NABIGLA ang buong bench ng CISA sa pagdating ni Kier. Si Macky nga ay nagulat din sa pagdating nito na napatanggal na lang sa talukbong na towel sa ulo. Si Ricky naman ay pinagmasdan ito at nahalata niyang puyat pa ito, pero natuwa siya dahil dumating ito.
"K-kier? B-bakit ka nandito?" Tanong ni Reynan na kaagad itong nilapitan para kumustahin.
"Nalaman kong na-injured si Romero, siguro pagkakataon ko na para palitan siya sa pagiging star player ng CISA," ani Kier na kahit hindi ito kalakasan ay halatang inaangasan niya si Macky na napangisi na nga lang.
"Magpahinga muna kayo... Kami muna ng mga players na hindi pa nakakalaro ang maglalaro. Ireserba ninyo ang lakas ninyo sa pagpasok ninyo..." Seryosong wika ni Kier na ibinaba na sa bench ang dalang bag at nag-warm up kaagad ito sa tabi.
