"Ha? Ano kamo, Senyora?" Napatayong bigla si Enrico dahil sa narinig mula sa among babae.
"Alam kong maliwanag ang pagkasabi ko, Enrico. Heto ang buong papeles ng GONZALEZ HOSPITAL. Tatlong taon mong sinolo ang pamamalakad sa pagamutan kaya't alam kong kayang-kaya mo na iyang pamahalaan," ani Leonora kasabay nang paglapag sa sealed envelope na naglalaman ng buong papeles at ownership ng pagamutan.
Kaso dahil hindi pa rin makapaniwala si Enrico ay hindi siya agad umimik. Napaupo siyang muli subalit nanatiling nakatitig sa sealed envelope. Aba'y sino ang hindi matameme kung basta na lamang ibibigay ng amo mo ang full authority and ownership ng pagamutan? Pinamanaan na nga siya nito ng ilang milyong euro's tapos ipinamahala sa kaniya ito ng tatlong taon at ngayon ay ipinapamigay na lamang!
