في قلوب العاش*ين

استسلام للأمر الواقع

عاليه كانت قاعده تتكلم مع فريده فجاه تليفونها رن .. آسما بتتصل بيها ..

عاليه قالت لفريده : ارد ولا ما اردش يا فريده .. انت رايك ايه .

فريده : ما ترديش عليها سيبك منها .. واصلا ما تدخليهاش في حياتنا ثاني ولا تتكلمي معها ثاني .. عاليه : لا انا هاتكلم عاوزه اشوفها عاوزه ايه .. فتحت عاليه التليفون واسما قالت لها : ازيك يا طنط عاليه انا بتكلم عشان عاوزاكي في موضوع ضروري ..

عاليه : عاجبك كده ايه اللي حصل من تحت راسك انا كنت باقول لك تحاولي تقربي فارس منك . لكن باللي انتي عملتيه ده بوظتي كل حاجه وخلتيه يركب دماغه اكثر .. وكان عاوز يسيب البيت ويمشي ظظ انا مضطره انفذ له كل طلباته ..

اسما : يعني ايه يا طنط عاليه .. مش احنا اتفقنا اننا نبعدها عنه ..

عاليه : مش بالطريقه دي يا اسما .. فارس كده عند معانا .. لما عرف انك كلمتي حور وقلت لها اني مش موافقه على الجوازه .. وكان جاي ياخذ شنطه هدومه ويمشي لكن انا اضطريت اقول له اني هاعمل اللي هو عاوزه ..

اسما : يعني خلاص كده هيتجوزوا وهينفذ اللي في دماغه .. حتى لو مش هيتجوزني فكري في المنظر بتاع العيله بتاعتكم يا طنط عاليه .. فكري في نفسك وفكري في اونكل .. الناس هتقول عليكم ايه لما تعرف ان فارس الوريث الوحيد للعيله متجوز خدامه ..

عاليه : مش وقته كلامك ده خالص .. انا بالم الموضوع بالعافيه ومش عاوزه اخسر ابني برده .. هاحاول كده اخر محاوله وهاشوف هاعمل ايه .. قفلت عاليه التليفون مع اسما وفريده قالت لها : محاوله ايه اللي هتعمليها يا ماما تاني .. انتي مش قلتي خلاص انك هتنفذي كل اللي فارس يقوله لك ..

عاليه : مش بالسهوله دي يا فريده .. انا لما جبت البنت دي عندنا في البيت كان كل اللي في دماغي انها هتيجي تخدمني وتشيل من عليا شويه .. لكن ما جاش في دماغي ان ابني يقع في حبها .. انا مصدومه بجد من كل اللي بيحصل ده .. سيبيني بس افكر هاعمل ايه وبعدين هبقى اشوف ..

فريده : اوعى يا ماما تعملي اي حاجه تضايق فارس احسن يسيب لنا البيت ويمشي .. وبعدين هو هيعجل بالجواز لاني خلاص مسافره وهو قال لي اني لازم احضر الفرح بتاعه ..

عاليه : جواز ايه اللي يعجل ده انا هشترط عليه انه ياجل الجواز خالص .. وانتي انسي موضوع السفر ده دلوقت وكلمي جوزك قولي له على المصايب اللي احنا فيها .. مدي الاجازه بتاعتك شويه ولما نشوف هنعمل ايه تسافري .. لاني مش هاجوزه للي اسمها حور بالسهوله دي .. لسه لما تقعد وتعرف عاداتنا وتقاليدنا .. ولازم تيجي تقعد معنا هنا في البيت هي ومامتها واخواتها .. مش عاوزين فضايح في الفرح ومش عاوزين الناس تاكل وشنا .. لازم ينسوا اصلهم وفصلهم لو فعلا كانوا هيدخلوا العيله دي ويبقوا ناس جديده خالص ..

فريده : ده انتي كده عاوزاني اقعد معاكم خمس سنين بقى مش شهرين ولا ثلاثه .. ايه اللي انتي بتقوليه ده يا ماما .. يعني ايه ناس هتنسى اصلها عشان هيتجوزوا من العيله بتاعتنا .. فريده قعدت تضحك وتقول لها ده مستحيل يحصل ..

عاليه : وهو ده شرطي الوحيد على الجوازه دي يا فريده

. لازم ينسوا اصلهم وفصلهم ولازم يبداوا حياتهم من جديد ويتنقلوا نقله ثانيه عشان الناس ما تتكلمش علينا .. ساعتها بقى انا ممكن اوافق على الجوازه دي . فريده : انت حره يا ماما شوفي هتعملي ايه مع فارس وابقي قولي لي .. طلعت فريده على فوق كان فارس قاعد في الاوضه بتاعته دخلت قعدت معه شويه وكانت بتقول له : ما تقلقش يا فارس كل حاجه هتتحسن وهتبقى كويسه ..

فارس : مش عارف ماما عاوزه مني ايه .. مش هي من زمان نفسها اني اتجوز ونفسها تفرح بيا بتعمل ليه كده دلوقتي يا فريده .. انا باحب حور ومش عاوز اي حد غيرها .. هي عاوزه تجوزني اسما بالعافيه .. وانا عمري ما هاسامحها بعد اللي هي عملته ده والله يا فريده .. حور انسانه كويسه جدا واهلها ناس طيبين لولا ظروفهم بس ما كانتش ماما قالت عليها كده خالص .. وبعدين الظروف اللي هم فيها دي ما لهاش اي ذنب فيها .. بالع** دي بنت مكافحه وكانت بتشتغل وتصرف على اخواتها واهلها كلهم .. وباباها الله يرحمه كان قعيد وكانت بتصرف عليه وعلى علاجه يعني ما بتعملش اي حاجه غلط كان ممكن تتجوز اي واحد غني وفي ناس عرضوا عليها الجواز لكن هي ما كانتش بتوافق .. حور بتحبني بجد وانا باحبها وانا مش هستحمل عليها اي حاجه ولا هاتحمل اللي ماما بتعمله معها ده ..

فريده : انا عارفه كويس يا فارس ومقدره مشاعرك وعارفه انك بتحب حور .. وحور كمان بتحبك بس انت برده لازم تعذر ماما لانها ما تزعلش مني كانت نفسها تفرح بك مع واحده شبهك ونفس مستوى العيله بتاعتك انا مش باعيب في حور ولا باقول انها مش كويسه .. بالع** انا باحبها جدا .. لكن دي برده امك وعاوزاك تبقى احسن واحد وعاوزه تفتخر بك قدام الناس ..

فارس : طيب انا اعمل ايه دلوقت .. انا قلبي مش بيدي ولازم كلكم تساعدوني ..

فريده : خلاص هي ماما موافقه بس بشرط ان العيله بتاعه حور تيجي تقعد معنا هنا وتتعرف على عاداتنا وتقاليدنا عشان يبقوا زينا .. لان ماما بتقول انها عاوزه تفتخر بيك قدام الناس .. وما تزعلش مني العيله بتاعه حور بسيطه جدا ومش زينا خالص .. تقدر تقول لي في الفرح لما يجوا والناس تشوفهم هتقول علينا ايه .. انت لازم تقف معانا برده وتقدر كلام ماما ..

فارس : طبعا يا فريده الكلام ده كله مفهوم وانتم عندكم حق .. انا هاحاول اتكلم مع حور في الموضوع ده وهاشوفها هتعمل ايه ..

فريده : طيب يا فارس انا هادخل الاوضه بتاعتي دلوقتي عشان اشوف ادم لانه نايم بقى له وقت كبير وانا عاوزه اصحيه لانه ما كالش حاجه من الصبح .. فارس : ماشي يا فريده لما يفوق كده ابقى هاتيه يقعد معي شويه اصل وحشني .. انا فعلا ما شوفتوش من الصبح .. دخلت فريده الاوضه وفارس مسك تليفونه واتصل به حور ..

فارس : ازيك يا حور عامله ايه .. برده مش بتتكلمي معي .. قولي لي بس اي حد يزعلك وهتشوفي انا هاعمل فيه ايه ..

حور : انا مش زعلانه والله يا فارس انا متضايقه عشانك لاني حاسه اني مسببه لك مشاكل وازمه في البيت عندكم .. انا باحبك جدا وبحب عاليا هانم وباحب مدام فريده جدا .. ومش عاوزه يكون سبب الخلاف ما بينكم هو انا .. عشان كده قررت اني ابعد ..

فارس : تبعدي ايه يا حور بلاش تقولي الكلام ده ثاني انا مش هابعد عنك مهما اي احد قال لي .. انا ابيع الدنيا كلها عشانك يا حور اسمعي بس انتي كلامي وما تسمعيش لاي حد يكلمك .. اللي اسمها اسما دي عايزه توقع بيننا لانك عارفه كويس هي زمان كانت بتحبني قد ايه بلاش تسمعي كلامها .. المهم دلوقتي انا عاوز اقابلك بكرة ضروري انا عاوزك في موضوع مهم ..

يتيع