Mula sa loob ng kotse ay tanaw ni Dean ang isang maliit na kubo na nakatayo sa gilid ng malawak na tubuhang pag-aari ng kaniyang abuela. Sa loob ng maraming taon ay hindi gaanong nagbago ang hitsura ng bahay na iyon. Simple at maaliwalas pa rin tingnan.
Pero kahit maliit, alam ni Dean na punong-puno iyon ng kasiyahan noon. Ilang beses na rin siyang nakapasok noon sa bahay na iyon. Noong ang alam pa lang ng pamilya ni Joanna ay magclassmate lang sila, at gumagawa lang ng projects. Noong hindi pa siya pinaghihinalaan ng pamilya ni Joanna.
Mayamaya'y napabuntong-hininga si Dean nang matanaw niya ang paglabas ng isang may edad na babae, mula sa kubo. Siguradong iyon ang malayong tiyahin ni Joanna na sinasabi ni Suzane, na tumatao sa bahay kapag nasa trabaho si Joanna.
Bumaba si Dean ng kots
