صراخ

3867 Words

ارهنتُ عمري ^^الجزء العاشر^^ نورا ناصر شجاني وماحضنتك كبل متروح؟ عف*ني وغيبتك صارت طويله شجاني وماكلتلك ألله وياك؟ بقيت أنتظر ليلة بأثر ليله رحت بس من رحت خلصت الدموع وشلت الروح بيدك فرد شيله ونسيت الأبتسامه وفرحة العيد. لأن ضحكاتي بغيابك صارت قليله بعد هم عيني تفرح يوم ملكاك؟ لو جمعتنا صارت مستحيله!! هاي عيوني عمت من يوم الفراك. تكول يمرنه ؟ لو أحنه نجيله؟ ☆☆☆☆☆☆☆☆☆☆☆ بعد سماعي خبر وفاة اخويه .. انتابتني قشعريرة ، انتصبت جراءها كل شعرة تغطي جسمي ، انحدرت الى قعر اليأس ووكعت على ركبي للكاع اصرخ بلا وعي وفاته خلفت بداخلي حمم متلاطمة من الوجع والنتيجة قلب من رماد .. اقسى الاقدار داهمتني ظليت اتجرع الاحساس بالمرارة والضمير المقيد بالوجع ، واندب الحظ الي حرمني من اخويه .. تمنيت ارجع الزمن ليورا بلحظة ، وما ارفض اله طلب حتى لو على حساب حيرتي بين اخونه بنظرة لحبيبة كانت هيه الحب الاول والحب الوحيد والي بعدها اعتزل قلبي الحب ، وبين طاعتي اله وشوفتي اله لاخر مرة .. اتذكر بذيج الليلة بقيت لساعة ١١ برا لحتى لا ارجع واشوفه هو وزوجته بس مادريت هذا اليوم راح يكون اخر يوم بحياته وبعدها راح ابقى سنييين طويلة ما اشوفه ولحد نهاية عمري .. اسعد الخلوق الطيب مو لان هو اخويه ومو لان هو مات بس هذي الحقيقة .. يمكن الله يحبه واختاره يمه شاب وماشاف من حياته شي ولا شبع حتى من ابنه .. رحت ويا اخوتي لكركوك لحتى نجيب الجنازة ، جنه منهارين بشكل مؤلم ، تركنا ابويه تعبان وامي متخربطة ورحنا ، جبنا الجثة ورجعنه لبغداد شيعناه من بيتنه ودفناه بمثواه الاخير .. اما شهد بقت يومين بالغيبوبة وبعدها صحت واهلها نقلوها لمستشفى في بغداد .. وضمو عنها خبر وفاة اسعد لان حالتها ماتسمح .. كالو الها يمج بالمستشفى بس حالته تعبانة وميكدر يجي الج .. حسوني ابنهم الصغير الي عمره سنتين بقى يمنا يم اخواتي وزوجات اخويه .. لان امي تعبت فد نوب على اثر صدمتها بضناهه ، بقت اغلب الاوقات بين البيت والمستشفى واصابتها جلطة .. ☆☆☆☆ ميس .. حيل انقهرت على ابن عمي اسعد رغم ما اعرفه ولا شايفته بس يبقى ابن عمي وبعده شباب وعنده طفل وزوجه .. فكرت باخو سيف وتسائلت بداخلي عن حالته زين انه ليش افكر بي !! وشجابه على بالي !! انه بس تمنيته ، وكلما اتذكره احس بوجع .. أوقات الأحلام تكون على شكل وجع .. وجع لواقع يختلف هواي وجع لأرواح مو كادرة غير تحلم وماتحقق كل شي من احلامها .. وتتمنى كلشي يكون احسن بس يكون احسن وتمشي ايامها على خير .. ... امي اجتها روحه للزيارة وانه لازم ارجع لبيت ابوي اخذت ملابسي وكتبي وكم غرض احتاجهن واريد اروح كالت ها اوصلج ؟ لا يمه تتأخرين انه اروح راح اخابر على حاتم يجي ياخذني .. لان ابوي وحازم ببغداد راحو اربعين ابن عمي .. خوش لعد يوم ديري بالج على نفسج بوستها واخذت اغراضي وطلعت خابرت على حاتم جهازه مغلق فكرت خاف نايم خلي اخابر زينة خابرتها كالت راح وياهم لبغداد شبيج انت حلمانة؟ تفاجئت ؛- عبالي بس حازم راح _ لا يالثولة جا غير حاتم هو الجبير خو مو بس حازم يروح .. _ اي اي افتهمت رجعي نامي مبين على صوتج نعسانة سدته بسرعة .. ظليت افر بيدي فكرت هو هوينه بيتنه هنا اصعد كيا من الشارع تنزلني براس الفرع واكملها مشي مارادلها روحه للقاضي .. خطية امي اخذ من وكتها وهيه تريد تطلع بعد شويه تروح لبيت خالتي تبات ومناك الفجر يطلعون .. طلعت من البيت وسديت الباب وراي وكفت ع الشارع وانه مستحيه اول مرة اطلع وحدي واحس الناس كلها تباوعلي ، شجعت نفسي ورفعت ايدي الترجف واشرت لكية وكفتلي صعدت بيها نزلت براس فرع بيت ابوي وكت عصر الشمس بعدها ضليت امشي ما احس اله انخمطت الجنطة من ايدي بقوووة وعنف .. التفتت وايدي على قلبي وميتة خوف عبالي حرامي اباوع اشوفه عياش واكف يباوعلي ومبتسم غمضت عيوني وطبكت شفافي على بعض اكتم غضبي .. كال شبيج خفتي عبالج جني ؟ عوجت حلكي تمتمت علواه ع الجني ؟ رفع حاجبه شكلتي ؟؟ ماكو شي ، مديت ايدي اريد اخذ الجنطة كال تعاي اوصلج هذيج سيارتي يم بيت عمي سالم عافني واكفة وراح يمشي باتجاه سيارته وبيده جنطتي حس بيه مارحت وراه وكف وظل ياشرلي تعااي تعاي هزيت راسي برفض ومشيت ب**ل ، فتح الباب وشمر الجنطة وره ، اريد اصعد بالوره سداه بسرعة باوعتله مخنزرة ظل يفر بيده لايكون تردين تصعدين بالوره مرتي؟ مرتك ؟؟؟ حجيت بتساؤل وانزعاج لزمني من ايدي والتاف بيه للجهة الثانيه من السيارة فتح باب الص*ر وضغط على ايدي الي لازمها ووجهني للمقعد مال السيارة ، صعدت وياه مرغمة ... التاف واجه كعد يمي ، ما ان تقفلت الابواب حتى اجتاحني ذاك الشعور ، شعور الرهبة الفضيع الي ينتابني ما ان اكون بقربه ، تتوغل بيه المخاوف اخاف يأذيني تنرسم كبال عيني مشاهد ض*به لسميحة قبل ... وتغزو اسماعي اصوات صياحه وغلطه عليها !!! انتشلني من شرودي شو وحدج جايه مناك لهناك امج شون تخليج تجين وحدج عاقلة مخبلة اخخخخ يا امج والله مربيتلي علة .. التافيت عليه بعصبية وسكتت باوع بعيوني ثبتهن لحظات لمعت بعيونه ذيج النظرات الغريبة دار وجهه مني يكمل سياقة ، دخل من الجامة هوا بعثر شعره على جبينه رفع ايده يرتبه .. درت وجهي منه كال ضوجج الهوا اسد الجامة ؟ جاوبت لا .. بس اشو انت هنا مارحت لاربعين ابن عمي شعجب ؟ جاوب قبل جم يوم رجعت منهم وعمي راح وانه بمكانه اكعد بالديوان خو مايضل خالي كلنا نروح والناس التجينه مايصير كلنه نروح .. سكتت وساد ال**ت لحد ما وصلنا للبيت دخلت وماخلاني اخذ جنطتي اله هو ينزلها .. بقيت واكفة يم الباب انطاهه الي كال هاج مرتي ضجت وخزرته ، ضحك بعدين تتعودين عليها هسه انه خو ما مجذب انت صدك مرتي قابل شنو لعد ؟ درت وجهي ودخلت سديت الباب .. وبراكين الكره تجاهه اشتعلت بداخلي شلون راح اتحمله ياربي الزمن يوكف ومااصير اله .. من رجعت امي رجعت يمها .. خابرني حازم وانه ابيت امي ... _ الوو ها ميوس بلغي وردة خل تجي العصر يمكم اريد اشوفها مشتاقلها صار شكد ما شايفها .. _ حازم رحمه لوالد*ك اترك البنية بحالها ابوها حارمها من الجية لبيت امي وهاي اذا سمعت باسمك تنرعص وتجي ولا يمها وابوها اذا عرف يطيح بيها ويكتلها .. _ كلشي ولا تنكتل وردة ، لعد انه اجي يم امي الليلة واخذكم ونروح لبيت خالي نفتح وياه الموضوع .. _ يا موضوع ؟ _ اخطب وردة . _ اي بس زحمة من ابوي توة ميت ابن عمي _ اي قابل راح اسوي حفلة وهوسة ، هو بس راح احجزهه الي .. _ ها فهمت عليك خوش لعد هسه اروح للمدرسة تأخرت دوامي عصري .. _ راح تبقين بهاي المدرسة انتي ؟ مو مدرستكم خلصت ورجعوهم لذيج المدرسة ..؟ _ ها اي طلبت نقل لهاي المدرسة وحتى لابوي كتله كال ميخالف ابقي ، انه اريد ابقى يم امي خطية لان خالي مايخلي بيبيتي تجي يمها .. _ ووردة وين جاي تداوم ؟ _ هم وياي نفس المدرسة .. _ تمام تردين اجي اوصلج ؟ _ لا مو عدنه خط _ كولي اي حتى اشوف وردة شبيج ماتسوين دروب لاخوج ولا ترتبيله مواعيد! ظليت اضحك وختمتها ويا .. بدلت ملابسي ورحت للمدرسة صعدت بالخط ماشفت وردة سألت سجى عنها كالت عدها درس اضافي وطلعت قبلنا .. رحت للمدرسة خليت جنطتي بالرحلة مالتي وطلعت من الصف وتوجهت لصف وردة .. دخلت شفتها كاعدة بالرحلة ، بيدها لفة جاي تاكل منها وكدامها كتاب مفتوح تقرا وتاكل وبصف الكتاب نساتل وعصير وبيبسي وجبس .. رحت كعدت يمها ولا انتبهت الي ! ضليت احجي يمهه وردة وردة وردة ببنبرة سريعة .. هيه مامعتمة تقرا وتاكل ... استمريت اضوجها واكرر باسمها بنبرة سريعة مدت ايدها الي ودفعتني اجيت اطيح من حافة الرحلة.. باوعتلي مزعوجة .. شتردين من صخمة ؟ _ حازم .. كالت ؛- اخخخ ، بحرقة متصنعة ! _ شبيج وسم ؟ كالت هم اكل وهم فيزياء وهم حازم اكثر ٣ اشياء احبهم بالكون وهذا الاخير صوب گلبي وزرفه تزرف ... ظليت افر بيدي باوعت بالكتاب شفته الفيزياء درت وجهي تنفست براحة ؛- همزين الله رحم بيه ودخلت ادبي شكد اكره الفيزياء ما اطيقها ياربي .. دفعتني حيل هم زين ما طحت ع الكاع كوة تماسكت ولزمت بطرف الرحلة حجت هيه بغضب وخزرة ؛- احترمي نفسج ولا تحجين عليها _ ادري قابل سبيت العنب ؟ _ سبيتي العشق مو بس العنب _ لو اسب حازم شسوين ؟ _ ادوس عليج والله _ تمرديني يعني اخخ الله من حجيج توجعت بلله اخوي واريد اسبه شلون ؟ _ اكلج اكل احطج بالخبزة اسويج لفة واكلج .. _ دخيلج يالزومبي ، المهم ترة حازم ميت عليج ويريد يشوفج واليوم راح نجيكم يريد يحجي ويا خالي علمود يحجزج اله .. انف*جت شفايفها وظهرت ابتسامتها العريضة المشرقة وانرسمت غمازتها اليتيمة على خدها ، صفكت بكل قووتها بحيث كل البنات الي بالصف ظلن يباوعن عليها هيه بعد ما خلصت تصفيك انتبهت الهن اشرت بيدها بتساؤل كالتلهن شبيجن راح انخطب وفرحانة شبيجن ؟ ظلن يباركن الها وانه سمعت صوت الجرس يعلن عن بدأ الدرس الاول ، انسحبت من يمها ورحت لصفي ... خلص الدوام صعدنا بسيارة الخط اجت وردة كعدت يمي وبس تضحك كالت اي شكالج حازم ؟ فتحت عيوني على اوسعها وخليت ايدي على حلكي فشلانة ندستها صفح ولج سكتي لا تفشلينه سكتي صوتج شعلوة نصيه على الاقل .. ظلت تباوع منا ومنا يمين ويسار وطكتني على جتفي اي هسه همه شفتهموا وانه جاي اسأل شكال حازم؟ وانتوا مو عدكم فاتحة وجايين تخطبون ؟ خاف تجذبين عليه ولج ؟ مجذبة من كبل قابل وانه ما اجذب بهيج مواضيع .. _ اييه هم تجذبين قابل وحد .. درت وجهي بانزعاج منها ايييه وولي يجي الليل ويصير خير تشوفينه كدامج غميتها ودرت وجهي ع الجامة .. حركت سيارة الخط وهيه بس تكرك يمي شكالت الكيمياء وهيج جاوبت بالفيزياء علما وصلت راسي صاير طبل من عدها .... كبل لاتنزل لبيتهم كرصتني ونزلت ، عبالك كرصت نحلة خلتني افرفر خزرتها كالت والله اذا ماجيتوو بالليل وطلعتي تجذبين اكلج اكل .. دفعتها روحي روحي جدر المركة والتمن يتانيج روحي انتحري بي كالت اووي ع الاساس انت مدري شرايحة تاكلين زلاطة خس هاا ؟ _ وشبيها زلاطة الخس تريد تجاوبني سمعنا صوت السايق يلله بويه نزلن خو ما ابقى واكف للمغرب هنا !! ظلينا نباوعله وتالي باوعنه بعيون بعض دفعتها من جنطتها يله ولي ونزلي يله كالت يصير خير اذا ما اجيتو .. ظليت افر بأيدي وهيه كوة نزلت من الكية .. رحت لبيتنا تلكتني امي ها يمه اخليلج غدا؟ ضحكت ها يمه ترديني اصير وردة الثانية ؟ مو كبل لا اروح للمدرسة اكلت من اكلج الطيب وبست راسها .. ضحكت امي كالت هسه هيه مدري عليمن طالعة شو خواتها ضعاف .. جاوبتها يمه مو هيه تاكل اكلهن طبعا مايسمنن .. ضحكنه اثنينه .. كالت لاتضلين جوعانة اكلي يمه اسويلج لفة شي ؟ _ يمه لاعبة روحي من اللفات كد ماشوف وردة تاكل بيهن .. _ ولج يمه شتردين منها حازم وقابل .. _ اخاف على اخوي خاف تتعارك وياه وتمرده _ لا هيه هم تحبه خطية .. هسه ماتاكلين شي ؟ _ تعبانة ما لي نفس والله .. اريد اصعد لغرفتي كالت امي لاتنامين هسه مغرب موزين نوم المغرب يجيب الامراض اسم الله .. ضحكت الها كتلها احاول وصعدت ، بدلت هدومي تمددت ع الجرباية غفيت شويه وكعدت على صوت اذان المغرب كعدت احس روحي ثكيلة كبش سمعت صوت سيارة وكفت يم الباب عرفته حازم اجه .. نزلت سمعت صوته جاي من الهول يحجي ويه امي دخلت شفته وشفت علاليك بالكاع .. سلمت عليه وكعدت وهو كرفص كدام العلاليك بالكاع عزل ٣ منهن على صفحة كال هاي جبت الكم عشى ماريد اتعبكم وتسوون .. كالتله امي شسالفة عجز خو ما عجز واحنا شراح نسوي قابل راح نشوي خروف ؟ _ ميخالف اليوم عشاكم عليه .. واخذ علاكتين خلاهن وحدة ابطن الثانية رتبهن بيده ومدهن الي كال هاج اخذي هاي خليها يمج من نروح لبيت خالي انطيها لوردة .. جريتهن منه وفتحتهن بسرعة اي خو هاي حصته مضمومة خلي اشوف شنو بيها ؟ سحبهن مني بالشقة ويضحك : لاتصيرين فضولية هاي حصة الحب .. رجعت جريتهن منه لا شو اله اشوف شنو بيهن واله مااخذهن وياي ولا انطيهن الها .. _ اشتعلوا بدت الغيرة من هسه تعاي تعاي زعطوطة شوفي وفكيني .. فتح العلاكة وظل يشوفني مديت راسي اطل بالعلاكة بيها علبتين وحدة شكلها مالة جكليت والثانية باكيت ورقي .. مديت ايدي بالعلاكة لزمها قوي وطلعها لهنا وكافي لاتصيرين غثيثة كلش _ لا اله اشوف شنو بيها _ ولج وحدة جكليت وحدة بيها بقلاوة .. _ اريد بقلاوة جوعانة تغديت من ساعة ١١ ونص الظهر وانه على لحم بطني .. _ روحي لهناك هم جبتلكم مانسيتكم . _ لا انه اريد من هاي .... ض*بني على راسي بخفة ويضحك لاتلحين ولج هاي لوردة ماينجاس منها ولا شويه .. برطمت اي اي ام بطن مدللة .. كال فديتها اخخخخ ، وبعدين انت من يمته تحبين الاكل شو تعيبين على وردة هسه تتعاركين على اكلها ... امي كاعدة وتضحك علينا دنكت اخذيت العلاليك الي بالكاع وجاوبته غير علمودك اريدها تضعف حتى تصير حلوة _ انه اريدها هيج انت لاتشغلين بالج .. امي كالت القاضي راضي انتي شعليج ؟ _ اي صدك اذا تزوجتها خليها تكمل دراستها خطية خالي كايللها تحلمين تطبين كلية .. _ اي اي طبعا كلشي تريده يجرالها هيه بس خلي تصير الي .. مشيت صوب المطبخ بالعلاليك وكتله ان شاءالله وظلوا يحجون هو وامي وانه خليت الاكل ع الطاولة وظليت اطلعه من العلاليك جايب مشاوي وبقلاوة رحت الهم بالهول يلله صلووا حتى نتعشه .. _ اي والله حتى نتعشه ونطلع لبيت خالي بسرعة _ اي مستعجل على شوفة ست وردة مو ؟ _ هيه غير شوفتها ترد الروح .. كالت امي انه متوضيه بس اصلي .. وحازم شكل رداناته وراح يتوضى بالمغسلة شكله فرحان دعيت الله كون تصير اله لان صدك يحبها وهيه هم تحبه .. وانه هم تانيته يتوضى خلص وتوضيت وراه وصلينا بالهول هو يتقدمنا واحنا وراه .. خلصنا وتعشينا لميت السفرة وغسلت االمواعين وحازم كلساع وصاح ولج يله ميسمه راح نتأخر جاوبته من المطبخ صبر شويه صبر ماطايرة وردة الهوايش ماتطير .. اجت امي كرصتني ولج يمه كافي لاتحجين عليها كدامه لاعبالج مايضوج بس مايحب يزعلج ولانوب تصيرين مثلها .. هو جنه سمعنه واجه كال يمه خل تحجي منا لباجر انه ماشوف وردة بعيوني اشوفها بكلبي .. باوعت لامي ها يمه شفتي اثنينهم مايحسون فر الجدر ولكى قبقه .. كالت امي الله يجمعهم بالحلال والله يسعدهم .. هو رفع ايده للسما وكال اميييين ، من كل قلبه .. امي خلت ايدها على كتفه تربت عليه باطمأنان .. وانه اريد اطلع من المطبخ .. هو كال يوم الالج وواحد يشوفج بكلبه ... كتله اكو من يشوفني بسنونه يريد يكطعني اندارت عليه امي كالت هذا منو ؟ عياش عياش منو غيره نجوم السما اكربله منج ماياخذج طوول ما انه عايشة يلوح السما ولا يلوحج .. جاوبتها من مكاني يم الباب يمه انه وعدت ابوي وماكدر اخلف وعدي يزعل عليه .... لعد تردينني انه ازعل عليج ولج ميسم؟ احجي حازم احجي اريدك توعدني ماتخلي عياش ياخذهه .. حازم ؛- هيه بس خل تحجي وتكول ماريده وانه ما اتخلى عنها ومحد يكدر يجبرها .. ميسم ؛- هسه عوفوني انه وخلونه سالفتي مطولة مبين اروح ابدل لا نتعطل .. حجيت هيج وطلعت رأسا كلش يضوجني هذا الموضوع .. رحت بدلت ولبست عبايتي ونزلت جوا شفتهم ينتظروني ، قفلنا البيبان الداخليه وطلعنا قفلنا باب الشارع وتوجهنا لبيت خالي ، هو قريب كلش علينا مسافة ١٠ دقايق مشي .. وصلنالهم دكينه الباب طلعلنا ابن خالي فوتنا جوا ودخل كدامنه فتح النا باب الاستقبال مالتهم دخلنا محد جان كاعد بي ، ورا شويه كال تعالوا ابوي بالهول .. كمنا وطبينا بالهول خالي جان كاعد ولا كام لابس دشداشة ومدد رجل وحدة والثانية مثنيهه ومنتجي ع التكية مالة الكعدة الارضية .. نافخ روحه كلش ، حازم دنك عليه وباسه وهو من ورا خشمه رد عليه هلا بيك خالي هلا .. انه وامي من شفناه هيج كلنه السلام عليكم وكعدنا .... اجت مرته وبناته وردة وسجى وسميحة ووياهه مهند سلموا علينا وردة اول مادخلت عينها على حازم تباوعله بحب وشغف وهو كووة لازم روحه مايباوع عليها لان ابوها واخوانها كلهم كاعدين ... مهند اجه كعد بحضني رأسا ، امي ظلت تباوعلي بس هو طفل مايفهم حضنته وبسته حييل من خده .. امي سالتهم على بيبيتي كالو ابيت خالي فائق.. بعدها رحت انه ووردة لغرفتها وانطيتها الحلويات الي جابهن الها حازم ، خلتهن على قلبها وكالت اووفيييش ياريحة الحب .. كتلها الاكل لو حازم دفعتني بيدها اختل توازني كله ، لزمت زندي الي دفعتني منه متوجعه هيه كالت اثنينهم ... وانه حجيت متألمة اخخخ من هيج اريدج تضعفين حتى الله يفكني من دفعاتج .. كتلها يلله امشي نكعد يمهم راح يخطبونج طلعت تركض كبلي وبيدهه العلاكة جريتها من هدومها من ورا كوة رجعت ولج العلاكة خليها هنا شيكولون هسه ض*بتني على راسي كالت نسيت لزمت راسي اخخخ الله راسي الله يعينك ياخويه .. طلعنا كعدت يم امي وحازم ، خالي ساكت وبس يدخن وامي ومرة خالي يسولفون وحازم يسولف ويا اولاد خالي .. ضلو امي وحازم يتهامسون هو يكللها يمه احجي انتي انه مستحي ، هيه تكله ماتشوفه شلون مطنكر انت احجي خاف يفشلني .. خالي سمعهم اخذله نفس من الجكارة وحجه بنبرة متعجرفة وبتساؤل ؛- اي حازم اليوم ذاكرنا وجاي خير ان شاءالله ؟ حازم كح وجاوبه ؛- والله خالي انه جيتك اريد اخطب منك بتك المحروسة وردة .. ساد ال**ت لحظات ظل خالي يباوع عليه وعلى وردة كاللها وريدة كومي كعدي يم امج لان هيه جانت كاعدة يم اخواتها مقابيل حازم وكلساع يبوكون النظرات ويباوعون بعيون بعض .. كامت وردة تمشي مثل الدبابة وراحت كعدت يم امها بس الضحكة مافاركت محياهه ، حازم دنك خجلان يحك ب*عره ويحرك ايده على لحيته ... خالي ببرود كال ؛- اي شو جاي وحدك ابوك وين شنو مو بعينه احنه ؟ _ لا خالي ع الراس انته والله بس جاي اخذ رايك بالبداية اذا موافق من باجر اجيب ابوي وهو ماكال شي هم كتله انه وكال اول شي شوف خالك .. خالي يحك بلحيته ومسوي روحه صافن كال هاااا.. طويلة كلش ورجع جسمه حط كطف الجكارة بالنفاضة الي كدامه وعدل كعدته ويباوع لامي بنظرات حقد ، امي خطية دنكت مقهورة .... _ والله يا حازم اجيت متأخر ، لان كبل فترة ام حيدر عمة فيض اخت ابو الي مربيته ، شاف*ني بالسوك وسلمت عليه سلام حار وكلتلي فيض يريد يخطب بتك وردة وانه علاقتي بيهم زينة عمام فيض وماحب افشلهم ظل حازم يباوع لخالي مصدوم ويرجع نظره على امه بتساؤل ووياه الكثير من الذهول ... حجت امي ؛- اي بس انه فيض من كالي كتله حازم محاجيني عليها قبلك سكت فيض وماعاد فتح الموضوع وبعدين هيه بكيفها البنية لان هيه الي راح تتزوج .. انتفض خالي من مكانه بعصبية وهو كاعد كال خل تاكل تبن مو بكيفها بكيفي انه هيه شنو وبيش الكيلوو .. سكتنا كلنا وحازم عصب مدنك وبس يعصر باصابعه ويطكطك بيهن .. بعد لحظات من ال**ت وتجول النظرات بكل الارجاء تكلم خالي وهو يحك بلحيه بحيله ومكر ؛- انه اقبل بيك وانطيك وردة بس عندي شروط قبلها نفذهه وتدلل واذا ما نفذتها ماعندي غير خيار انطيها لفيض لان علاقتي زينه بعمامه وهم خوش ناس وطيبين .. حازم همس واحنا شنو كوا**** كاله خالي شكلت ؟ _ ماكو شي خالي كول طلباتك اوامر ان شاءالله اذا مكدور عليها ننفذها ليش لا ... امي ؛- اي بس هيج مو زين ياخويه تسوي مشاكل وفرقة وضيجة خلك بين الاخوة انه ماعولت على الله اجمعهم .. خالي رفع ايديه باستسلام هذا العندي .. حازم باوع لامي .. وكال خل نسمع الشروط بلله .. رفع ايده خالي واشر باصبع الشهادة اول شي تتبرى من ابوك ومن عياش وبالاخص عياش هذا اتفل عليه واتبرى منه.. حازم فتح عيونه على اوسعها من الصدمة لحظات وكتف ايده وايده الثانية خلاهه جوه حنكه وتكلم بنبرة استهزاء اي بلله كمل .. شنو مبين ماعاجبك ولك ؟ فتح ايدينه وتكلم بتبرير مصطنع واستهزاء مبطن _ هسه انه كلت شي جاي اكلك كمل .. كام خالي سحب جكارة من باكيت الجكاير وكمل كلام _ اي وامك تقبل نبيع البيت ونتقاسمه كلنه وميسم ماتتزوج عياش وانت تجي هنا تكعد بمنطقتنا شوفلك بيت واكعد بي بعيد عن بيت ابوك .. كام حازم على حيله معصب ؛- خالي هاي شروطك كلها باطلة ومالها داعي شنو انه نغل حتى اتبرأ من ابوي دكول ماانطيك البنية شهالحجي الزايد هذا .. وكف خالي على حيله وصيح بوجهه اطلع بره ماعدنا بنات للزواج وبعد لاتفكر تجي تخطبها مني ترة مايحصلك خير افتهمت .. حازم باوع على امي وكاللها يلله يمه امشينه يلله ميسم .. طلعنا من بيتهم خاطرنه متكدر وضايجين .. واحنه جاي نمشي نطق حازم وحنجرته صدحت بنبرة مليانة ان**ار وخيبة ؛- يمه انت ليش ماكلتيلي فيض مخلي عينه على وردة ليش ضميتي عني؟ جاوبته امي بصدق ؛- والله يا امي هيه مرة وحدة كال هيج ورديته انه كتله اخوك رايدها وكبلك كالي خطية سكت وخطية بعد ماجاب سيرة للموضوع .. وكف حازم بنص الشارع رفع ايده بتهديد والله يمه اذا صدك خالي انطاهه لفيض تصير كاتل ومكتول .... امي خلت ايدها على حلكها وكالت بفزع صخام امشي امشي للبيت يمه مو هنا نحجي .. جرته من ايده وانطلقت بي للبيت وانه امشي وراهم مقهورة .. واباوع لحازم خطواته وهيئته كلها يأس وان**ار .. رجعنا للبيت وصلنا يم الباب ، اندار حازم يريد يروح لسيارته امي ماخلته سحبته من ايده كالتله ارتاح شويه اشرب ماي وبعدين روح _ يمه عوفيني اروح تعبان اريد انام _ لا ماتروح انت وحالتك هيج ، هاج ميسم المفاتيح فتحي الباب .. اخذت المفاتيح منها وفتحت الباب دخلنا جوة امي طلبت مني اجيب ماي لحازم ، وهيه كعدت تحجي ويا ، رحت جبت الماي اله انطيته ، دك موبايله جاوب يحجي مهموم وحزين ؛- ها يمه اي هسه جاي واحجيلج كل شي يله الله وياج .. سألته امي؛- هاي الحجية ( مرة الشيخ عزام) جاوبها اي انه كتلها اليوم رايح اخطب وردة ، وهسه جاي تسألني شصار ما صار ، الحمدلله ما جبتها وياي جان من صدك تفشلت كدامها وجان الله يعلم خالي شحجى بعد كدامها .. يلله انه اترخص تاخر الوقت راحت يمه امي خلت ايدها على زنده بخوف يمه دير بالك من الشارع مو تسوق سريع اخذ راسها باسه وكال تصبحون على خير وطلع .. بقينه انه وامي ملتزمين ال**ت ووبس نفكر ومقهورين على حازم ووردة وكاضينها حسرات ! ورا شويه خابرت وردة تبجي ولج من طلعتوا لهسه انه كوة حابسة دموعي لا انفضح مية شغلة وصاني عليها ابوي وبس يباوعلي ويتفحصني شاك بشي ابوي بس ماعنده دليل وانه نار ومستعرة بداخلي سودة عليه حازم لهسه صوته بإذني يصدح ونبرته المبحوحة بالحزن والعصبية محتلة اسماعي وماتفاركها كليلي شلونها حالته .. _ شلونها بعد عصب وظل يصيح بالشارع وكوة رجعناه للبيت وهسه راح لبيت ابوي .. _ عليج الله ميسم خابري هسه وكليله انه للموت اله وما اقبل بغيره ابيع الدنيا علموده حببيبة كليله هيج .. _ ولج خاف نام هسه .. _ عفية حاولي ماكدر اخابره تدرين كلش زين انت وهذا تليفون امي .. ماريده ينام ضايج ومقهور لايصير بي شي حاجي خلي عنده امل انه اله وما اصير لغيره.. _ اسم الله عليه هسه بس انطي صبر راح اخابره .. سديته منها وخابرت على حازم .. جاوبني بسرعة بصوته الحزين ها ميسم .. _ حازم هو مانايم وكعدتك؟ _ لا كاعد جاي احجي ويه امي شبيكم خو مابيكم شي ؟؟ بلعت ريك وجاوبته لا بس وردة خابرتني هسه جاوبني ومبين على صوته الصدمة ؛- شبيها خو ما اذاهه ابوهه ؟ _ لا بس مقهورة عليك كلش وتوصلك رسالة تكلك لاتدير بال انه الك للموت وما اصير لغيرك ابد .. حسيته جر نفس براحة وجاوبتي بعد لحظة **ت وانه هم ماراح استسلم يمكن اخذ ابوي وامي الحجية واروح الهم بس بعد مايهدأ خالي .. سلميني عليها وطمنيني باجر اجي يم المدرسة اشوفها .. _ ان شاءالله تصبح على خير _ وانت بخير ميوس .. سديته منه وخابرتها حسيتها ارتاحت شويه خاصة من عرفت باجر راح يجي يشوفها .. جبت كتاب التاريخ واقرا غفيت بالهول بس حسيت على امي غطتني وخلت جوا راسي مخدة .. فزيت على صوت رمي كلش قوي اقتحم اسماعي وخلاني اكعد وافز من نوم عميق صوت الرمي كلش قريب اسمعه وعبالك بداخل البيت كعدت اصررخ يممممممه وينج ؟؟؟ يتبع ...

Free reading for new users

Scan code to download app

App Store Google Play

Facebookexpand_more