Hindi ko alam kung paano magpaalam kay Mama pero mukhang nakatakda yata talaga na sasama ako sa outing nina Ate Ellie at ng boyfriend nito dahil bigla-bigla ay lumuwas ng probinsya sila ni Papa kagabi at mananatili sila roon hanggang sa susunod na araw.
Ang ipinaalam ko kay Mama sa tawag ay gagawa ako ng group activity ngayong araw. Dinagdagan ko rin nang konting drama kung gaano kahirap ang gagawin namin para may dahilan kung bakit ako gagabihin. Effective naman yata ang ginawa ko dahil pagkatapos nang ilang mga katanungan ay pinayagan na ako.
Nabanggit ko kay Nana Saling ang tungkol sa lakad kong ito na baka gabihin ako mamaya at tulad nang dati ay pagtatakpan niya ako kapag tatawag si Mama na imposible namang mangyayari dahil nitong mga nakaraan ay lumuluwag na ang paghihigpit nito sa
