لم تكن خطيئتنا

رجفة قلب ...

#لم_تكن_خطيئتنا

نورا ناصر

تقرب مني خطوة و همس احبج!!

بانت على ملامحي علامات تعجب عيوني انفتحت على اوسعها باندهاش قلبي رجف ..

حركت شفايفي همست بتأتئه

- أ أنه .....

قبل لاأكمل تقرب اكثر لامست شفايفه شفايفي رسم قبلة رقيقة وعذبه بعفوية وشغف ماتعمق بيها بس طبعها ع شفايفي وابتعد مني بسرعة البرق.

نزلت جوه اركض ركض واحس طبع شفافه لسه بيه

قبلته تركت اثر على نفسيتي وشعوري اثر ساحر لايمكن ان انساه ..

طلعت من بيتهم رحت لبيتنا .. دخلت وسديت الباب عبالك راح يجي وراي ..

كعدت بالحديقه .. تمالكت نفسي وهديت ..

جنت منتظرة هاليوم وممنتظرته .. خايفه ومطمئنه بنفس الوقت ..

بالفترة الاخيره جنت حاسه يريد يعترف الي بحبه.

لان كل نظراته وحركاته وتصرفاته توحي بانه يريد

ان يعترف لي ..

لذلك جنت اتهرب منه .. خايفه وممرتاحه بسبب هجران بنت عمه اشواق .. من زمان تحجيلي عن شدة اعجابها بي .. وحبها اله .. واني كاتمة حبي اله بص*ري .. وهسه محتاره شوون؟ .. نوب شهالجرأة العنده شون هيج سوا وبسرعه باسني شون قليل ادب خجلني جيت اذوب .. انصهرت انصهرت ع كولة سميه

الجو بارد بالحديقه جرشت .. دخلت للبيت صارت بوجهي بيبيتي .. بسرعه درت وجهي احس طبعة البوسه بشفتي وخاف تنتبه عليه.

گالت .. هاا صفيه وينه اسلام؟

.. يااا حتى نسيت اني ليش جنت ابيت عمي قبل شويه. ..بارتباك كتلها مااشفته .. وعفتها ومشيت ظلت تدردم ولج مو كتلج صيحي لأسلام خلي يجي يصلح الهيتر؟

..ايييه بيبي يجي ابوي هو يصلحه الج ..

.. ولج ابوج يجي تعبان يالمدمغه

عفتها ورحت دخلت بالغرفه اتنفس سريع ..

سميه متغطيه كلها توقعتها نايمه .. ع حس انفاسي وخرت الغطا وكالت

.. شبيج جن راكض وراج جلب؟

.. اووف سميه

.. وجعوف احجي؟

.. رحت كعدت يمها ع جربايتها .. جيت اخرطلهه كل شي بس ترددت اكللها باسني خاف تروح ترزله تسويهه مخبله هذه ..

..صفيه تحجين شبيج لو اشوون؟

.. اسلام.

.. شبي كفران؟

.. لاتكولين عليه هيج

.. اكرها

.. جاا روحي مااحجيلج

.. تحجين لو اشوون

... كلي احبج

. اييبااه

.. شنووو

... اي ع الخير والبركه حبلت وجابت تنكه ..

... طاح حظج مو صوجج صوج التحجيلج.

.. دكملييي وبعد شصار؟ زين شبيج جنج راكض وراج جلب ولو هو سليم هم يعتبر جلب ..

.. سميه لا تصيرين غثيثه كلش.

.. لعد سولفي ..

.. المشكلة ومابيهه انه خايفه؟

.. من شنو؟

.. مو هجران جم مره تكللنه احبه ومعجبه بي يعني هي قبلي حبته ..

.. ولو هو مكروه واكرها واشوف دم سنوني ولااشوفه بس ميخالف راح احجيهه هو مدام يحبج انت شعليج بهجيره بت عمتي اشواك مدري عاگول ..

..بس هي تحبه من صدك

.. وانت قابل تحبينه من جذب؟

.. دقايق ودخلت علينه رقيه بالشفاطه .. وتعيط ابا ابا ابا لو ما نختل بالغطا جان حصلنا جم ركعه ..

سميه /ولج صفيه شبيهه جنهه بقرة هايجه ..

صفا/ ولج تكول كومن نضفن يالخايسات ..

سميه / يعني اكو بلغة الاشاره خايسات

صفا/ مو جاي اترجملج شبيج..

انا سميه .. وعيت ع الدنيا وعندي اختين

وامي وابوي مثل كتاكيت واحد يحب الثاني

اعرف اهل امي وجنه نزورهم ونبات عدهم

بس اهل ابوي لا ..

بس من داير عيد للثاني نروح لبيبيتي نشوفها

ونعيدهه ..

مرت ايام واشهر وسنين وحياتنه هي هيه ماتغيرت.

لكني مؤمنه بانه داخل كل انسان جانب مظلم راح يطلعه بيوم من الايام اذا ماأُتيحت اله الفرصه

وهيج صار وي امي .. اختلطت باصدقاء السوء

وتغيرت 180 درجة.. مصارله هواي هالشي ..

جنت افتهم وكبيرة .. اراقب امي تطلع

وخواتي لازمات البيت .. رقية وهي بعمر صغير

نضيفة ونادرة وصفا طباخة ماهرة ..

جنت اراقب امي واسمعها تحاجي ولد

اكثر من مره اسألها تكتلني وتكلي ماعليج وتهددني

اكثر وحده اكلت كتل هي انه ..

اشوفها تطلع ومن تجي اكلها لاتطلعين ابوي مايقبل

تكتلني .لان جانت خايفه افضحها عبالها اذا تض*بني راح تخوفني واسكت . لحد ما فد يوم مثل بركان و انفجر بداخلي ردت ارجعها امي الطيبه .. الفقيرة ردت احفظ سمعتنا وسمعة ابوي .. لان احنا بنات والناس راح يحملونا ذنب امنا .. وابوي لاهي بشغلته ..

رجعت من بره قبل جيت ابوي بنص ساعه. گتلها انت عاهر وانت ساقطه .. وانت ووو

لزمتني موتتني كتل خواتي يفكوني ماتفك حتى دم طلعت مني خرمشتني بكل جسمي ..

وتركتني وطبت للحمام تسبح .. انق*فت منها كرهتها.

من اجه ابوي كل شي گتله .. راح دور بجنطتها شاف تليفون غير تليفونها وفلوس وذهب ..

شفته يض*ب بيها وهي تكوم ولا كانه يض*بها

يطكها بو**ي يرگعها بالكاع ولاكانه شي

شنو هالقوه العدها ..

ابوي فقير وحتى دجاجه مايهون علي يذبح

انقهرت عليه من شفته شكد ضايج وم**ور ومهزوز.

بعد هي الحادثه طلگها واخذنه لبيت اهله ..

امي ماعرفنا عنها شي ..

صار ابوي قاسي علينا بس رقية يحبها ..

عمي واولاد عمي يكرهونا كلش ..

صرنا منبوذين .. بسبب امنا ..

مرت ايام هزني هزني الحنين لأمي .الي مااعرف عنها شي. تندمت ع سويته

عظيت اصابعي مئات المرات .. من شدة الحسره ع ايامنا واحنا سوا .ع كعدتنه نومتنه اكلنه واحنه ملتمين ع السفره. بس مايفيد الندم تفرقنا وابوي كره امي شكد حاولت ترد اله مستحيل بعد الخيانه يسامحها .. هانت رجولته وماحافظت على سمعته ..

توسلته يرجعها. طردني من يمه وكال اذا عدتيها تنكتلين .. سكتت

مرت ايام وليالي اتحسر وابجي وحدي ..

مو كدام احد مااحب ابين ضعفي لاقرب شخص مني والي هي صفا توأمي .. جانت تخلي راسها على كتفي وتبجي .. بس انه دمعتي عنيده ماتنزل كدام احد.

جنت افكر بيني وبين نفسي واكول لو منطيه امي فرصه لو مكايله لابوي عليها جان يمكن تعدلت وتابت بس اني متسرعه ورعنه .. فضحت امي كدام ابوي اني مااستاهل السعاده .. وتسببت بفراقهم وضياعنا

جان ابويه من يكولي على شي وانسى اسوي او اتعاجز اسوي .. يكلي مابيج خير.

هالجمله تألمني .. توجعني .. واتذكر خطأي .. تمنيت يكون الاخير ..

فد يوم جانت صفا بالمدرسه وانه مامداومه ورقيه لاهيه تنضف عدها استعداد تنضف من السطح للشارع وتعيد مره مرتين و3.

سمعت تليفون بيبيتي يرن .. رحت اخذته باوعت بالشاشه رقم غريب

جاوبته ..

سمعت صوتها .. اي هي صوت امي عرفته .. عرفت نبرتها .. مستحيل انساها ..

گلت .. الو ماما؟ ؟

.. منو انت صفا؟

انقهرت اكيد حاقده عليه .. وكارهتني .. ماجاوبت ع سؤالها كتلها شلونج؟

.. زينه حمدلله ناقصني انتم ..

.. احنا هم مشتاقيلج ..ارجف واحجي .. خايفه تعرفني ..

.. مكتيلي انت صفا لو سميه

.. المفروض انت تعرفين صوت منو بدون مااگلج.

بعدين انت اشو ماكو نسيتينا؟

.. لو ناسيتكم ماجان خابرت .. بس ملتهية بزواجي

.. انصدمت شهگت تزوجتي؟

.. خو مااظل بعدني شابه .. عمري 35 سنه وحلوه والف من يتمناني ..

.. الف مب**ك تتهنين ان شاءالله ..

بجيت ب**ت دموعي نزلت شلال ع خدي جوتني انقهرت كلش .. نهيت المكالمه ..

بدون ماتعرفني منو ..

بقيت اليوم كله افكر ومقهوره .. ليش تزوجت جنت اريدها ترجع مشتاقة للمتنا سوا ..

مرت ايام ظلت تتواصل وياي

مره گطعت وظل بالي عليها ..

بعد فترة خابرت جاوبتها سألتها ليش ماكو ..

كالت جنت بتركيا ..

هاا شنو تسوين ..

شسوي اتونس،..

ها حلوه تركية

اتجنننن تردين اخذج الها؟

ياريت ..

تردين نروح بعد مانرجع ..؟

وابوي؟

شبي؟

ماراح يقبل ..

لايقبل يولي انه راح انتشلكم من الواقع الي انتم بي ..

خاف يعرف ومن نرجع يكتلنه ..

مانرجع شبيج حبيبتي صفا ..

بقهر گتلها انه سميه مو صفا ..

ماكو فرق انتوا الثلاثه بناتي قطعه مني .. راح ادز خالج جابر الكم ينطيج شغلات جبتها الكم من تركيا وهذا الموضوع نحجي بي بعدين ..

سديته منها ..

حاجيت صفا كتلها جاي اتواصل ويا امي ..

خافت لان ابوي محذرنه ..

دزتلنه ملابس حلوه كلش فساتين جينزات وفلوس فرحنه كلش ..

جانت توزز بينه ع ابوي لاتطبخوله اكل يولي اذاكم بعدكم عني مرات تأثر عليه ومنبقي لابونه اكل ..

ظلت تلح بموضوع الهجره تريد تاخذنا وتروح بينا

واحنه هم ملينه من وضعنا هذا .. لا نطلع اربع اشهر العطله معشعشين بالبيت لا نشتري ملابس الاكل كوه ابوي شويه بخيل ولازم نفسه ..

صفا ...

مرت اشهر وانه اتهرب من اسلام ماشوفه

مرات نطلع للمدرسه اتجنبه كلش واختل ورا سميه لو ادخل للبيت ..

امتحنه صف خامس انه ادبي وسمية علمي ..

واجه يوم نروح نستلم النتيجة .. وصيت ابوي يوصلنا.

كعدت الصبح بدلت .. لبست تنوره سوده وبدي رصاصي .. من كدام علي قماش تول خفيف .. وخرز ابيض .. شكد كعدت سميه تكوم حتى تبدل ماقبلت

كالت ماروح اريد انام انت جيبي النتيجه ..

عفتها لفيت شالي اسود وكعدت انتظر ابوي ..

شاف*ني بيبيتي ..

.. هاا اتانين اسلام؟

.. بلعمت اسمه يوترني .. گتلها لابيبي ابوي راح يجي يوديني للمدرسه استلم النتيجه ..

.. جا هو گلي رايح بكروه للتنومه ويمكن يتأخر وخلي إسلام يوديجن ..

بهالاثناء سمعت صوت اسلام يم الباب يتحمحم احم احم يلا وينجن ..

خذيت جنطتي وكمت من ع الكرسي كلت ياا صخام بصوت مسموع ورحت اركض جوه بالغرفه طبخت ببطن رقيه نايمه بالكاع وشمرت روحي على سميه اجرجر بيها من شعرها .. كومي حبوبه امشي وياي. .

ماكو ولاجنه تسمعني.

باوعت لرقية تأشرلي بمعنى شنو شصار ..

رحت يمها بوستها اشرتلهه عذريني دست عليج.

ماادري ..

اكعد بسمية ماتكعد كللش .. سمعت صوته يم باب الغرفه .. يلله صفا لاتأخريني ..

ودفعت بيبيتي الباب .. ولج يلله جاي يتانيج ..

طفرت من مكاني ..

بيبي خلي يروح مااروح ويا ..

.. جا المن بدلتي يحظيي ..

سمعت صوته بدون مااشوفه ..

صفاا انه طالع انتظرج يم باب المطبخ اذا ماطلعتي اجي بيدي اطلعج ..

ظليت اهفي ع وجهي .. يبوووي عرف مستحيه منه ومااريد اشوفه يريد يطلعني بالگوه ..

طلعت امشي ومااريد اوصل اله .. وصلت لباب المطبخ باوعت من جام شفته واكف. وناطي ظهر للباب .. فتحت الباب ..

اندار عليه .. نزع النظارات .جتي عيونه بعيون بعض. استحيت نصيت راسي

. اله تنزع النظارات .. حجيت بسري ..

لابس قميص رصاصي .. بنطرون بيجي ..

اسلام اسمر مملوح .. اكثر شي يميزه عيونه نص وجهه عيون دائما خصلات شعره ع جبينه

طويل رشيق ..

مخلص معهد تقني ويشتغل حارس بالمول ..

لان تعيينات ماكو ..

گال شونج صفاوي ..

رفعت خشمي عليه .. گتله معليك بيه ولاتحجي وياي وصلني وردني وانت ساكت ..

مشيت گدامه .. اجه ورايه ..

گال .. صاير شي ..

.. لا مبين ناسي نفسك هواي استاذ إسلام وشسويت اخر مره ..

طلعنه من البيت نمشي امشي حييل مااريده يقترب مني لكن من دون جدوه هو يمشي سريع ويلحگني ..

سمعت ضحكته .. هزت مشاعري .. ع اثرها رقص قلبي .. ياربي ليش هيج يصير بيه ..

اسلام .. صفا اوكفي ..

.. وين اوكف بالشارع تخبلت .. لزمني

وكفنه يم سيارة جيرانه ..

محد بالشارع الساعه 7 ونص ..

كال .. رفعي راسج اشوف ..

رفعت راسي .. مخلي نظاراته ع جبينه .. مديت ايدي خجلت من نظراته نزلتهم ع عيونه ..

ضحك گال والله ماادري شون سويتها طلعت مني بعفوية ولاارادي ابد ماجنت مقرر ابو

گتله اسكت يلله نمشي .. مشينه ب**ت .. نمشي وايده تطخ بيدي لحد مالزمها .. اريد افلتها

گال .. عوفيها اذا شفت احد اتركهاا ..

عفته لازمني حسيت بحرارة مشاعر وصلت لقلبي ..

الخوف ماتركني ولا تأنيب الضمير ..

ايدي بايده بالي يم هجران خاف تشوفني شراح تكول عني .. اذا عرفت اني اخذت منها حبها الي من طرف واحد .. وهي دائما تحجيلي عن مدى اعجابها بي ..

وصلنه للمدرسة .. استلمت النتيجة .. ناجحه ..

وسميه بدرس واحد اكمال .. رجعت للبيت ..

مرت الايام نتواصل ويا امي .. علاقتي بأسلام تكبر وتزيد يوم عن يوم .. هجران من اشوفها ارتبك واذا اسلام موجود انهزم خاف تنتبه ع نظراته .. لان نظراته مفضوحه ..

ايام يجي لبيتنا نكعد بالحديقة نحجي .. اذا ابوي ماكو .. فد يوم كاعدين بالحديقة .. گلي صفا اريد اخطبج ..

توترت كلش معرفت شجاوب گتله ها؟ ..

گال اريد اخطبج انه مخلص دراسه و اشتغل واكدر اكون نفسي .. وانت تعرفين انا مو من هي الشباب الي ابذر واصرف يعني اكدر بهالفتره اكون نفسي واذا ع دراستج وعد مني اخليج تكملين .. صفا انه احبج وبعدج عني ماجاي اكدر اتحمله اريدج يمي شريكة حياتي وبالحلال شتگولين .. ؟

صفا .. تفاجئت ظليت اباوعله بشغف فرحانه ومافرحانه

تذكرت هجران موبيدي انقهر عليها وهي تحاول تجذب انظاره الها .. صفنت بوجهه .. شراح اكوله

ظل يحرك كف ايده قريب وجهي ..

.. صفا صفا وين صفنتي الصفنه مو الج لابو ذانات الكبار ..

ابتسمت ..حاولت .. احجي .. قاطعني

گلي من يجي عمي بالليل نجي انه وامي نحاجي.

تره امي هم تعرف وانت تدرين شگد تحبج هي ..

.تفاجئت اكثر سكتت فكرت شوي

خلي اشوف حل وافاتح هجران بالموضوع يلله خلي تعرف هو يحبني خلي اكللهه خطبني واخذ رأيها نطقت . لااسلام اجلهه ..

.. باستغراب .. ليش؟

.. خلي اكمل السادس بالاول مااريد شي يلهيني ..

.. اللهيج؟ ؟تحجين صدك انه كبل كل شي كتلج تكملين وافتخر اذا كملتي دراستج

:بس؟ !!

:بلا تدرين حطمتي امالي ضوجتيني صارلج ساعه صافنه يعني شمتوقعه من علاقتنا غير الزواج وانه مو زغير عمري 23 سنه ..

.. اسلام! !

.. اشش مااريد اسمع شي .. علاقتنا مجرد تسلية بالنسبه الج مو؟

:لااا والله

:بله خليتي بالي يروح لبعيد .تدرين؟ .

.. شتقصد بلله؟ووين راح بالك؟

.. مااقصد .. انه رايح باااي ..

اسلام اسلام .. صرت مقابيله حاولت افهمه او افهم منه .. رفع اصبع السبابه بوجهي گلي وخري لاتحاولين وطلع ..

كعدت بالحديقه .. ضجت كلش هسه شسويت وهيج گب عليه عبالك تنور حطب. !!!

كمت .. اريد ادخل شفت رقيه تنضف بالباب تأشرلي وترفع الماسحه .. بمعنى اذا تدخلين اض*بج وتبتسم انه مو بحالها .. درت دخلت من باب المطبخ ..

رحت للغرفه .. سميه جاي تحجي بالتليفون ويا امي.

اشرتلي تحجين وياها .. مالي خلك گتلها لا ..

انهت المكالمه .. كامت اخذت الخاولي وملابسها ..

.. راح تسبحين

.. اي ليش؟

.. اريد احجي وياج ضايجه ..

..هف احجي .. تركت الخاولي والملابس كعدت يمها.

.. اذا تضوجين مااحجي ..

.. احجي لج احجي واسمعي كلام اختج الجبيره ..

.. منو كال انت الجبيرة اصلا امي ولا مره كالت منو اكبر ..

.. مبينه انه افهم منج اقلاها ماوكعت بالحب من اول نظرة واني عمري لسه 17سنه ومحتارة وجايه تستشاريني ههههاي يعني انه عقلي اكبر منج ..

.. هذا مو مقياس .. يعني اليوكع بالحب وهو زغير مايفتهم تره الحب يجي بدون ميعاد بس انت بلا مشاعر ./…

.. لا مقياس .. ماتكدرين تقنعيني .. الحب اختيار ولازم يكون اختيار صح ..

.. اوف.

…ممكن تحجين شصاير ولاتاخريني حمضت حررر اريد اسبح ..

صفا/ حجيتلها كل حرف وكل كلمه گالها اسلام …

سميه/ مممم

… ماعرفت ليش كلي خليتي بالي راح بعيد ..

…صفا انت مقتنعة باسلام؟

…ليش و شبي اسلام مابي شي يتعيب واذا على شغله تره هذا حال البلد شنسويله تعيينات ماكو نصبر والله كريم ..يعني اذا اريد احب لازم احب مهندس لو دكتور لوو..

سمية/ تقربت منها ض*بت باصبعي على راسها .. هنا عقل لو تنك؟ تره مو قصدي ع شغله ووضعه المادي

لج بابا يقصد انت مثل امج تدورين تسلية وكذا يقصد انت موزينه حالج حال اماليد افتحي عقلج زين اهل ابوي كلهم يباوعولنه بعينهم الزغيره ابسط مثال اشواق سليمان عمرهم ماكلولنه بنات ايوب كله بنات اماليد وهم قاصدينها غير شي وكأنما يفشرون من يكولون هيج ..

…بس عمه امتثال (ام اسلام) … مو مثلهم تحبنه وقلبها طيب

… يمعوده المثل يكول العمه لو حبت الجنه ابليس دخل للجنه .. لابد ويجي يوم تتعاركن وراح تذكرج بامج وخيانتها وو (كرصتها)

كملت …واذكريني عود.

...سميه انه احبه وهو هم ومااعتقد يقصد هيج من گلي..

: صفا عقلج براسج تعرفين خلاصج

: مامقتنعة بكلامج هذا كله سميه .. يحبني وباسني

:هه باسج؟ كبر شون تسمحيله؟

الاتقتنعين انت حرة .. بلا حب بلا هم … الواحد يشتري راحة باله هواي احسن.

اروح اسبح.

سميه

اخذت ملابسي ودخلت للحمام .. يمكن بداخلي اشياء ع** الي كلته لصفا اني

هوايه افكر بالحب جاي ع بالي اعيش قصة

الحب الي يقتحم قلبي ويحتل مشاعري وفكري، يستوطن روحي ويزلزل كياني ،ينتشلني من وحدتي ويملا فراغ حياتي القاتل ويغامر بيه لأعلى درجات العشق والهيام

هذا الحب الي احلم بي مو مجرد حب ابن العم لبنت عمه وبالنهايه راح تتزوجه شائت ام أبت ..

لا لازم يكون بي مغامره حتى استلذ بي .. ممم بس وينه بعد وكت عليه .. مااحب حب سنوات المراهقه

احس مابي لذه يكون بي العاشق..حاله حال الطفل يتعلق باي شخص يلبيله وينطي اي شي لا.

يعجبني الحب الي يبدي بعد عمر 21سنه حيث يكون بي العاشق اكثر نضوج.

كلش عاجبني اخوض غماره ويا فارس احلامي الي موجود بمخيلتي وجاي ادور عليه ع ارض الواقع وماجاي الگاه.

اريده شخصية قويه وبنفس الوقت ماراح اخلي يكدرلي من باب انه االرجل يحب المراه الي تبجي مو الي تبجي عليه بس خاف هو يبجيني؟لا اني محد يكدر يبجيني وطبعا اريده وسيم والكل يحسدني عليه.

يمكن بالغت مو؟

علگت ملابسي والخاولي وبديت اسبح .. طبعا الماي حار خررب .. خروس تاخذ الماي االبارد للمسح

ويبقى الحار يصلللي اووف .. طبعا احنه نملي السطل الكبير مالت الحمام ماي حتى يبرد ونسبح بي وهي اختي تكرفه كله وتمسح بي ..اووف شكول عليك فارس احلامي جنت افكر بيك و انصليت بسببك .

صفا …

بقينه كم يوم بعاد عن بعض اني واسلام.

ضجت كلش قررت اروح يم ايناس اخته واشوف ردة فعله اذا شافني شيسوي .

لبست بشت وشال

هم بصفنه كلش طلعت من الغرفه رحت للهول

اريد اطلع شاف*ني سميه، جانت كاعده ع القنفه ومخليه رجل على رجل وتاكل شاميه وتباوع توم وجيري هنيالهه بلا هم

بدون ماتباوعلي وعيونها شارده ع تلفزيون وكانها مندمجه

بس الظاهر مو هيج

لان ببرود گالت

وين؟

رايحه يم ايناس.

حتى تشوفين اسلام؟

دنگت سكتت.

اي روحي حتى يگول عليج جايه تتوسل ورخيصه مثل امها

بربج سميه مقتنعه بهالحجي؟

اي مقتنعه .

اسلام مايسويها

شعليه

سكتت شفتها كامت اخذت تليفون بيبيتي من ع البوفيه

قهرتني بالحجي ردت اقهرها بس معرفت شون فكرت اخوفها.

رحت يمها كتلها بصوت ناصي

: خففي من الحجي وي امي تره اذا لگفج ابوي مايرحمج .

باوعتلي ورافعه حاجبها كالت دروحي يم حبيب القلب تره مو غلط شكه انت مثل امي ماتكدرين بدون رجال وهي بعدج زغيرة وهيج عود اذا كبرتي وماحصلتيلج واحد شسوين؟

:انجبي سميه انه اختج شون تحجين عليه هيج؟

:واماليد امي هم لاتنسين ومبين ثنينجن نفس النسخه.

: لزمتها من شعرها صكيت ع اسناني كتلهه احترمي نفسج انه مو مثل امج حبيت ماارتكبت جريمه.

:الحب اكبر جريمة.

ض*بتني راشدي ع وجهي هديت شعرها دفعتني ع القنفه.

كمت من طيحتي وانه مخليه ايدي ع خدي الض*بته هجمت عليها لزمتها من شعرها

لزمت شعري صارت منافسه منو تجر اكثر اثنينه توجعنا

من بين وجعي گتلها هدي وانه هد.

سميه / لا انت هدي بالاول .

بهالاثناء اجت بيبيتي گالت يبوووي صخام صخمجن ماتملن من العرايك ولجن انه بكدجن ثنين ع ايدي وواحد ببطني.

تركنا بعض ..

سميه: شبيج اصرخين زكيه ليكلك واحد ميتلج واحد.

ام ايوب: ولج انت ام ل**ن اخخخ (عضت اصبعها)

انت دواج ايوب هو خل يجي اله اكله عليج وچماله تفاول طايحة الحظ وماتكول بيبي المامتربايه.

سميه: اخذت التليفون ودخلت جوه ببرود وخليتها دردم وراي

ام ايوب: خلي يجي ابوج اله اگله عليج (تحجي وتن*د)

صفا: دخلت وره سميه نزعت البشت والشال وبقيت بالدشداشه.

كتلها عاجبج الي صار هاي راح تكول لابوي علينه.

: روحي لاستاذ اسلام يوخر قلقج ببوسه.

: ليش تخليني اندم لان كتلج وفعلا ندمت اصلا ماجنت ناويه اكول.

: بي خير يحافظ عليج مو كاعد يمطك بيج.

: بس مره وحده وماعادهه.

: شعليه

: والله انت حقيرة اله اكول لبوي تخابرين امي من وراه.

: هه وانه اكله هم اسلام يبوس بيها ولاتنسسين تصير الكتله كتلتين لان انت هم تحاجين امي.

: لا عفيه لاتكليله سوسو.

:اي هسه صرت سوسو مو مساع تمشعين بيه.

: اريدج تساعديني انت مو اختي توأمي لعد منو الي افضفضله منو احجيله غيرج انت رقيه ومااعتقد تفهم .

: صفا مااكدر افتيلج بموضوع اسلام انت تدرين بيه اكرها وهنا خاف تتغلب العاطفه على العقل واخاف ارتكب خطأ بحقكم واظلمكم ..

: هففف حيره ياسميه.

: تقربت منها كعدت تربعت بصفها. ماكو حيرة ياصفا انت كعدي واحجي وي نفسج وابدي من حب واعجاب هجران لاسلام لحد شخصية اسلام وطبعه الحياة نعيشها مره وحده ولازم نلعبها صح.

احنه دائما هيج نتعارك ووحده تكتل الثانيه بعدها نرجع نحجي ونسولف بدون حتى مانعتذر لبعض او نتذكر الصار بينه .

العصر اجه ابوي وبيبي خرطتله الاكو والماكو

صاحلنه اثنينه ض*بني راشديين وصفا راشدي واحد بس فرنه فررر وطبع ايدينه ع خدودنه.

سميه اكلت راشديين لان علت صوتها وتجاوزت على بيبيتي.

متعودين شنسوي اكلنا وسكتنا.

يوم ثاني كاعده بالحديقه العصر اسمع صوت همس باوعت شفته اسلام من السياج سياجهم ناصي يباوعلي جتي عيني بعينه ابتسم ظل يأشرلي تعاي.

تحسرت ورحت يم السياج.

ها خير

شبيج كالبه وجهج

ها فكت؟

شنو هي؟

الطنگوره مالتك ..

مم كعدت وفكرت ويا نفسي وحقج هذا مستقبلج ولازم تفكرين بي صفاوي حبيبي مرات اصير عصبي لازم تعذريني.

ابتسمت فرحانه مشتاقتله ظلينه نسولف سمعت صوت سيارة ابوي دخلت من باب المطبخ صارت سميه گبالي تهز براسها بعدم رضا باوعتلها باستغراب

:شبيج سميه؟

:عكب اهانته الج رحتي تركضين بس همسلج مالت اي والله مالت.

عاف*ني ودخلت تندمت صح تسرعت ورحتله لو شويه بايعه ثگل عليه.

اجه ابوي صبيتله غدا.

سميه : جاي احاجي امي بالغرفه

اماليد: اي سمية عدكم نت بالبيت

: لا ماعدنه

:والله لو عندي اخليلجن كل وحده تليفون

:صدك؟

: اي زين و ابوج هم ماعنده نت؟

: لا عنده مفعل ع رصيد

: ها عشتو والله زين ماسامعته يحاجي بنات؟

: لا ماحاطه بالي اله

: بلله حطي بالج

:ليش هه تغارين عليه.

: دروحي لا هيج فضول.

دخلت صفا .. تخبلتي جاي تحاجين امي وابوي هنا بلله لكفج يموتج والله.

.

: خليطير موتناااا.

صادف عيد ميلاد ايناس وعمتي اشواق كل سنة تسوي تحبهه تكول يتيمه

ايناس واسلام هم لوحيدين لأمهم لان ابوهم توفى بعد ولادة ايناس وامهم عمه

امتثال بقت ماتزوجت.

لبست فستان ماروني قصير لحد الركبه وجواه ستريج الكتف مالته كيبور ثخين.

سميه لبست سلفي اسود رداناته بف وبيهن خرز وجواه جينز والسلفي مفتوح من الصفحتين.

رقيه لبست قميص بصلي وفوكه يلك لحد الركبه مخطط بابيض واسود وبصلي وجينز شعرها مفتوح قصير مامحجبه ماتحب الحجاب وابوي مايضغط عليها.

ماعدنه هديه نوديلها شكد توسلنا بابوي كال نسيت

سويت كيكه اسفنجيه كلش حلوه وزينتها وحشيتها باللم**رات والنوتيلا والكريما واخذتها.

رحنه شفنه الكل متجمعين .. ملكة الحفل عمه اشواق الفخامه كلها لابس كوستم ارجواني والا**سوارت المناسبه والمكياج لايك لعمرها ..

بناتها رجوان وهجران

رضوان ابن عمتي امال المرحومه الي ربته عمه اشواق من اول مااتوفت امه وسمته اسم وزن مثل اولادها امان ورجوان و هجران.

سلمت عليها بوستها وبوست رقيه وصل السره لسميه دنگت تريد تبوسها ماباستها ولاردت عليها سلامها

حسيت سميه براكين غضب وتوجرت بيها لو منها انحب وابجي بس مااعرف شنو من قوة عدها وتحملتها.

راحت وكفت يم القنفه لان ماكو مكان

عائلة عمو سليمان كلهم جايين

بقيت صافنه ليش عمه اشواق تكره سميه بالذات

باوعت لسميه تباوع للكل بنظرات عدم رضا حتى لابويه الي محتضن رقيه من اكتافها وكاعد.

الكل كاعدين بس احنا التوأم المنبوذ واكفين

باوعت لرضوان هو بدوره جان يباوع لسميه بنظرات اعجاب وهي مو معبرته حيل صعبه هالسميه ومو اي احد يعجبها.

بالرغم من انه رضوان وسيم وطالب كلية طب اسنان

واهل ابو ناس متمكنين بس سميه ماتقلده

صرت اشك بيها تحب !!

رجوان واكفه بصف رضوان وماراضيه تتركه عبالك راح يطير منها .

دخل اسلام باوعتله قلبي فرح مااعرف ليش نظراتي راحت لهجران شفتها فاتحه عيونها عليه وتباوعله بشغف وهو يضحك ويا ابو امان زوج عمه اشواق

اسلام لابس بنطرون اسود و قميص اوف وايت ورباط اسود ومشكل رداناته ومبين وشم على ايده شويه مبهم بس الي يركز بي كلش يفهمه بي حرفين A ,S ومغلف بنقشه مظلمتهم شويه.

الكيكه والتجهيزات عمه اشواق مختارتها

عليها صورة ايناس.

عمه اشواق ماقبلت نخلي كيكتنه ع طاوله وودوها للمطبخ مو من مقامها .

اجت يمنه هجران تشوفني الصور بالموبايل رايحين لأربيل گالت شوفي حتى لجافي لاند بالسليمانيه هم ودانه أمان اسكتي تجنن صدك خياليه.

سميه دارت وجهه وسوت نفسها ملتهية بغير شي

حسيتها ماتريد تشوف حتى لاتنقهر، سميه دائما تحب تكون بعيده عن اي شي يقهرها.

باوعت شفت شاب مرتب وحلو يشبه الاعلامي علي عذاب كتلهه منو هذا

: لج هذا امان اخوي شنو ماتعرفينه

: لا ولا مره شايفته

:اي هو صارله هواي ماجاي للبصره يداوم ببغداد كلية لغات وبالعطله يروح لعمي باربيل يشتغل بشركة طيران.

:اي

:اي وهي فرح بنت عمي امها كرديه وهي الوحيده الهم.

شفت الصور وكملت انطيتها الموبايل صاحتها بيبي كلتلها تعاي شوفيني امان كلش عن عليه (مشتاقتله)

راحت يم بيبيتي.

باوعت لاسلام يسويلي حركات بعيونه عود تعالي وراي.

طلع من الصاله بس انه بقيت خايفه اروح وراه

شفت ابوي وعمي وابو امان ورضوان طلعوا للحديقه والكل ملتهين اريد اروح وراه لزمتني سميه من مع**ي تباوعلي وتخزر صكت اسنانها وطلعت حجايه من حلگها وين؟

اريد احجي هدتني كالت روحي شعليه.

سميه ..

من شفتها تريد تروح وراه انفعلت كلش وشفته ياشرلهه وهي هجران واذا عرفت بيهم راح تفضحهم بنص الحفله بدون ماتهتم بس بعدين هدات كتلهه روحي بس ديري بالج وحركت بؤبؤ عيني باتجاه هجران.

هزت راسهه برضا وراحت.

خليت اذني يم اشواق وزكيه شنو يحجن

اشواق: يمه جبتلج ديرما وكحل حجر وكم قطعة قماش ها مو تنطينهن لبنات اماليد انت وديهن للخياطه تخيطهن ولبسيهن.

سميه: اسمعها وابدي افترسهه وعوكا مشتريتهن من شارع عبدالله ابن علي وتكول من اربيل عزيات عليج اشواك.

طلعت من الصاله ادور صفا وينها بس لا هسه كاضينها امح واميح الم***فين.

بالممر شفت رضوان دخل من الباب الثاني للبيت

ردت ادور واغير طريقي صاحني

سميه.

درت عليه كتله نعم

اي شخبارج سميه؟

يحجي ويباوعلي بحيرة. الله يف** عيونك لو بيدي جنطه جان ركعته بيها بس حاولت قدر الامكان اكون مؤدبه واحاجيه بهدوء واحترام كتله ماعندي اخبار

ضحك بهدوء وهذا طبعه

:اكو واحد ماعنده اخبار؟

:اي انه!

: اي سميه نجحتي؟

:لا اكمال بدرس واحد

: ها يادرس؟

: كيميا

: شعجب موزينه بيهه ؟

: لا زينه بس بيوم الامتحان نمت وماقريت عدل وعاندت نفسي وماجاوبت.

: صدك تحجين؟

: اي مجذبه عليك من قبل؟

: ههه لا بس دائما اكول عنج انت مختلفه عن الكل

: شون مختلفة مثلا حواجبي بخدي لو خشمي بكصتي؟

: ههههه لا مو هيج المهم شنو مقرره تدخلين كلية؟

: مو مخليه ابالي شي خلي انجح من الخامس بالاول.

: ان شاءالله تنجحين واي شي تحتاجين اني موجود اجي افهمج المواد الي ماتفهمينهم واتمنى تطلعين طبيه.

: طبيه! ! لا لا ماادبرها

: لا تدبرينهه انت ذكيه مبين من عيونج.

صفا

صاحني اسلام رحت يمه ظل يباوعلي بنهم

كال هي شنو شطالعه ولج ديري بالج لا يخلونج مكان الكيكه.

ضحكت عجبك فستاني.

يجنن شنو هالذوق مرتي الحلوه ذواقه.

لا هذا الفستان امي دزته.

امج؟ ؟؟!! تحجين صدك وانت شون تاخذينه منها؟

شبيك اسلام على كيفك.

امج وحده استغفر الله مااريدج تتواصلين وياها او تاخذين منها شي ابد مفهووم؟

اسلام هذه مهما يكون امي امي جاي تفهم وبعدين منو يشتريلنه غيرها ابوي روحه ودنيته سيارته ولامهتم النه.

انه اشتريلج والي يعجبج والي تردينه سجليلي بورقه كل شي وانه ماقصر.

لا بصفتك شنو تشتريلي انه مااسمح لنفسي اخذ منك اي شي.

انت الي مخليتني غريب بالنسبه الج وماتخليني اخطبخ حتى تصير علاقتنا اوسع مو اشوفج واحاجيج بالختله.

سكتت.

حسيته عصب ونزل ع امي نزله معدله كال هي ريحتها طالعه امج كلش موخوش هي واهلهه ورجلها واذا سمعت او عرفت متواصله وياها مايحصل خير والله اوصلهه لعمامي وانت تعرفين شون راح يتصرفون وياجن.

ماتوقعتك هيج اسلام عفته اريد اروح سحبني من ايدي يريد يخليني ع ص*ره كال تعاي صفا بعدنه ماخلصنه

خليت ايدي ع ص*ره ودفعته كتله وخرر

طلعت من الغرفه بعصبيه

بعدني توه نازله اول مرحله من الدرج صارت كبالي هجران.

متت بدمي جيت اطيح من الدرج معقوله سمعت كل شي؟ اذا سامعه شي راح تصير الفضيحه فضيحتين امي واسلام

وللحكايه بقيه.