PAPALUBOG na ang araw nang makarating sila sa dalampasigan ng isla nina Anika. Maliit lang ‘yon at hindi tulad ng mga isla sa karagatan na ‘yon na tourist attraction, hindi maputi ang buhangin doon. Nakahilera ang iba’t ibang laking bangka ng mga mangingisda. Malayo rin sa ibang isla at mainland ang lugar na ‘yon kaya pala walang linya ng kuryente.
“Trick, dito ang daan!”
Kumurap siya at nilingon si Anika na nakatawid na sa kahoy na tulay na ibinaba mula sa bangka para madaanan ng mga pasahero. Humigpit ang hawak niya sa traveling bags nila at kumilos para lumapit sa dalaga.
“Malayo-layo pa ang bahay namin mula rito pero kaya naman lakarin. Kung mabilis tayo, makakarating tayo ‘ron bago tuluyang dumilim,” sabi pa nito.
Kumuno
