Hindi mawala ang ngiti sa labi ni Valentina habang nakatingin sa kwintas na ibinigay sa kaniya ni Simon. 24k gold iyon at may kakapalan kaya naman nalaman niyang mahal pala ito. Ipinailalim niya ito sa suot niyang uniporme para hindi masyadong mapansin bago siya lumabas ng kaniyang kuwarto. Magaan ang kaniyang pakiramdam na para bang lumulutang siya sa alapaap.
"Hoy! Ang lawak ng ngiti mo ngayon, ha! Abot tainga! Anong mayroon sa ngiti mong iyan?" panunudyo ni Angela sa kaniya.
Nanlaki naman ang mga mata ni Valentina bago umayos ng pagkakatayo. "Ha? W- Wala lang. Masaya lang ako. M-Maayos ang gising ko.... mahaba ang tulog ko," palusot niya sabay tawa ng peke.
Tumaas naman ang kilay ni Angela. "Ay ganoon? Akala ko pa naman may kalandian ka na. Ako kasi may boyfriend na. Online boyfrien
