خيانة

3230 Words

ارهنت عمري الجزء الثامن بارت ٨ .. اصنع لنفسك يومًا لطيفًا، وأغلق الأبواب التي تفسد مزاجك ? انه كلت هيج بعفوية وبلا وعي وهو انعدمت الرحمة من عيونه ، ميل نفسه عليه باوع بعيوني بنظرة عميقة شلت حركتي شل ، مد ايده لوجهي وعصر خدودي بيد وحدة .. _ شووو تدافعيله ولج ؟؟؟ طلعت منه هذه الجملة بقسوة ووحشية ونبرة مرعبة.. ظليت اهز راسي اله بمعنى لا وابجي ودموعي تطيح على اصابع ايده الي لازم خدي بيهم .. بعدها رجعت ملامحه طبيعية ، رخه ايده من على وجهي ليحولها الى لمسات ناعمة يمسح بيها دموعي مرة ويتلمس بشرتي مرة .. ويحجي لاتبجين لاتبجين عمري ان شاءالله خلال هالشهر نتزوج .. عباله ميتة على الزواج منه وجاي ابجي عليه ، دفعت ايده ورفعت اصبعي باتجاهه بتهديد .. وحجيت ويا بنبرة كلها حقد ؛- لا تجيسني ولا تحاول دير بالك اني بعدني مو مرتك حتى تتحكم بيه .. انتجى ع الحايط وجتف ايدينه كال مصيرج الي انه قدرج وانه نصيبج شكد تردين تتهربين مني انت الي .. صريت على اسناني بقوة رمقته بنظرة كلها كرره وتلاشيت من كدامه بسرعة البرق .. دخلت للبيت اندب حظي ، جاي اكره عياش اضعاف كرهي اله بالسابق .. خابرتني امي ماجاوبتها لان جنت جاي ابجي وماريد اضوجها .. دزيتلها مسج كتبتلها بي عدنا خطار وهوسه بعدين اخابرج .. لحد يوم ثاني راحو بيت عمي ابو اسعد وخابرت امي وحجيت وياها .. _ يمه امس جانو عدنا بيت عمي ابو اسعد من بغداد واجو يخطبوني لابنهم سيف .. _ يا صلوات على محمد بنيتي كبرت وصارو يجوهه خطابه .. وظلت تضحك .. _ يمه عليمن تضحكين صدك جذب انت شنو ناسية انه لعياش ؟ _ يخسي ياخذج هالحقير هذا خلي يولي على جثتي ياخذج ، بس كليلي ابوج شكالهم ؟ _ سداها عياش بوجهم وكاللهم بصريح العبارة ميسم الي مكعدينها .. _ وشنو هذا بكيفه يصرح _ شنو بكيفه هو غير ابوي انطاني اله وعياش يكول الشهر الجاي العرس .. يمه انه ماريد اتزوج وماريد عياش يمه رجعيله سميحة مو انت زوجتيها اله رجعيها وخلصيني سميحة تريد ترجع اله هيه كلتلي عفية يمه .. وظليت ابجي .. _ لاتبجين ميسمه انه الليلة اجيكم واحجي ويا ابوج اجيب خالج واجي خوش لاتبجين ولا اخلي عياش ياخذج لو يموت ماياخذج .. _ صخام يمه شسوين جايه الله عليج لاتجين وين ماتوصل خل توصل انه راضيه بقدري شسوي بعد يمه عفية كافي علينه لاسوين مشاكل _ اشش سكتي يلله مع السلامة .. سدته مني بقيت الوب ومحتارة ، ادعي ربي اجعلها بردا وسلاما ماحب ترجع المشاكل .. لليل ورا العشه اندكت الباب وطلع حازم ورجع ويا عياش ، تفاقم شعور الحيرة عندي اجه عياش وراها راح تجي امي وتكب العركة .. ورى ربع ساعة صاحني ابويه ورحت دخلت سلمت بدون ما اباوع لعياش لان منق*فة منه كعدت يمهم .كاعدين حاتم وحازم ومرة ابوي وبيبيتي ام فخري . واسمع لحجيهم ... ابوي كال ؛- بنيتي احنه من سنة اتفقنه انت لابن عمج عياش وانه كعدتج اله وهو اجلها وهسه جاي حتى يخطبج ونتمم كل شي .. سرى التوتر باعصابي بشدة و تملكني الاضطراب والقلق كوة قويت روحي وحجيت اي بس يابه امي ماموافقة انه خايفة تزعل مني امي جنتي وناري ماريد اخسرها .. جاوبني عياش امج شنو ابوج هو ولي امرج .... باوعتله بنظرات كلها رفض وتملكتني رغبة عارمة وملحة اض*به بالطفاية الي كدامه ع الطبلة وافيض دمه واخلص منه شكد كارهته وصايرة ابد ما اطيقه .. ابوي ؛- انه ولي امرج بنيتي وانت مسؤؤليتي احنه شنو اتفقنه يا ميسم ؟ لو نسيتي وعدج الي ؟ ان جان انت نسيتي انه مو ناسي لو تردين تزعليني منج .. باوعت لابوي بعيون كلها دموع واستسلمت لقدري ... لا مفر من حكمك عياش ... هزيت راسي بموافقة .. جرتني بيبيتي ام فخري وهمست باذني راح تعرسين كبلي بخخخت ... باوعتله وبقلبي احجي الي يدري يدري والمايدري .... اندكت الباب ابوي اشر لحازم وكام فتحه .. رجع ويا امي وخالي راضي ، ماعرف شنو جان شعوري بس ميتة من الخوف من الي راح يصير ... سلمو وكعدو بس اشوف الصدمة بعيون ابوي وعياش وواحد يباوع للثاني .. ابوي رحب بيهم وكاللهم اي منورينه اليوم امر خدمة .. جاوبته امي ؛- اي يا ابو حاتم سمعت تريد تنطي ميسم لابو مهند وسمعت بنفس الوقت جاييها خطابة من بغداد ؟ ماجاوبها ابوي جاوبها عياش الي اظلمت عيونه بنوع من العدائية اي وان شاءالله عندج مانع ؟ جاوبته امي بحدية انه ماجاي احجي وياك ولا موجهه كلامي الك جاي احجي ويا الشيخ ولو ادري انت هنا فلا اجي جايه علمود بنتي انه ماريدها تنظلم مثل بت اخوي .. كمت كعدت يم اني اهدي بيها لان انفعلت كلش عياش ؛- وهسه شتردين اكوم اطلع علمودج يعني سمعي ترة بت اخوج (ويأشر على خالي) هيه ظلمت نفسها بنفسها ... تريد تحجي امي خالي سكتها ورد باوع لعياش وكاله احنه ماجايين نحجي وياك اصلا حجينه وياك خلص رد عياش وانه هم ما احجي ويا الحرامية والي مايعرفون يربون بناتهم عدل خالي؛- احترم نفسك لك قندرة عياش ؛- القندرة بحلكك حرام انته جده لابني .... تدخل ابوي وحاتم وسكتوهم بس خالي منفعل ويصيح وكال اذا تحجي على تربية بناتنا ترة ميسم هم بتنا وانت كاتل روحك عليها عياش؛- ميسم بت عمي والنعم من تربية عمي وربت هنا بيناتنا بس باوعلي على تربيتك شوية ... امي؛- والله ماتتزوج ميسم يعياش لو على جثتي افتهمت ؟ عياش؛- والله لكص خشمج اذا حشرتي بزواجي من ميسم امي ؛- ها تهددني ؟ خالي ؛- تهددها ولك ياحيوان تهدد اختي تهدد مرة ماتستحي .. حازم كام من مكانه وظل يدفع بعياش ويصيح بصوت عالي لك عياش تتجاوز على امي امشي اطلع برة بيتنا امي خطار عدنا مااسمح الك تتجاوز عليها ولاتنسى هاي امي .. عياش ؛- اطلع منها حازم مشكلتي مو وياك انت ، خوش؟؟ انه وياهم ... كبت العيطة من جديد وابوي وكف بوجهم وعياش مايسكت حسيت بحقده ماله نهاية عرفته يريد ي**ر خشمهم من صدك .. ابوي رفع ايده وكال انه حجيت كلمة بديوان الزلم وما اتراجع عن كلمتي ميسم العياش وعياش لميسم لاتعبون نفسكم كلمتي وحدة وماتصير اثنين .. امي بنبرة كلها خيبة وحزن والله انت هيج راح تظلمها يا ابو حاتم هذا واحد همجي مايعرف شلون يعامل المرة حتى تنطي ميسم هالبريئة الفقيرة والله بتي تعبي وضناي راح تظلموها .. تبجي وتحجي وخالي يجر بيها ويطلعها من الديوانية وهيه تباوعلي بحزن ودموعها تجري .. اريد اطلع من الديوانية صاحني ابوي كال كعدي رحت كعدت بثقل واحساس الخيبة يعتريني صورة امي وهيه تطلع تبجي مافاركت خيالي .. حجه ابوي ؛- الخطوبة هسه تتأجل مدام صار بيها مشاكل هذا انه اعتبره نذير شؤؤم خليها تخلص السادس وتزوجوا .. حسيت قلبي انف*جت اساريره فرحت بتأجيل محكمة اعدامي او الزواج من عياش .. بس عياش جاوب ابوي برفض لا عمي خلينا نتزوج هسه وخليني اسد حلوكهم كلهم ... جاوبه حازم ؛- ابوي كالك تأجله يعني تأجله اسكت يله لا عبالك امررها الك اليوم تجاوزت على امي وهم تريد انطيك اختي على طبق من ذهب والله لو ما ابوي تحلم انطيك شعره منها بس انه اعلمك.. _ اسكت حازم انت لاتصيرلي رجال براسي حازم ؛- انه رجال وغصبا عنك وعن شواربك مو كدرتك بس ع النسوان ترى اكو زلم تسكتت عشيرة منك وخلي هسه ميسم تكول ماريده اريد اشوف الرجال الي ينطيها الك .... ظلت مرة ابوي تجر بحازم وتمنعه مايتدخل بس هو تملص منها وكاللها شنو مااتدخل يمه هاي امي وهاي اختي .. ابوي؛- حازم شنو هالحجي انت ماعليك صير على صفحة بعدني مامتت ترة .. حازم ؛- شنو اصير على صفحة امي ماتعنيلك بس تعنيلي انه خاف ماعدكم علم .. _ كافي يلله انتهى النقاش الليلة الزواج يتأجل لبعد ماتخلص ميسم السادس ... حازم ؛- هذا اذا جانت موافقة تتزوج ... عياش ؛- انته منو دافعك عليه امك موو؟ _ لك شنو دافعتني انه دفعتني غيرتي على امي واختي محد يدفعني انه ...... ابوي؛- كافي كلت يله كلمن يروح منا ... كاموا على حيلهم وعياش يباوع لحازم وتصاعدت من عيونه شرارات الغضب .. هم جاي يطلعون وفخرية تكول يله طلعو طلعو ، شلوح ملوح كلمن يندل بيته يروح .. ....... رحت الغرفتي بين فرحانة وبين ضايجة وميتة قهر على امي خطية اجت رغم هيه حالفة ماتدخل هذا البيت ... بس كالت تصوم عن حلفانها .. خابرتها فرحانة يمه ابوي اجل الزواج لبعد ما اخلص السادس .... _ الحمدلله بس هذا عياش راح يسكت ؟ خاف مايسكت يا يمه .. _ والله ما ادري بس حازم خوش وكفلنا وكفة... _ بعد عمري عمره والله اليوم صدك ثبت هو ابني .. _ ورا ماطلعتي هم تعارك ويا عياش وزفاه زفه معدلة _ بعد حيلي يستاهل .. ختمتها ويا امي ونمت .. ورى ايام اجاني حازم كال امشي نروح لامي عندي شغلة وياهه .. _ خوش بس ابدل .. طلع ورجع كال وخابري وردة خل تجين همينه _ خوش راح اخابرها .. رحت ترخصت من ابوي وبدلت وطلعت اشوف حازم وين؟ ماشفته يم سيارته وكفت انتظره يم السيارة اجه عياش وكف يمي درت وجهي منه برفض .. كال وين رايحة؟ وانت ليش تسال ؟ خزرني ، خفت وابتعدت للخلف خطوات وتمتمت _ لبيت امي رايحة .. _ حتى تتعلمين منها طولة ا****ن موو؟ _ انه رايحة ويه اخوي ومترخصه من ابوي .. تقرب مني وانه ابذل جهد بالابتعاد عنه ارتفع حاجبه بتساؤؤل ؛- اي مكيفة تأجل العرس مو؟ ترة كلها جم يوم عمي ينسى سالفة العركة وارجع اقنعه ونتزوج هالفترة .. قطبت حواجبي بحزن ، مرر اصبعه على بشرتي يتحسس نعومتها ابتسم بلؤم وخبث وخلاني مدمعة عيوني واريد بس ابجي وراح .. اجه حازم ورحت ويا لبيت امي ، نزلت وهو كال راح اجيب لفات واجي .. دخلت للبيت شفت وردة بالحديقة كاعدة اتاني .. رحت يمها كالت وين حازم وتتلفت وتباوع وراي .. ض*بتها على زندها سوا صوت عالي من كد الشحووم _ ثول سلمي بالاول تسأل على حازم ولا اكلج وين راح خنزرت عيونها وحجت بعصبية ؛- وين راح احجي .؟؟ ضحكت وحجيت باستهزاء ؛- متواعد ويا وحدة ثانية شالتها عبايته من ع الكرسي وحطتها على راسها وهمت روحها تريد تطلع .. جريتها ورجعتها لمكانها بس كووة انجرت ثكيله كلش _ ولج راح يجيب لفات يشبع كرشج بيهن ، جا حبيبته ام كرش شيجيبلها خما يجيب ورد اكيد يجيب بلع .. ابتسمت ورجعت كعدت ع الكرسي وتنفست بارتياح وييه طمنيتي عبالي صدك لو صدك جان اطلع ادوره واسحكه هو وصاحبته .. _ اي هم صدك انت بكد التريلة شوفي روحج شكدج .. _ اووي فديتني كافي حازم عاجبه كل شي بيه والله لو صدك عنده وحده اخنكه خنك .. _ دولي حازم مايدور غيرج اصلا هايم بيج تغشت بالعباية عود سوت روحها خجلانة .. تحسرت بألم ودرت وجهي اجر حسرات سألتني شجاج شبيج بعدج تفكرين بسيف ؟ _ لا جاي احاول انسى بس الي الي نتمناه مايصير النه والي نكرها يكعد على كلبنا ، انه ماراهمة لعياش يا وردة بس كليلي شون راح اعيش وياه اذا تزوجني ؟ _ هسه لاتظلين تفكرين عيشي حياتج هاي الايام وانسي شويه بعدج ماصرتي اله ماعلمتي الله يغير الاحوال ان شاءالله .. جاوبتها بنبرة حزن ان شاءالله .. كالت سكتي البارحة ردت انفضح _ صخام منو يفضحج ولج ؟ _ سجيوه اختي رادت تفضحني بحازم تكل لابوي عليه _ وسجى اختج شمدريها بسالفتج ويه حازم .. _ حبيت افضفض الها الناس يفضفضون حتى يرتاحون انه تفضفض ويهددوني بالسالفة .. _ وانت مالكيتي غير اختج الزعطوطة تفضفضين الها بعدها مامكملة ١٢ سنة طبعا عقلها مو براسها وعلى اقل عركة انت وياها تهددج والمصيبة خاف تفضحج انوب وتعال ياعمي شايلني .. _ولج شسوي هيه نامت من المغرب تعشينا وامي شالت الها عشه على صفحة انه رحت غسلت المواعين وجعت طلعته من الفرن واكلته ... وانه كاعدة اكله دخلت عليه هيه وامي يحجون تكللها امي ضميتلج اكل بالفرن .. انه بس سمعتهم درت الهم ظهري وكملت اكل .. سمعت صوت الفرن تنفتح وامي تكول يا خليته هنا اشوو ماكوو وراها كالت وررررريدة !!! جاوبتها واللكمة بحلكي هااا يممممه _ ولج انت اكلتي عشه اختج ؟ ها جاوبيني ؟ حطيت اللكمة بحلكي وجاوبتها ؛- لا يمه موو انه والله .. _ وتحلفين جذب يالمصخمة ، واجاني صواب على ظهري قووي ... شمدريني انه من اكل انسى كل شي .. ظلت سجى تبجي وتهدد بيه ؛- يا حقيرة يا وردة تاكلين الكباب مالتي وابوي بالسنة حسنة يجيبلنا كباب كاضينها كله تشريب مدري شعاجبه من التشريب بالليل وانام واكعد والكاج ماكلته اله اكول لابوي عليج انتي تحبين حازم وحازم يحبج .. انه ماتدرين شصار بيه من كالت هيج بحيث عصت اللكمة ابلعومي وعيوني ظلت تروح منا وتجي منا عين على امي وعين على سجى .. ركضت امي وسدت باب المطبخ واجت عاضه اصبعها وتسكت بسجى سكتي ولج لايسمعون ابوج واخوانج .. ولج وريدة شنو هالحجي التحجي اختج ؟ جاوبتها يمه والله جذابة وجريت سجى من ايدها وخليت بيدها صحن بي شويه كباب صدك جان نفسي بي بس حتى لا انفضح ضحيت بي هيه خذته وصرخت ولج شمبقيتلي كله ساحكته الله يطيح حظج .. اريد اشرد لزمتني امي كووة من ملابسي وتخزر بيه وتريد مني تفسير لكلام سجى وسجى تحلف لامي انو الي تكوله صحيح اعترفت لامي وكتلها اي يمه احبه بس الله عليج لاتكتليني .. ظلت امي تض*ب على خدها ولج وريدة الهايشة تردين تفضحيني انتي وين والحب وين انت بالاول داري كرشج .. وصفكتني راشدي معدل ... وظلت تحذر بسجى ماتحجي ولا تجيب سيرة لاحد لو تنكتل وتنحرم من المصروف .. وهذا كل الي صار .. ميسم ؛- انتِ ماتعرفين تضمين سالفة ولج مو هاي السالفة بيهه اعدامج ليش تصيرين مطيه ؟ دفعتني وكالت سكتي سكتي اجه حازم باوعت للباب شفته دخل ومبتسم ووردة راحت عليه تركض وتعدل بعبايتها وتلكته من الباب .. هو سد الباب واجاهه يضحك ؛- هلا بالبطبوطة هلا بالكتكوتة .. رحت يمهم والله خطية ظلمته للكتكوت .. هيه كامت دفعتني بجف ايدها وكالت وخري صخلة _ اذا انه صخلة انت هايشة لعد ... حازم ؛- كافي كافي وين كاعدين بحديقة الحيوان ظلينه وحدة تخزر بالثانية حازم؛- اي شونج وردتي شخبارج مشتاقلج ولج بكد رحمة الله هيه سوت نفسها خجلت ودنكت عود .. هو كمل اخخ الله فدوة الهالخدود فدوة الهل وجه يمته ابوسه .. ميسم ؛- صخام حازم انه يمكم عيب مو جنه رحتو زايد كامت دفعتني وردة وانت شعندج يمنه يله دخلي جوا ظليت افر بيدي وهذا اخوي عبالك مايشوفني دخلت جوة يم امي .. دخلت سلمت عليها وبوستها وكعدت يمها بالمطبخ سألتني على وردة جاوبتها يم حازم بالحديقة ضحكت فدوة عصافير حب قصدج عصفور وهايشة ... ض*بتني على كتفي بخفة وضحكت ولج لاتقلدين عليها خطية ينجرح احساسها _ والله ولا تحس لو منا لباجر ... _ شعليج منها عوفيها شو هيه صح سمينة بس حلوة جنها ل**بة .. _ اول مرة اشوف ل**بة دبة ، شو كل العبات رشيقات ثاني شي يمه انه اريدها تضعف خطية ماتشوفينها بس تتحرك شوية تظل تنهاد ومابيه تتنفس هاي وهيه بعدها ١٨ سنة من تكبر شلون ؟ _ ولج معدتها كبرت بعد ماتكدر تعوف الاكل تعودت .. _ اي هم صح اكول يمه خالي ينطيها لحازم لو مايقبل ؟ _ والله هالايام خالج زعلان عليه وانه ماعولت صالحته بعد سالفة سميحة وعياش من ذب الصوج بيه ورزلني وهسه مايخلي امي تجي يمي لان كبل فترة كالي تعاي عيشي وياي بالبيت وخلي هذا البيت نبيعه وكلمن ياخذ حصته .. كتله ياخويه انه ماكدر اجي اعيش عدكم واصير عاله عليكم حبيت العيشة هنا وخلي امي يمي وانتوا كلمن اخذ حصته وزيادة فوكاهه انه هذا البيت حصتي ابوي وصى قبل لايموت وسوالي وكالة بس مالحك يدوره بأسمي وتوفى الله يرحمه .. تصدكين يجي ياخذ امي منا ومايخليها تجي يمي وانه من الوحشة اخابر على فيض يجي يمي بالايام الي انت مو هنا ، وهذا فيض عمامه مو اوادم .. ذاك اليوم اجو **روا علينه الباب من الدك وهذا الحجي الساعة ب ٣ الفجر ، كعدنه من النوم على الصوت .. وطلع طيف يشوف منو واسمع بس الصايح عليه بالباب هذا عمه الخسيس الطايح الحظ يكله بصوت عالي وصياح هرج المنطقة هرج _ انت وينك طايح الحظ ادك عليك ليش ماتجاوب كاضيها نوم مو ؟ بس اكل ونوم مو كتلك عدنه شغل نطلع من الفجر شعندك هنا ؟ خطية طيف جاوبه وهو منعس بس عمي انته كلت الاثنين نطلع محافظات مو اليوم ؟ صاح عليه عمه المكموع بعلو صوته وظل يغلط ويفشر ابن*** ال*** مو لو شايف تليفونك والمخابرات جان حجيت هيجي مصخم الوجه طايح الحظ .. هنا ماتحملته وانه اسمع فيض يصيح على عمه لاتغلط على امي وصوت الراشديات والكتل يوصلني لبست عبايتي وطلعت اهد وناويه اتعارك ويا واطيح حظ حظه .. وصلت يمه وان*ديت بي ياطايح الحظ تغلط عليه كدام بيتي ولك اله اخابر عليك اخواني اخليهم يزرفونك تزرف بس بسيطة .. اجه تقدم خطوتين وجان يلزمه فيض ويتوسل بيه عمي مو هيج عيب .. هو واكف وكباله فيض ويصيح احنا مو خذينا منج بالعشاير بعد شنو تدزين عليه مالج حق افتهمتي ؟ ظليت اصيح عليه ابني وابن بطني والله لو المرحوم عايش جان ماخلاكم هيج تسوين بي عبالك عبد عدكم .. كام فيض طلع عمه بره ويهدي بي ويوعده انو راح يجي بعد دقيقة واجه وسد الباب وراه دخلني للبيت يهدي بيه ، راح اخذ ملابسه وتليفونه والجكاير والجداحة بس راسي وطلع سودة عليه حتى وجهه ماغسله ... ميسم ؛- يمه هذول عمام فيض شرانيين كلش وانه كتلج مية مرة لاتدزين عليه يجيج للبيت هنانه تصير مشاكل انت في غنى عنها .. صباح ؛- نفس حجايتج حجاية خوالج هم دزيت عليهم خالج فائق وخالج سالم وحاجيتهم خو راضي زعلان مااجه ، وخوالج هم كلولي نفس الحجي بس يايمه هذا ابني انحرمت منه صغير هسه خطية يخابرني ويسالني يكلي يمه ضايج اريد اجي يمج ، انه مايهون على كلبي ارده واكله لاتجي شون يصير ارده .. هزيت راسي وخليت شكر بالاستكاين والله حيرة هم صحيح بس خطية فيض عمره ٢٥ سنة وعمه يض*به ويتجاوز عليه هيج والله انظلم هالولد .. راحت امي للشباك ظلت تطل من عنده وتحجي هذول شصار بيهم وردة وحازم شو تأخرو بالحديقة ..؟ يمه جايبلها بلع بلع وكاعدة تبلع .. التفتت عليه وكالت رايحه اصيح الهم .. راحت صاحتهم اجت واجو وياهه .. اخذت صينية الجاي والكيك ورحت للهول خليتهم ع الطبلة ، كامت وردة مدت ايدها على صحن الكيك ، ض*بتها على ايدها ؛- ماتشبعين هسه برة جنتي تاكلين لفات .. وخرت ايدها ، كام حازم اخذ صحن الكيك وانطاه الها _ هاج حبيبتي اكلي اكلي حلي وره الاكل ولا يهمج ... ضليت افر بيدي ؛- بعد بعد خليها ماتطلع من هذا الباب لمن ماتنفجر ... وردة ؛- ماعليج بطني لو بطنج .. ظلت تاكل وتحط بحلك حازم .. حازم ؛- يمه بلكي تحجين ويه خالي اريد اخطب وردة شوفي يوافق لا ؟ صباح ؛- يمه والله خالك زعلان مني هالايام خلي اخذ خوالك واخليهم يحجون ويا علمود هذا البيت لان هم كلولي راح يتنازلولي عن حصصهم ، وعود اذا رضى اخطبها الك تدلل .. _ ليش شبي هذا البيت ؟ _ خالك يكول موقعه زين ع الشارع ومساحته ٤٠٠م اذا نعرضه للبيع خوش يجيب سعر نبيعه ونقسمها بيناتنه وتعاي كعدي عدنا نحطج على راسنا انه ما اريد وصية ابوي ابقى هنا كالي الج هذا البيت بس خالك الله يسلمه مو مقتنع زعل وماعجبه الكلام .... _ يمه والله انه اريد ارجعج لابوي احسن _ اسكت حازم ولا تحجي هذا الحجي..... وفعلا حازم سكت وغير الموضوع .. رجعنه للبيت بالليل انه وحازم دخلنا جوا وانه بس افكر بأمي خطية ولا اكدر اظل كل االوكت عدها هم ابوي يدز عليه وارجع هنا .. من دخلت تلكتني بيبيتي ام فخري ها وين جنتو؟ والله عمه جنه ابيت امي .. ظلت تفر بيدها والله خوش ناس نهار كله تفرفر وانه كاعدة ومحبوسة بالبيت ... _ المرة الجايه لو رحت اخذج وياي عود .. _ وين تاخذيني ؟ _ لبيت امي غير جا انه منين جايه غير من عدها ؟ غمتني ؛- امشي ولي من كدامي توديني لبيت امها انه ماعولت اخلص منها منا انوب اروحلها لبيتها عبالي توديني عرس مطعم زيارة صخام صخمج امداج ... جاي تحجي وترزل بيه وانه اباوعلها واضحك واحنه على هذا الحال ونسمع صوت صياح!!!! التفتت فخرية وراها وكالت الله عركة ... وراحت تركض .. ركضت وراها شفت عفاف مرة سعيد وجهه مخرمش ومزورك واكفه يم ابوي وتصيح يمه وتحلف والله يا عمي الشيخ شفته هو وياهه بالديوانية مالتنه والله بهاي عيني شفته وياهه ومحد جاي يصدكني!!!! يتبع ...

Free reading for new users

Scan code to download app

App Store Google Play

Facebookexpand_more