CHAPTER ELEVEN: Happy Birthday, Sam
Gabi na nang makauwi si Sam sa kanyang unit. Lagpas alas-dose na nang mga oras na ‘yun. Ibig sabihin lang nito ay sumapit na ang kanyang kaarawan. Nadagdagan na naman ang kanyang edad.
Tiningnan niya ang kanyang cellphone. May mga maagang bumati sa kanya ng, ‘Maligayang Kaarawan.’ Kasama na rin doon ang text message mula kay Rick. Hindi niya tuloy lubos maisip kung tama ba ang ginagawa niya kay Rick. Hindi pa man niya nasisigurado ang hinala pero naaawa siya rito.
“Sana lang talaga, Rick…” naibulong niya sa hangin.
Umihip nang malakas ang hangin. Nanuot ang lamig sa kanyang buong katawan. Kahit na tag-init, malamig pa rin ang simoy ng hangin dahil sa mga namumuong bagyo sa bansa.
