13
1222 Words
"John! Puwede ba kitang makausap?" sabi ni Ava nang makita niya ang binata.
"Tungkol saan?"
Napalunok ng laway si Ava. "Tungkol sa.. sa inyo no'ng babae. Nagkabalikan na ba kayo?"
"Hindi pa. Nililigawan ko pa lang siya. Pero naniniwala ako na magiging kami na talaga. Ramdam ko na mahal niya ako..." nakangiting sabi ni John.
Tila punyal na tumusok sa puso ni Ava ang katagang iyon. "Ha? Paano mo naman nasabing mahal ka niya? Paano kung may iba pala siyang lalaki?"
Umiling si John. "Wala siyang ibang lalaki. Ako lang ang lalaki niya."
Asar na ngumisi si Ava. "Ang taas naman ng kumpiyansa mo sa sarili, John. Baka magulat ka na lang, may lalaki na siyang kasama isang araw. Nabalitaan ko na mas matanda pala siya sa iyo. Paano kung maakit siya sa kaedad niyang lalaki? Ano ang gagawin mo?"
Sumeryoso ang mukha ni John. "Lahat gagawin ko para hindi mangyari iyon. Sa akin lang dapat siya maakit at hindi sa iba."
Napakurap si Ava. "Lahat? Kahit masaktan ka pa?"
"Oo naman. Ganoon talaga kapag nagmamahal. Handang masaktan. May sasabihin ka pa ba? May gagawin pa kasi ako kung wala na. Maiwan na kita," tipid na ngumiti si John bago umalis sa kaniyang harapan.
Mariing napapikit si Ava habang nakakuyom ang kaniyang kamao. Gusto niyang sumigaw dahil sa inis na bumabalot sa kaniya.
Punyetang babaeng iyon! Bakit pa siya bumalik? Dapat sana ako na ang pinapansin ni John ngayon! Ang kapal ng mukha niyang bumalik sa buhay ni John matapos niyang iwan ito noon!
"Hoy! Galit na galit naman ang mukha mo diyan, Ava! Ano? Na- basted ka na ba ni John?" pang aasar ni Sheena.
Matalim niya itong tinitigan. "Tigilan mo ako, Sheena. Wala akong panahong makipaglokohan sa iyo."
Sumeryoso ang mukha ni Sheena. "Sinabihan na kasi kita pero hindi ka nakinig. Iba ang first love, Ava. Kahit sabihin pa nating mas matanda ng ilang taon ang babaeng iyon sa kaniya, hindi magbabago ang nararamdaman ni John. Walang magbabago. Age doesn't matter."
"Wala akong pakialam. Basta, gagawin ko ang gusto ko para masira sila," mariing sabi ni Ava bago umalis.
Nagtungo siya sa store ni Shayne. Sakto namang kararating lang ni Shayne doon. Nilapitan niya kaagad ito.
"Hi! Ikaw ba iyong babaeng minamahal ni John?"
Kumunot ang noo ni Shayne at saka alanganing ngumiti. "Ahm.. ah eh o- oo... bakit?"
Plastikadang ngumiti si Ava. "Wala naman. Nakakatuwa lang dahil mahal na mahal ka pa rin niya hanggang ngayon."
Hindi naman nakapagsalita si Shayne. "Ah... "
Humalukipkip si Ava. "Nagkukuwento ka kasi niya sa amin. Walang name kapag nagkukuwento siya. At ikaw na pala ang tinutukoy niya. Nice to meet you pala. Ako si Ava. Kaibigan niya."
Naglahad ng kamay si Ava. Alanganin iyong tinanggap ni Shayne. Matamis siyang ngumiti kahit na hindi siya komportable kay Ava.
"Nice to meet you, Ava. Ako naman si Shayne."
"At dahil ikaw ang babaeng mahal ng kaibigan ko, puwede ba akong makipagkaibigan sa iyo? Kasi syempre, gusto naming malaman mga kaibigan niya kung sino ang babaeng mahal niya. Para kapag halimbawa, nagkaroon kayo ng hindi pagkakaintindihan, puwede niyo kaming mapagtanungan."
"Oo sige walang problema. Nasaan nga pala siya?"
Lumabi si Ava. "Kapag umaga nasa palengke siya. Kasi nga may puwesto siya doon. Maraming bumibili sa kaniya kaya ubos palagi ang mga isdang kinukuha niya. Alam mo na, guwapo kasi. Kaya ikaw, bantayan mo ng maigi si John. Nililigawan ka na ba niya?"
Tumango si Shayne. "Oo... nakakakilig nga eh."
Nagtangis ang ngipin ni Ava pero ngumiti pa rin siya. "Aba syempre naman! Guwapo ang kaibigan ko eh!"
Natawa naman si Shayne. "Oo sobra. Siya nga pala, dito na kaya tayo sa loob ng store magkuwentuhan para makaupo ka."
Agad na umiling si Ava. "Naku, hindi na! Ayos lang ako. At saka mau gagawin din ako. Talagang sinilip lang kita dito kasi na- curious talaga ako sa iyo. Puwede bang malaman ang social media account mo para chat - chat tayo?"
"Oo naman! Ito ang account ko!"
Kahit gigil na gigil na si Ava, matamis niya pa ring nginitian si Shayne. May binabalak siyang masama sa dalawa para magtagumpay siya sa kaniyang plano.
"Bye na, Shayne! See you later!" kumaway pa siya bago tuluyang umalis.
Habang si Shayne naman ay nakangiting pumasok sa store niya. May ngiti sa labi siyang sinalubong ng dalawa niyang staff.
"Wow! Mukhang may bago kayong friend, ma'am!" sabi ni Tina.
"Oo nga! At mukhang mabait!" dagdag pa ni Trish.
Napangiti si Shayne. "Oo nga eh. Siya ang pagtatanungan ko kapag nandito na ba si John o wala. Para kahit papaano, alam ko kung nasaan si John. Mas mainam na kasing may mapagtatanungan."
"Opo tama iyan. Ganiyan din ako sa boyfriend ko. Pinagtatanungan ko ang mga kaibigan niyang babae. Kasi kapag lalaki, hindi iyan magsasabi. Pagtatakpan lang nila ang isa't isa. Eh kapag tayong mga babae, talagang magsasabi iyan!" wika ni Tina.
Napangiti si Shayne. Akala niya, isang bagong kaibigan ang dumating sa buhay niya ngunit isa pa lang kalaban. Nang matapos siya sa kaniyang ginagawa sa store niya, umalis na muna siya para bisitahin ang isa pa niyang branch. Hapon na ng mga oras na iyon nang maisipan niyang mag- message kay Ava.
Shayne:
Hi! Good afternoon! Nakita mo na ba diyan si John?
Ava:
Wala pa eh. Baka mamaya pa. Chat kita kapag nandito na.
Lumabi si Shayne. Hindi muna siya pupunta doon hangga't wala pa si John dahil ayaw naman niyang maghintay ng matagal. Ang hindi niya alam, nandoon na si John. Hindi lang ito nakapag- message sa kaniya dahil low bat ang cellphone nito.
"John! Nakausap ko si Shayne kanina. Ang bait pala niya no? Tapos ang ganda pa. Kaya hindi na ako magtataka kung bakit mahal mahal mo siya," nakangising sabi ni Ava.
Namilog ang mata ni John. "Oh? Nagkausap na kayo?"
"Oo! Iba nga ang pakiramdam ko habang kausap ko siya. Ang gaan sa pakiramdam! Parang magiging magkaibigan kaming dalawa talaga!"
Ngumiti si John. "Mabuti naman kung ganoon. Para magkaroon siya ng makakausap din dito. Palagi kasi siyang busy sa business niya..."
Ngumuso si Ava. "Oo nga eh. Mukhang pagod na pagod nga siya kanina. Balak mo ba siyang yayain pang lumabas? Mukhang pagod na kasi siya. Mas mabuti kung pagpahingahin mo muna siya."
Bumuntong hininga si John. "Ganoon ba? Sabagay, mas lalo lang siyang mapapagod kapag nagpunta pa siya dito. Medyo malayo kasi iyong unit niya mula dito. Ime- message ko na lang siya."
Lihim na napangiti si Ava. Sa isip- isip niya, matagumpay ang plano niya dahil hindi na magkikita ang dalawa sa araw na iyon.
Tama lang iyan... huwag na kayong magkita pa dahil naiirita lang ako sa inyo...
SA KABILANG BANDA, panay ang tingin ni Shayne sa kaniyang cellphone. Kasalukuyan siyang nagpapahinga sa kaniyang condo dahil napagod siya kamamaneho at pag- aasikaso ng kaniyang negosyo. Inaantay niya ang message ni John kung nakauwi na ba ito para pumunta siya doon. Ngunit bumagsak ang balikat niya nang makita ang message ng binata.
John:
Hi, miss beautiful! Magpahinga ka na po. Alam kong pagod na pagod ka sa ginagawa mo. Gusto ko na magpahinga ka dahil malayo pa kung pupunta ka dito. Bukas na lang tayo magkita, okay? I love you, Shayne my sunshine.
Malungkot na tinabi ni Shayne ang kaniyang cellphone. Akala pa naman niya magkikita silang dalawa ni John ngunit hindi pala.
- Writer
