليه نفسه الي بالصورة ياالله اريد بس اسيطر على نفسي يعني هذا سيف اي اتذكر عندي ابن عم اسمه سيف هسه يلله تذكرت .. ظليت اراجع ذكرياتي ، مرة عمي كالت اسعد ورافت يعني سيف مامتزوج ياربي احس الفرحة تشع من عيوني وقلبي ينبض بقوة للحظة اريد الزمه بيدي واهدأ من روع نبضاته المجنونة .. ظل يحجي ويا ابوي وحازم ومبتسم وانه اتلصص عليه واباوعله وادنك وهو مندمج يحجي ويسولف .. طلعنا منهم ورجعنا لبيتنا وانه طول هاي الفترة ماكفيت بس افكر بي وبنص تفكيري اشوف عياش كبالي وانقهر وابجي ..... ____________ سيف ... واكف كبال المراية عدلت رباطي ولبست سترتي وتناوشت مشط من ميز التواليت وكملت تصفيف شعري .. اليوم حفلة عرس اخوية ودنحضر نفسنا نروح للقاعة باوعت لابن خالتي الحمش متمدد ع السرير وديزحف لوحدة بالتليفون ويخابر.. سمعته يكول الها _ والله اني اصير الج ام واب واخ وكل شي .. توقفت عن التمشيط وباوعت لصورته العا**ة بالمراية ضحكت بسخرية كتله . _ شعنده دار الايتام . باوعلي بخزر واشرلي اسكت لتسمعك . رجعت امشط ب*عري واغني . لحد ما جهزت كل شي وهذا بعده يخابر ويزحف تزلغت ركباته من الزحف . اخر شي لبست ساعتي ورشيت العطر . والتافيت اله . كتله ولك كوم رائد تأخرنا واسعد وصانا نروح نجيب العشا ونودي للقاعة .. سوالي حركة الصبر ورجع كال الها _ حبيبتي انطيني افرصة املي عليج فراغج العاطفي .. كتله : لك انت املي الفراغات الي بلحيتك الوصخة وبعدين امليلها فراغها العاطفي . تقربت عليه سحبت التليفون منه وابتعدت بسرعة وحاجيتها اكولج انت منو منهن وردة سمر لو منى تاهت علينه هذا ابن خالتي يومية وحدة شكل . رائد :- لك شسويت اغم صارلي اسبوع راسم عليها خل اشوفك شراح اسوي بيك اذا ارتبطت . باوعت اله وخليت تليفونه على الميز كتله ارتباط شنووو اني كل طلعة انعجب ب٦او ٧ بنات وارقمهن!! كال ارتباط كال ، يلله كووم اغم ديلله خلص والبس انتظرك برة . عفته يدردم ويغلط عليه طلعت من الغرفة صار بوجهي ابوية صاحني تعال سيف سلم على عمامك هسه اجوي من الجنوب .. _ صار يابه . نزلت جوة صوت الديجي يصدح والبنات يركصن وخالاتي يهزن هز جنهن غسالات خربانة . صرت بنصهم سحبتني بنت خالتي هند ورادت اركص وياهم . كتله لج فشلة اريد اروح اسلم على عمامي الشيوخ خاف ادخل عليهم اهز ادري بنفسي مااسيطر على روحي. ظلوا يصيحون يوم الالك يا سيوفي يوم للالك ياسيوفي .. كتلهم اشكركم انحنيت شوية وخليت ايدي على ص*ري بامتنان اشكركم بس اني احب ابقى صايع ويومية وحدة ماحب ارتبط . ض*بتني امي على كتفي : لك استحي عيب ... _ يا امي اكو واحد يستحي من الحقيقة والصراحة .. _ دولي ولي ابوك ينتظرك عمامك ديسألون عليك .. _ صااار رايح .. عفتهم وتوجهت للاستقبال .. وكفت بالكليدور كبال المراية عدلت شعري وسترتي والرباط . ودخلت على عمامي . كلت السلام عليكم . صاروا كبالي بيهم ١٥ نفر حييل هذول لازم اتفق وياهم يحددون بوستهم يمين وله يسار حتى لانطب بما لايرضي الله . تقدمت الهم وظليت اسلم عليهم واحد واحد اني معندي معرفة بيهم لان مارايح الهم من قبل اكثر من ٨ او ٩ سنوات . بس اعرف عمامي واولادهم واسمائهم . كعدت بصف ابن خالي فريد .. واحد من عمامي كال .. شنو سيف شو مانشوفك ابد انت الوحيد من بد اخوانك . سيف :- والله ياعمي مشاغل شنسوي .. _ انت خلصت دراستك .؟ _ اي والله خلصتها صار سنتين . همسلي فريد قريب مني تريد اكول لعمامك الشيوخ بان انت صايع ومكضيها سفرات وطيحان حظ وتروح كل مكان بس لعمامك متروح. قربت منه وهمست من بين اسناني _ استر علينا الله لايستر عليك .. دخل ابوية وكعد .. عمي : ابو اسعد اختار لسيف مرة من بنات عمومته بالجنوب حتى نرجع نلم الشمل مو مثل طيف واسعد خذيت الهم غربة . : ان شاءالله والله اني هم هيج مفكر بس كون الله يهدي ويقبل يتزوج اجيبه واخلي يختار .. ظليت ابلع ريك معقولة اني اتزوج من الجنوب قرب مني فريد وكال راحت امالك يسيوف راحن الاوكرانيات والروسيات الي راسم عليهن وتريد تتزوج منهن اتخيل تتزوج وحدة ملتزمة تمشيك على الصراط المستقيم بعصا تركض وراك ودك كتل . كتله اسكت اسكت شكول لتاتيانا شكول لارينا واني مواعدهن بالزواج .. الله اكبر عليك عمو . نطق واحد منهم عرفته ابن عمي اسمه (عياش) نظرته كلش قوية وشوفته شوفة شيوخ . كال .. اي يدلل المحروس خلي يجي ويتنكى والظفر مايطلع من اللحم .. باوعت اله ببرود .. كتله .. تسلم ووكفت على حيلي كتلهم واني واكف واعدل بسترتي . _ على طاري الزواج اني اترخص . صاحو : مرخوص الله وياك باوعت لفريد تروح وياي نروح نشوف العشا . كام واجه يمي . كال اي الزواج يريد زلم وانت موش زلمة مشيت قبله كتله اسكت لااطفي عينك هسه ، كال زواج كال . وطلعت للكراج وصلت للسيارة فتحت الباب اريد اصعد صاحت عليه امي من باب المطبخ . _ يووم سيف روح ع الكيكة جيبها .. واني واكف ورة باب السيارة كتلها رايح ع العشا اني ، اودي للقاعة .. _ يوم العشا المغرب جيبو احسن روح ع الكيكة هسه ياامي انته ، مو طيف راح يجيب سارة من الصالون تاخرت والكيكة لازم اوديها للقاعة . هزيت راسي بالموافقة . كتلها .. _ صار امي . صعدت للسيارة .. واجه يمي فريد كعد حركتها صار يم الجامة الي بصفي رائد كال ولك خربت عليه التقفيصة وهسه تريد تروح بدوني تفو عليك .. باوعت بوجهه وضحكت بخباثة ، اشرتله يصعد وصعد... من بعد هذا اليوم ظلوا اهلي يلحون عليه اتزوج ويردون اله يخطبولي من بنات عمامي .. واضوج من الحاحهم اخذ جنطتي واسافر وارجع عبالي ناسين السالفة بس للاسف لا .. وهم بعد يلحون وهم اتهرب ... وبيوم اجونا بيت عمي ورى ماراحو صاحني ابوي وكال تعال عندي حجي وياك ... رحت كعدت يمه ومقدما اعرف شنو يريد بس واجب عليه اكعد واسمع اله .. ابويه ؛- عمك الشيخ عزام عنده بنية اسمها ميسم اصغر بناته اريد اخطبها الك ... _ وهسه اني شنو اعرف عنها حتى تخطبها الي ... _ ناخذك لبيت عمك شوفها احجي وياهه وتعرف عليها واكيد راح تعجبك والله البنية كلش حلوة وتنحط بالقلب وبسرعة تنحب وانت اكيد راح تحبها ... _ ماريد يابه ماريد الله يخليك اعفيني حجيت هيج وارتكيت ع التخم بانزعاج وانفخ .. _ لعد شنو تريد ؟ عندك وحدة انت ؟ دليني عليها خلي تروح امك تشوفها ونخطبها الك بس شرط خوش بنية وبنت عائلة ... _ يابه ماعندي والله ماعندي وحدة كل مابالموضوع ما اريد اتقيد بالزواج اريد اعيش حياتي .. كام ابويه على حيله ورفع ايده يهدد ؛- شوف ولك سيف انت ماتمشيني على كيفك هسه انت تخرجت والحمدلله تعينت ومناقصك شي لاتظلي دايح منا ومنا وتجيني بانصاص الليالي اتسويلك م**ورة ابتلي بيك انه شيفكني من الناس وانه ابن حمولة كدامك اسبوع اذا ماجبت وحدة بت عائلة وبت اوادم اخطبها الك تمشي وياي يوم الجمعة الجاي لبيت عمك نخطبلك ميسم .. شون ورطة هاي ظليت ادردم عفتهم ورحت الغرفتي مجاي يقتنعون اني ماعندي وحدة ولا ابالي وحدة ابد ... مر الاسبوع كله استسلمت وقررت اروح ويا ابويه بس من دون رغبة بس اكو افكار مقتحمتني اكول هاي مريم مدري ميسم صغيرة مدري فطيرة ، اكدر اسيطر عليها واتحكم بيها ... عدينا العدة وانطلقنا لبيت عمي وصلنا الظهر دخلنا سلمنا عليهم .. ابويه طلب من عمي يصيح لميسم وصاهم يجيبوها ويجون بس معرفت هيه وين جانت واني بقيت كاعد بديوان عمي الشيخ متوتر تعبان واهز برجليه جاي من مكان بعيد حتى اشوف العروس الي اختاروها الي !!! انتظر دخلتها من هالباب المقابيلي ونظراتي مافاركته وخيالي صار ساعة يرسم شكلها . واتخيل هسه تدخل عليه وهيه تسحل بشداشتها الكودري الي مليانه الوان قوس قزح ، عريضة كلش ومضيعة معالم جسمها . وشيلته الي تشبه شيلة بيبيتي االله يرحمها ويمكن تدخل حافية بلا نعال . تسائلت بداخل نفسي بخصوص و وجهه ؟؟!! رفعت حاجبي باوعت لعمي الشيخ مندمج ويسولف وي ابوية .. اجت عيني على شواربه تخيلت حواجبها مثلهن . ركعت على كصتي بيدي بدون مااخلي احد ينتبه الي رجعت باوعتله .. بشرته سمرة طووخ على زراك واكيد هيه مثله .. شفايفه غليضة وزركة على سواد هزيت راسي وحاجيت نفسي اكيد هيه هم هيج واني جنت احلم اتزوج روسية بيضه كلش جنهه مغسولة بقاصر . ضحك وبينت ابتسامته ابتسامة لثوية واسنانه شي واكعة شي باقية بالرمق الاخير . صريت على اسناني قوي وبهاللحظة دخلت وحدة سمينة كرشها متر ليكدام ومبتسمة ومبين فرك باسنانها كلش واضح اني لااراديا درت وجهي على الباب ادور درب الفلتة منين حتى اشرد ومااخليلهم بس التراب وراية . كام ابويه وسلم على المرة واني اتلفت اريد اتحجج بأي شي حتى اطلع ما احس اله صواب اجاني على كتفي وراهه اجه صوتها الغليظ هاا وليك سيفووو شلونك شخبارك كبران ولك ... بقيت متفاجأ شهالميانة هااي ؟ اهز براسي ومحتار واباوع لابويه واحاجي بنظراتي هيه هاي العروس الي تريدني اخطبها والله على جثتي ..... فاتت بنية وراها واني دا اسلم على هاي صاح ابوي عليها هلا ميسم تعاي بنيتي .. بقيت عين على ميسم وعين على هاي المرة لحد ما رجعت ض*بتني صوواب ثاني صحتني من شرودي وكالت ولك انه اخت بيبيتك خالة ابوك ماعرف*ني انه ام فخري .. ابتسمت بوجهه وعيني على ميسم الي جاي تسلم على ابوي ورجعت كعدت بمكاني وهيه كعدت اشرلها ابويه هذا سيف ابني سلمي عليه كامت باوعتلي ثواني ولمعت بعيونها نظرة عجزت عن تفسيرها بس اجت عيني بعينها بسرعة دنكت .. وتحجي ويا ابويه واني اباوع عليها ، حنطاويه على برونزية ملامحها ناعمة وعيونها سود ، حواجبها طوال وثخان بس بترتيب .. باوعلي ابويه ومن خلال نظراته وحركاته ديسألني شلونها ، انطيته اشارة الاوكي ... اومألي بموافقة وكال يا ابو حاتم بصراحة احنا جايين نخطب بنت بعده ابويه يريد يكمل كلامه ، انفتحت الباب وطب واحد لابس دشداشة نيلي دخل وكال السلام عليكم كمت وكفت على حيلي اريد اسلم عليه عرفته هذا عياش ابن عمي .... أنا لا أكرهك ابداً، لكن دعني أصَيغها لك بطريقتي، لو كنت تحترق أمامَي وبيدي كأس ماء سأشَربه . دخل عياش وسلم علينه ، اني سلمت عليه ورجعت لمكاني هو كعد يم ميسم ، اني جنت اباوع عليها شفته دنكت راسها وظلت تعصر بايديها ولمت نفسها وتحاول تبتعد عنه .. هو باوعلها ودار وجهه على ابويه ؛- اي عمي منورنا اليوم شعجب .. جاوبه ؛- والله هسه توة جنت اريد احجي وي عمك والله يا ابو حاتم اني جاي اخطب ميسم لسيف .... بسرعة انتفض عياش باوعلي وخزرني ورجع باوع لابويه ويحجي بعصبية؛- عمي احنا صدك كنالكم تعالو اخذو مرة من عدنا بس مو تجون تاخذون مرتي .. قبل لا ابويه يجاوبه قدمت نفسي ليكدام واني كاعد كتله ؛- مرتك منو ؟ الي اعرفه انت مطلك وعندك طفل ومامتزوج حاليا ؟ قبل ليجاوب عياش كامت ميسم مدت ايدها لخدها تمسح دمع نزل من عيونها وراحت تركض برة الديوان ... هو باوع عليها ورجع باوعلي وجاوبني بعصبية ؛- لا ميسم مكعدينها مرة الي من قبل سنة صار هالحجي انتوا اكيد بعيدين وماعندكم علم بهذا الموضوع بس ترة ميسم الي ... كمت على حيلي متعصب واباوع لابويه بحدة البنية شبه عجبتني وردتها بس هذا حظي مو اول مرة يخذلني .. حجيت ؛- والله اني شفتها البنية صغيرة مو مال زواج بس لان ابويه مصر وافقت .. عياش ؛- مو انت الي تقيمها صغيرة او جبيرة ... _ الله يهنيكم يلله يابه فضنا عاد خل نمشي ... الشيخ عزام ؛- لابويه وين تمشون انه صدك ترة مكعدهه لعياش صار سنة وجم شهر ... عياش ؛- اذا تردون عمي عيد عنده بنات ، ارتاحو واخذكم اله شوفوهن .. سيف ؛- لا عيوني بطلنا نرجع لبغداد ونأجل الموضوع هسه .. _ اي بس مو هسه ترجعون ارتاحو شويه ماصير توكم واصلين .. ابو اسعد ؛- اكعد سيف اليوم نبقى هنانه اريد امر على اخواني وولاد عمي اشوفهم واسلم عليهم وباجر نروح والبنية مامقسومة الله يسعدها .. ردت ارجع واخلي ابويه بس استسلمت وكعدت .. تغدينا طلعت اريد اغسل اريد اندل مكان المغسلة ماكو مااندلها ظليت اباوع منا ومنا شفت ميسم بالممر وكفت تباوعلي شفت عيونها حمرة ، اشرتلها تجي ظلت تتلفت واجه تمشي باستحياء تنصي وترفع راسها تباوعلي وترجع تنصي .. وكفت يمي مدنكة وساكتة ، سألتها عن مكان المغسلة همست ؛- منا ، فاتت قبلي تبعتها .. وكفت اغسل تريد تروح بنبرة امر حاجيتها ؛- اوكفي لتروحين .. وكفت يمي ومدنكة وتعصر باطراف ثوبها واني افرك بالصابونة سألتها ؛- انت ماراضية بي مو مجبورة عليه صح ؟؟؟ مريم ؟ رفعت راسها تباوعلي عيونها ندية وتلمع همست ؛- اسمي ميسم !! هزيت راسي بموافقة .. العفو ميسم اي هسه جاوبيني على سؤالي ؟ _ انت منو كلك اني ما اريده ؟ _ مجرد احساس ... _ واذا جنت ما اريده او لا او اكرها ماراح يغير هذا شي انه عليه اطيع وبس محد ياخذ رأيّ .. _ اذا تردين اني اساعدج واخلصج منه فتحت عيونها على اوسعها ؛- شلوون راح تساعدني .. باوعت وراهه اجه عياش يمشي باتجاهنا ، من مكانه كال ها محتاج شي ؟ حسيتها ظلت ترجف وصنمت بمكانها متتحرك ومدنكة .. جاوبته من ورى خشمي ؛- لا بس ردت ميسم تدليني ع المغسلة وهاي هيه دلتني وغسلت .. كال ها تمام ، باوع على ميسم ولزمها من كتفها _ امشي ميسم عندي حجي وياج .. باوعتلي بنظرات كلها رجاء وتوسل ، وهو جراهه وراحت ويا ، مشت التفتتلي مرة وحدة وكملت طريقها ويا وتحاول تتملص منه .. حجيت بقلبي الله يرحمج مريم مدري ميسم خطية قهرتني ومبينه صغيرة هذا شكد متوحش ياريت بيدي شي اخلصها منه ... يوم ثاني من الفجر كعدت ابويه ورجعنا لبغداد .. اول ما وصلنا للبيت ابويه فات من باب الاستقبال واني طبيت من المطبخ ، شفت شهد كاعدة هيه وحسوني ابنها .. جيت اطلع بس كم دوب اتشرد خلي افوت اشرب مي واطلع ، توجهت للثلاجة اخذت بطل جرعته كله وخليته ع الميز ، دا اريد اطلع من المطبخ صاحت عليه شهد .. _ سيف شدعوة ع الاقل سلم من تفوت .. وكفت اباوع عليها بسكوت .. _ ترة حسوني ابن اخوك هو طفل شنو ذنبه دشوفه شلون يضحكلك .. تقدمت الها بدون ما اباوع الها جريته منه وظليت ابوس بي .. وهيه تحجي واني ساكت .. _ سمعت بيك رحت تخطب ؟ جاوبتها بدون ما اباوعلها ؛- اي وماصارت .. مردت اباوع عليها بس هيه ضحكت باستهزاء وضوجتني رديت عليها بحدة ؛- اكو شي يضحك شبيج تضحكين ؟ _ لا ماكو شي بس اني شفتها البنية مو ذوقك .. _ لا بالع** البنية كلش حلوة وتنحب وتدخل للقلب بسرعة بس مخطوبة لابن عمي الثاني .. وبعدين انتوا شوكت تشيلون منا ماكملت شقتكم ؟ _ انت ليش تريدنا نطلع منا انت شوكت تنسى سيف ترة الي صار اني مادري اسعد هو اخوك شكم مرة اريد اكولك شسوي حتى تصدكني ... _ اششش نصي صوووتج وهذا الموضوع ماتفتحينه بعد تسدي لا اسد حلكج بطريقتي وبعد اذا تشوفيني بمكان تطلعين منه مفهوم وحاولي تكولين لاسعد ترجعون لشقتكم احسن .. خليت الولد بالحجلة مالته وطلعت من المطبخ رحت للصالة شفت اهلي كاعدين وعدنا طيف اخويه وزوجته واطفاله الاثنين ولد وبنت سلمت عليهم وبوست الاطفال .. كمت اريد اروح لغرفتي صاح عليه رأفت اخويه كال اكعد سولفنا شلونها العروس .. _ مكالك ابويه ماصارت ..؟ _ وانت ليش ضايج يمعود الف وحدة تتمناك اشرتله بيدي بملل ورحت لغرفتي ... ☆☆☆☆ ميسم .. خلصت الامتحانات النهائية وباقي بس استلم النتيجة واذا ناجحة ان شاءالله اروح للخامس وناويه ادخل ادبي لان موشي بالعلميات .. طلعت انتظر حازم بالحديقة ، انفتحت الباب وطبت سميحة وبيدهه مهند .. اجت يمي سلمت عليها كالت اريد اكلج شي انه ارجع لعياش بس ماجاي اكدر احصله لا عندي رقمه ولا جاي اشوفه لان ممنوع يطب لمنطقتنه انت اذا شفتي كليله انه ندمانه واريد ارجع هم لخاطر هالطفل خوش ؟ موتنسين ؟ انصدمت من كلامها كتلها وخالي يقبل ترجعين بنبرة حزن جاوبتني ؛- اصلا هم ضايجين مني ومنا مهند كبر ووكح محد يحمله غير اهله وابوه .. _ والله مادري كرصتني حييل بزندي شنو ماتدرين ولج ترة ادري مكعدينج اله لاتفرحين مرجعه الي ولابنه ... _ انت شتحجين اصلا انه ماريده وماطايقته شلج بهالحجي هذا ؟ _ الي اكلج سوي خوش ؟ وظلت تكرص بيه بايدي دفعتها وخرت عني وطبت جوة .. اجه عليه حازم طب سلم على امي وظل يدور كال وردة وين ؟ جاوبته ماجايه هاي بس سميحة هنا .. كال يله امشي بانزعاج .. مشيت وراه ورحت ويا لبيت ابوي ، دخلت للبيت شاف*ني فخرية كالت ها ولج منين جايه؟ _ ها من يم امي ... --اي ولج اميسم شلونها امج المصخمة الحقيرة الادبسز؟ --بيبي هذا كله سؤال عن امي لو ماسائلة عنها احسن .. -- بيبي !!!شنو هازة كاروكج يلمصخمة مثل امج .. ضوجتني اريد اطب لغرف*ني مدت ايدها لكتفي وجرتني من ملابسي حيل حسيت نفسي طايرة بالهوا وانه بيدها .. كالت تعااي وين طابه عمج اسعد بالديوانية يريدج تسلمين عليه .. ابتسمت ؛- عمي اسعد!!! الي ابغداد _ اي جااا منو ؟؟ _ بس اذب عبايتي واجي اسلم عليه فد لحظة .. دخلت ذبيت عبايتي وطلعت .. بقيت بملابسي ، بدي بيجي سادة وبي ع الردان جلد اسود وتنورة كاوبوي وشال اسود .. دخلت عليهم للديوانية اجت عيني على سيف جاي يسلم على بيبيتي فخرية احس قلبي انشرح واحساس غريب احتل كل اعماقي ... باوعلي بتفحص واني باوعتله ثواني ودنكت خجلت .. كعدت بعد ماسلمت على عمي ، وجود سيف وياي بنفس المكان يغمرني باحساس غريب وكأنه الشعور الاول شعور ماقبل شعور ولا احساس ابد ، الى ان دخل عياش ، واجه كعد بصفي ، بلعت ريك وحاولت الم نفسي وابعد عنه ، وابوك نظراتي واباوع لسيف واقارن بينه وبين الي كاعد يمي .. عرفت عمي جاي يخطبني لسيف بسرعة قاطعه عياش حسيت بسيف يهم بنفسه يريد يجاوبه ... اختفت الدماء من وجهي ، اجتهدت حتى لا تبتل رموشي بدموع عيوني الندية ، تركت المكان وانهزمت بسرعة .. رحت للغرفة ابجي ليش هالعذاب لو ماجاي خاطبني جان احسن جان بقيت ما افكر بس هسه راح ينشغل تفكيري بي اكثر واكثر ، لكن يبقى عياش قدري ومحد يكدر يهرب من قدره .. مسحت دموعي وطلعت من الغرفة ، ورحت للمطبخ شفت بيبي فخرية جاي تسولف لزينة مرة حاتم ولمرة ابوي .. فخرية ؛- ولجن فااتتجن العركة الصارت ؟ كالولها ياعركة ياستار ؟ _ عويشو وسويفو تعركو على هالمصكوعة هاي وتأشر عليه .. فتحت عيوني على اوسعها من فرط الصدمة والذهول تعاركوا عليه معقولة ؟ صح بيبيتي فخرية تجذب بس ماكو دخان بدون نار خاف صدك متعاركين بالحجي .. بقيت استمع الها ؛- هذا سيفو يكله انه اريدنها الي اتزوجها وعياش يكله انجب انه كبلك حصلتها .. ام حاتم ؛- قابل هيه طوبة وكبله حصلها يا ام فخري ؟ _ انوب يا حنينة كوم سيف واركع عياش بالكاع شمره شمر كوم ياعياش طلع المسدس من جيب البنطرون .. ميسم ؛- عمه عياش من طب للديوانية جان لابس دشداشة مو بنطرون .. دفعتني من زندي ، ملت ع اليسار وجيت اطيح وهيه كالت ولي شمدريج انتي مو طلعتي تركضين وانه صارت العركة كدامي ... زينة ؛- اي صدك انه جنت يمهم ابيت ام عياش وشفته لابس دشداشة وكال رايح لبيت عمي وطلع من بيتهم خو مابدل كدامهم بالديوانية ياعمة ام فخري .. فخرية ؛- شنو يعني انه جذابة ؟ ها ولللجن مو صوججن صوجي انه متعبة نفسي وكاعدة اسولفلجن ظلت تغم بينه وطلعت من المطبخ ... زينة كالت هسه لو اجذب عدل لو لا اجذب ماينلام الي سماهه ام فخري هواي تجذب .. ردتها ام حاتم ؛- عيب زينة تبقى مرة اكبر منج مايصير هيج تحجين عليها .. خليتهن وطلعت من المطبخ .. امشي بالبيت وقلبي يوحي لعقلي بان اصدك كلام ام فخري رغم مية مرة مجذبة عليه ، احاول اصدك انو سيف متعارك عليه ويا عياش .. بس من شفت سيف ووكفت ويا ع المغسلة ومن خلال الحديث الي دار بيناتنا عرفت انو سيف ممكن يساعدني بس شلون ما اعرف !! وابوي مستحيل يتراجع بكلامه ويتنازل عن وعده .. شافني عياش واكفة يم سيف اجه اخذني ويا طلعنا برة بالحديقة ، جريت ايدي منه شتريد عياش .. حجيت بانزعاج شديد .. تقرب باتجاهي شعندج ويا واكفة يمه ؟ دليتي ع المغسلة رجعي منين ماجيتي ... نبرة العصبية بصوته خلتني اصر على اسناني لحتى اكبت اي رد غاضب ، تذكرت ابوي من يكول اخذي بالسياسة .. كتله عياش اليوم شفت سميحة وتكول تريد ترجعلك انت رجعها الك احسن خطية مهند طفل ويحتاجك .. _ لاتغيرين الموضوع ميسم وسميحة لو يصبونها من ذهب ماارجعها بعد ومهند بس يقبط سنتين من عمره اجيبه يمي وخلي تفيدها قلة احترامها ول**نها الطويل .. وان شاءالله انت تصيرين امه لمهند ... _ عياش انه ما ارهم الك انت جنت رجل بت خالي وهذا الشي يسوي مشاكل ويصير كطع بين الاهل وامي مو قابلة عليك ماتريدك الي .. _ اكص خشمها اذا تتدخل والله كليلها هالحجي وخلي تخلي ترجيه باذنها... اذ*حها والله ومايرفلي جفن ... _ لا تهدد ولا تحجي على امي انه اكرهك عياش اكرهك وظليت ابجي بحركة والم ...... هو تقرب مني وظل يهدأ بيه ... كال ميسم انه احبج وماريد اخذج غصب عنج تقرب عليه وركز بنظراته على وجهي .. كمل ؛ والله ربتلي عله شادة حرابة وياي وحادة سنونها عليه على يا مال والله ما ادري ... هسه ياريت تمد ايدها وتلمس كلبي وتجيس حرارته المشتعلة بعشكج .. _ خلي تاخذ عيني گبالج وتشوفج بيها خلي تاخذ گلبي وتتمشى يمج وخل تحسب دكاته عليج .. انصدمت من حجيه ظليت اباوعله مستغربة مسحت دموعي وضحكت غصب عني عياش يطلع منه هالكلام ؟ هو هم ضحك ؛ أضحكي ، اضحكي جعل محد يضحك غيرج انتِ من تضحكين يبتسم جرحي ويبرا ويطيب من حاله والله لو امج رجال جان اعرف اتكابح وياه بس حرامات مرة... دفعته من ص*ره ابعده عني كتله وخر لاتقترب مني حجيت بنبرة جدية ... انت تسوي هيج حتى تريد احبك موو ؟ واقبل بيك بسرعة تريد ت**ر خشم خوالي وامي بيه تريد تنتقم منهم وترضي غرورك صح ؟؟؟ شكلك خذيت بتكم غصب عنكم ..... _ شوفي انه ما اتنازل عن املاكي خليها ابالج هاا ... وانت تسميتي بأسمي يعني الي مفهوم ؟ لاعبالج اخليج تروحين لهذا المايع ... _ مووو مايع .. حجيتها بلا وعي ... وهو انعدمت الرحمة بعيونه .... يتبع ..

Free reading for new users

Scan code to download app

App Store Google Play

Facebookexpand_more