MATAAS NA ANG ARAW NANG MAGISING AKO kinabukasan. Hindi ko na matandaan kung papaano, at anong oras na ba ako nakatulog, at alam kong ganoon din ang nanay ko.
Katulad ko, ay ramdam ko rin ang pagkabalisa nito sa higaan. Biling baligtad din ito, at hindi mapakali.
Hindi rin makatulog.
At may palagay ako na ang katatapos lang din namin na usapan kagabi, ang siyang dahilan niyon.
Sa totoo lang ay hindi ko na alam kung ano ang kahahantungan ng relasyon namin ni Dos, sa mga sandaling ito.
Hindi pa nga namin nareresolbahan ang problema sa nanay ko, heto, at mayroon na namang dumating na panibagong problema.
Hindi ko pa alam kung paano kong sasabihin sa lalaki ang pagpunta rito ng ina niya, o kung kailangan ko pa bang sabihin dito ang bagay na iyon. Baka kasi mas lalo lang lumaki ang gulo.
