HINDI MATAHIMIK si Allen. Hindi na nawala sa isip niya si Maki mula nang malaman niyang ito at ang estrangherong tumulong sa kaniya noong freshmen orientation ay iisa. Kaya pagkatapos ng group meeting nila ay umuwi agad siya sa kanilang apartment. Kinuha niya sa box ang elementary yearbook at sa unang pagkakataon sa loob ng lampas apat na taon, binuklat niya iyon.
Nakita niya kaagad ang mukha ng eleven years old na Maki, malaki ang larawan at nasa harapan kasi ito ang kanilang class valedictorian. May bumara sa lalamunan niya. Masuyo niyang hinaplos ang mukha nito na sa alaala at larawan na lang niya makikita. Kasi sobrang laki talaga ng naging pagbabago nito ngayon. Hindi na ito binatilyo, binata na talaga. Mas maganda pa rin ang mukha nito kaysa sa karamihan ng mga babae pero hindi na
