Bakit ba pakiramdam niya ay may mabigat na bagay na nakadagan sa kanyang sikmura? Si Erica ba ang nakayakap sa kanya? Dahan-dahan niyang iminulat ang mga mata. Sumalubong sa pagbubukas ng mga talukap ang pagsigid ng kirot sa kanyang sentido na sumabay sa pagdapo ng pang-umagang sikat ng araw sa kanyang paningin.
Lumiyo ang utak niya. Hinayaan niya munang mag-adjust ang diwa bago tuluyang magmulat. Iba nga ang ayos ng silid. Masculine ang kulay sa loob samantalang beige and white ang dominant color ng silid nila ni Erica. Nilingon niya ang kanyang katabi. Nangunot ang noo niya sa nakikita. Pinaglalaruan ba siya ng guni-guni o epekto pa rin ng espiritu ng alcohol at ibang nilalang ang nakikita niya sa kanyang tabi? Pumikit siyang muli. Umaasa siyang sa muling pagdilat ay tumama na ang mga m
