Narinig ko ang impit nilang mga halakhak na halatang pinipigilan lang na matawa sa mga sandaling iyon. Hindi ko suka't akalain na ganun pa rin ang pagkakaibigan na mayroon sila ngayon. Kahibangan man pero hindi ko mapigilan ang aking sarili na mainggit sa kanilang napatagal na relasyon. Ganun na kami dati. Noong mga panahong nasa huling taon kami sa pag-aaral. Hindi man naging maganda ang simula ng relasyon na mayroon ako sa kanila, humantong naman iyon sa matatag na pagkakaibigan sa pagdaan ng mga araw. Binuwag ko lang iyon at sinayang. Hindi inalagaan at pinahalagahan kahit na alam ko kung paano nila ako pahalagahan noon.
“Oo nga, naka-move on na ako sa kanya. Matagal na. Paulit-ulit? Ilang beses ko pa bang ipapaliwanag iyon sa inyong dalawa? Move on na. Hindi na natin kailangang balika
