Sin With Me, Baby Boy

11

"Kayo na muna ang bahala dito, ha? May kailangan lang akong asikasuhin..." wika ni John matapos niyang maghugas ng kamay.

Katatapos lang nilang kumaing tatlo. Hindi siya gaanong kumain ng madami dahil balak niyang yayaing kumain sa labas si Shayne. Sisimulan na niya ang panliligaw sa dalaga at wala ng makakapigil pa sa kaniya.

"Sige lang, boss! Enjoy!" nakangising sabi ni Kyle.

"Enjoy lang, boss! Sana maka- score ka! Joke lang!" sabi pa Rey.

Nakangiting iniligpit ni John ang mga gamit niya. Agad siyang umalis dahil kayang - kaya naman iyon ng dalawa. Kailangan niyang magmadali dahil maliligo pa siya. Sinilip niya ang store ni Shayne ngunit wala pa doon ang dalaga. Sa tingin niya baka gabi pa ito magpupunta doon. Mabilis ang naging lakad ni John patungo sa kaniyang bahay. Pagkapasok niya doon, agad niyang inasikaso ang kaniyang sarili. Sinigurado niyang mabango siya at talaga namang malinis ang kaniyang katawan.

"Guwapo na ba ako?" tanong niya sa sarili habang nakatingin sa salamin.

Nag- spray siya ng pabango sa kaniyang katawan. At pagkatapos, dali- dali siyang lumabas ng bahay para magtungo sa simbahan malapit doon. Sa gilid kasi ng simbahang iyon, may mga nagtitinda ng bulaklak. Isang bouquet ng pulang rosas ang binili niya. Nakangiti siya habang pinagmamasdan ito. Iyon ang unang beses na bumili siya ng bulaklak para sa isang babae.

At dahil mahal niya si Shayne at ito ang kaniyang first love, sisiguraduhin niyang si Shayne lang ang bibigyan niya ng bulaklak.

"Bayad po. Sa inyo na po ang sukli," sabi niya sa matandang nagtitinda.

"Maraming salamat sa iyo, hijo. Nawa'y magustuhan iyan ng babaeng pagbibigyan mo at masungkit mo ng tuluyan ang kaniyang puso..." nagagalak na sambit ng matanda.

Nginitian ni John ang matandang babae bago nagsimula ng lumakad pauwi. Alas tres na ng hapon. Napahiling siya na sana, naraoon na si Shayne sa store nito para mayaya na niya itong makipag- date sa kaniya.

"John?" kunot noong wika ni Ava nang makita siya. Nakatitig ito sa dala niyang bouquet.

"Oh, Ava! Bakit? May kailangan ka ba?" tanong ni John sa kaniya.

Napalunok ng laway si Ava bago itinuon ang tingin sa binata. "B- Bakit may bouquet ka? Para kanino iyan?" kinakabahan niyang tanong.

Matamis na ngumiti si John. "Para sa babaeng minamahal ko. Nagkita na ulit kami. At hindi na ako makapapayag pa na iwan niya ako ulit."

Nanlaki ang mata ni Ava dahil sa gulat. May kirot sa kaniyang puso na umusbong dahil sa sinabing iyon ni John. Hindi niya nagustuhan ang sinabi ng binata.

"T- Teka... iniwan ka niya noon?"

Tiningnan ni John ang hawak niyang bulaklak bago tumango. "Oo... bakit?"

Tumikhim si Ava. "Iniwan ka na pala niya pero bakit.... bakit masaya ka pa na nagkita na kayo? Wala ka bang sama ng loob sa kaniya dahil sa ginawa niya sa iyo noon? Sinaktan ka niya. Iniwan ka niya eh," naiinis na sabi ni Ava.

Umiling si John. "Wala. May dahilan naman siya kung bakit niya nagawa sa akin iyon at naiintindihan ko naman kung bakit."

Mas lalong nagsalubong ang kilay ni Ava. "Ano? At ano naman ang naiintindihan mo doon? Sinaktan ka n'ya. Malay mo ba kung sino ng lalaki ang dumating sa buhay niya tapos gusto mo pa rin siya?"

Ngumiti si John. "Wala naman akong pakialam doon. Ang mahalaga, single na siya ngayon. At liligawan ko na siya para maging akin na siya."

Hindi na nagawang magsalita pa ni Ava dahil umalis na sa kaniyang harapan si John. Kitang- kita niya ang saya sa mukha ni John habang pinagmamasdan ang bulaklak na ibibigay niya kay Shayne.

"Buwisit!" inis na sabi ni Ava.

Narinig iyon ni Sheena. "Hoy! Ano ang nangyari sa iyo? Bakit parang galit na galit ka diyan?" natatawang tanong nito sa kaniya.

Inis na umupo sa monoblock si Ava. "Nakakainis! Nagkita na yata si John pati na ang babaeng sinasabi nina Kyle na mahal niya noon pa man!"

"You mean, iyong first love niya?"

"Oo! Iniwan na siya ng babaeng iyon. Sinaktan na siya tapos mahal pa rin niya? At may pabulaklak pa siyang nalalaman? Ang suwerte naman no'ng babaeng iyon!" inis na sabi ni Ava.

"Eh gaga ka pala! First love never dies! Siguro, talagang mahal na mahal ni John ang babaeng iyon kaya hindi niya magawang alisin sa puso niya!" wika ni Sheena.

Umirap si Ava. "Letse! Papatulan niya pa ang babaeng iyon? Eh paano kung marami ng gumalaw sa babaeng iyon? Hindi ba siya mandidiri? Kailangan kong malaman kung sino ang babaeng iyon!" sabi ni Ava bago naglakad paalis.

Samantala, kararating lang ni Shayne sa kaniyang store. Alas singko na siya nakarating doon. Nakangiti siyang sinalubong ng dalawa niyang staff. Pauwi na rin ito dahil hanggang five thirty lang sila doon ng hapon.

"Kumusta ang sales? Tumaas ba?" tanong niya sa dalawa.

"Yes po, ma'am! Mas marami pa tayong naibenta ngayon! Nakikilala na talaga ang product niyo ma'am! Kahit ako ramdam ko ang pagkinis at pagputi ng balat ko!" masayang sabi ni Trish.

"Kaya nga! Nakakaganda talaga ang products niyo ma'am! Ito lang ang tumalab sa akin!" dagdag pang sabi ni Tina.

Napangiti ng matamis si Shayne. "Mabuti naman kung ganoon. Hangad ko talaga na maraming mapaganda ang produkto kong ito. Para tumaas ang confidence ng bawat babae dito sa mundo..."

"Ma'am? May tao po sa labas!" nanlalaki matang sabi ni Tina.

Pumihit paharap si Shayne. Nagulat siya nang makita si John. Pumasok na ito sa loob ng kaniyang store. Napatitig siya sa hawak nitong bouquet.

"Oh my gosh! What's the meaning of this!" hiyaw ni Trish sabay kisay- kisay.

Matamis na ngumiti si John kaya lalo itong gumwapo. "Para sa iyo, mahal kong Shayne."

Napatili ang dalawang staff ni Shayne. Natatawa siyang inirapan ang mga ito bago bumaling kay John. Tinanggap niya ang bulaklak na handog nito sa kaniya. Hindi niya maiwasang kiligin kaya kinagat niya ang kaniyang labi.

"Bakit may paganito ka?" nagpipigil ngiti niyang sabi.

"Dahil simula sa araw na ito, liligawan na kita. At hindi mo ako mapipigilan sa gagawin kong iyon..." nakangising sabi ni John.

Muling tumili ang dalawang staff ni Shayne na naghahampasan at tulakan pa. Kilig na kilig sila kina Shayne at John. Hindi na tuloy napigilan ni Shayne na matawa kaya tinakpan niya ang mukha niya gamit ang bouquet na hawak niya. Nag- iinit ng sobra ang mukha ni Shayne kaya pakiramdam niya, pulang- pula na ito.

Hinawi ni John ang harang sa kaniyang mukha. "Huwag mong takpan ang maganda mong mukha, Shayne..." malambing na sabi niya.

Tumitig si Shayne sa binata bago natatawang napayuko. Parang sasabog siya sa kilig sa mga oras na iyon. Habang sa isang tabi, nakatanaw si Ava sa kanila na nakakuyom ang kamao at gigil na gigil dahil sa matinding selos.