الغجر

ابواب الشر _ الفصل الاول

القصه ياجماعه هتبقا غريبه شويه في فكرتهاا لان بصراحه الفكره جاتلي من حلم فعلا مع اللمسه الواقعيه اللي بتدي تشويق للقصه

نبدأ احداث القصه و بدأت ازاي . . .

الشخصيه الرئيسيه :

اناا: (اسمي زين طولي حوالي 186 كده بالتقريب يعني مش عارف هو كده فعلا ولاه اطول حاجه بسيطه جسمي متقسم الي حد كبير لاني بحب العب رياضه جدا لاني مبحبش اتخن و مقتنع ان الهدوم بيبقا شكلهاا حلو عليك عشان جسمك حلو مش الع** و لوني قمحاوي و حلو اوي لحد كده ) باقي الشخصيات هتتعرف ف وقتها ندخل ع الاحداث بقا عارف اني طولت حقك علياا

تررررررررررن ( منبه بيرن)

انا: ام الصحيان بدري كان لازم يعني الانترفيو ( مقا**ه عمل ) يبقا 8 الصبح مسكت موبايلي و قلبت فيه شويه كده وخلاص وقومت دخلت الحمام غسلت و شي وشغلت السخان وخرجت فتحت التلاجه طلعت ازازه اشرب منها و بعدين فطرت و دخلت خدت دش و خرجت لبست و خدت موبايلي و حاجتي و نزلت بالمناسبه اناا عايش لوحدي عندي 20 سنه ابوياا وامي ماتو و اخواتي اتجوزو لاني اصغر اخواتي و معنديش غير اختين بنات اكبر مني ب 4 سنين و التانيه ب 7 سنين المهم نزلت ركبت مترو طبعا لاني معنديش اي حاجه توصلني وكان نفسي اجيب موتسكل جدا وطبعا المترو كان زحمه كالعاده بس محصلش حاجه غريبه يعني نفس المناظر اللي بتشوفها كل يوم اغ*ي وسيله مواصلات ف حياة الانسان و اللي ركبهاا هيعرف خصوصا الصبح بدري

جت المحطه اللي المفروض انزل فيهاا نزلت و روحت ف طريقي قبل ما اوصل بشويه كده طلعت موبايلي و كلمت واحد صاحبي اسمه حسين ( حسين قدي ف السن لان احناا صحاب من ايام ابتدائي و اقصر مني بيجيلي لحد دقني كده و ابيضاني شويه بس مش اوي ) رنيت عليه عشان هو اللي كان جايبلي الشغل اللي رايح اعمل فيه انترفيو ده

انا:الو ايهايه يا صاحبي اناا قربت اوصل اهو

حسين: ماشي يا عم انجز اناا مستنيك عشان ادخل معاك

اناا: اشطا 5 وهتلاقيني عندك

قفلت و 5 دقايق و كنت هناك قابلني صاحبي حسين وسلمت عليه

حسين: عارف يا واطي لو صغرتني قدام المدير هزعلك عشان اناا اللي جايبك هنا و هتبقي ف وشي واناا عارفك بتدلع من زمان

اناا : ياعم متخافش بس مترجعش تزعل لو غطيت عليك و بقيت احسن منك ف الشغل و اترقيت اسرع منك فا انت تدايق اني جديد و اترقيت قبلك وانت اقدم مني فا تحاول توقعني ف الشغل و تسخن المدير علياا اقوم اناا اقول طز ف الصحوبيه اللي بينا و اقوم ملبسك مصيبه و اخليك تترفد

حسين : ايييييييييييه خيالك ياض *** ده اناا ابن ستين تييييت اني كلمتك اصلا امشي ادخل قدامي ومسمعش صوتك تاني

واحناا داخلين كان في قاعتين كده فيهاا الناس اللي شغاله بقا و طبعا بصيت بصه سريعه ع الاولي واحناا معديين بس شوفت مناظر تخوف و اماا وصلت للتانيه شوفت فيهاا شويه ستات كتير فا قلت للواد حسين

اناا: يسطاا انت عارف انك اخوياا ولاه لا ( واناا عيني متشالتش من ع الستات )

حسين: شدني من ايدي و كملنا ف طريقنا وقالي انت ياض احترم نفسك انت لسه مبدأتش تشتغل اصلا امال لو اشتغلت هتعمل ايه

انا: ياعم متقلقش انت بس هعمل كل خير بس قولي هما ليه متقسمين ف قاعتين مع ان القاعه التانيه دي اللي فيها ستات مفيهاش عدد كبير

حسين: هتعرف بعدين ركز بس عشان عايزك تبقا واثق من نفسك كده و انت داخل للمدير

انا: طب هو ايه دنيته يعني راجل رخم وكده و لاه عسليه عشان اناا خلقي ضييق و انت عارف

حسين: لا متخافش ياعم ده سنه قريب مننا و عسليه هتحبه

وصلناا لحد باب المدير حسين خبط ع الباب

المدير: ادخل

حسين: صباح الخير حضرتك ده زين صاحبي اللي كلمت حضرتك عنه و شوفت السي ڤي بتاعه ( السيره الذاتيه يعني و اصحي معايا للكلام )

المدير: خليه يدخل و روح انت شوف شغلك

حسين : تمام يا فندم

اناا: صباح الخير حضرتك ( كان فعلا شاب كده تديله مثلاً 30 او 32 سنه كده بالكتير اوي وابيضاني شويه و معندوش دقن املس يعني واناا استغربت من سنه بس مهتمتش اوي يعني )

المدير : اهلا اسمك زين مش كده

اناا: ايوه ما هو حسين لسه قايلك في ايه ( بضحك طبعا وكده )

المدير : ههههههه طيب ياعم وسالني بقا كام سؤال اللي هما المعروفين ف اي انترڤيو وبعد ما خلص قالي بص بقا انت السي في بتاعك كويس جدا و انت هتشتغل معاياا 15 يوم تدريب الاول عشان تاخد ع الجو هنا و طبيعه الشغل و بعدين تكمل بقا والدنياا تمشي عادي

اناا: تمام حضرتك يعني اناا من بكره اجي ابدأ

المدير: ايوه ياعم اتفضل بقا عشان مش فاضيلك ( بس كان بيتكلم بضحك )

اناا : ( بإبتسامه ) شكرا يا فندم واستأذنت وخرجت بره لقيت حسين صاحبي جي علياا بسرعه

حسين : عملت ايه ياض

اناا: ياض اتقبلت طبعا و هاجي اشتغل من بكره

حسين : طب ياعم حلو الكلام ده بس متنساش بقا انك هتروق علياا من اول مرتب تقبضه عشان اناا اللي جبتلك الشغل

اناا: ياخي ينعل الصحاب غور ف داهيه اناا هروح اكمل نوم اناا بكره الصحيان بدري اصلا و مش عارف هعمل ايه ف الحوار ده هحاول بقا اظبط نومي كده عشان الشغل يلا سلام

حسين : اجمد ياض متبقاش طري كده المدير مبيحبش التأخير و لو اتأخرت هيقولي مجايبك بقا و هيرخم علياا اناا

انا: ياعم متخفش اناا هاخد كام يوم كده بس اتعود وكله هيمشي ياعم سلام بقا

( طبعا عايزين تعرفو اناا هشتغل ايه وفاكرين هتبقا شغلانه ف شركه جاااامده بقا وان اناا هعمل فيها انجازات و المدير هيقولي خد مكاني يا جامد او هيرقيني لمنصب جامد جدا بس لا يا جماعه اناا شاب عندي عشرين سنه عايش لوحدي و حياتي طبيعيه كان شغل ف كول سنتر بس English

عشان اناا اللغه بتاعتي كويسه فا كان مرتبه ازيد بشويه من العادي ده الفرق الوحيد و مفيش اكشن...

المهم

روحت البيت بقا غيرت هدومي و نمت وفجأه لاقيت نفسي ف موقف غريب اوووي اناا شايف نفسي و اناا نايم علي سريري هتقولي ازاي هقولك يسطاا ده حلم عادي بس وانت بتحلم مبتبقاش عارف انك بتحلم فا بيبقا كأنه حقيقي

المهم اناا كنت شايف نفسي و اناا نايم و فجأه المنبه رن و اللي هو المفروض اناا قام و قفله و مسك الموبايل شويه و بعدين قام دخل الحمام غسل و شه وشغل السخان وخرج فتح التلاجه و طلع ازازه شرب منهاا و فطر و بعدين دخل خد دش ( طبعا دي احداث اليوم بتتكرر قدامي بس قلتلك وانت بتبقا نايم مبتبقاش عارف انه حلم افهم بقا ارجوك ) وشويه وخرج لبس و نزل والمشهد اتبدل وظهرنا ف المترو واناا شايف نفسي واقف ف المترو لكن مكانش حد شايفني و لاه حاسس بيا كأني بتف*ج ع فيلم مثلا بس المره دي حصل حاجه غريبه جدا ( هتقولي عرفت ازاي مش انت قلت انك اماا بتحلم بتبقا مش عارف انه حلم هقولك اتقل علياا يا صاحبي و هروق عليك ) اناا واقف بزاويه كده و شايفني لكن شايف حد واقف بعيد عني بشويه كده جسمه كله اسود لكن ملامحه مش باينه او ملوش ملامح اصلا تحس كده كأنه خيال شخص عارف اماا يبقا في احلام كده مشوشه شويه ايوه هو ده بالظبط لكن عارف بقا الغريبه ايه يسطاا ياللي بتقرا الكلام انت يا قمر الغريبه انه بصلي اناا اللي بيتف*ج ع المشهد ده كله اناا الحقيقي مع اني مكانش حد شايفني ولاه كان مركز معايا لكن هو عشان مكانش ملامحه باينه مكنتش عارف هو باصصلي فعلا ولاه لا بس كان وشه نحيتي وفجأه ملامحه بدأت تظهر و وشه كله بان لكن ايه ده مستحيل ده يكون بني ادم عينه شكلها غريب جدا و بصلي و ضحك ضحكه كده ب منظر امه ابن التيييت اللي بيخوف ده و بعدين فجأه حسيت كأني بتخنق ومش قادر اتنفس

انا :اااااااه ... احاا ايه ده كان حلم الحمدلله وبعدين قمت خرجت بره الاوضه اشرب عشان كنت حاسس اني عطشان اووووي كأني كنت بجري مسافه طويله و بعدين واناا راجع كان النور مطفي لكن اناا حسيت بحركه وسط الضلمه فا شغلت النور فجأه لاقيت قدامي حااجه صدمتني جداااا

اناا : ايه ده انت ميين.....

استوني ف الجزء اللي جي بقا يا راايقين و لسه الكلام التقيل كله هيبدأ من الجزء اللي جي اناا كنت لسه ببنيلك الاحداث

اشوفكو ع خير الجزء الجاي

الجزء التاني

وقفنا الجزء اللي فات اماا صحيت من الحلم و خرجت من الاوضه عشان اشرب و بعدين سمعت صوت جي من وسط الضلمه و شغلت النور و شوفت حاجه فاجأتني جدا .... نكمل بقا

انا: ايه ده انت... انت مين ومرعوب جدا من اللي شايفه لان اللي شوفته كان.... كان اناااا

او بمعني اصح كأن في مني واحد تاني مش هقول توأم مثلا لا ده كان نسخه مني قاعد قدامي ع كنبه ف الصاله

اناا: ( بتهته ) ا ا ا انت م م مين ولاه ولاه انت ايه اصلا

انا2 : اهدي يا زين متخافش مش هأذيك تعالي اقعد

( اناا مش قادر اتحرك حتي من الصدمه و لا اتكلم و حاسس اني دايخ جدا سندت بإيدي ع الحيطه عشان مقعش ع الارض لكن متحركتش وحاسس ان اطرافي بتتحرك بصعوبه جدا و جه ف دماغي الحلم ان ده نفس اللي حصل فيه و اني شايف نفسي قدامي لكن المره دي مكنتش مجرد متف*ج لكن قلت مستحيل اناا اكيد لسه بحلم مثلا بس ازاي احساس الخوف اللي انا فيه ده دلوقتي حقيقي جدا اناا حاسس ان قلبي هيقف قطع تفكيري صوته و هو بيتكلم تاني)

انا2: اسمع يا زين اناا مش عايزك تخاف قلتلك مش هأذيك ومنصحكش تعمل اي حركه او تصرف تندم عليه

انا: ( اخير عرفت اتكلم ) طيب انت ايه وعايز مني ايه

انا2: لازم تقعد وتهدي عشان تفهم لانك عمرك ما هتفهم حاجه وانت خايف كده

اناا: اقعد ايه وافهم ايه انت مجنون (بصوت عالي و خوف)

انا2: قلتلك بلاش تعمل اي تصرف تندم عليه اناا هسامحك عشان خوفك لكن لو اتصرفت تصرف طايش هندمك

بس اناا اما بصيت في وشه وشكله ملاقتش حاجه تخوف او غريبه اوي يعني كل الحكايه انه نسخه مني لكن بني ادم عادي او اناا كنت فاكر كده فا طبعا كان لازم افهم في ايه حاولت اهدي نفسي شويه لحد ما حسيت ان ض*بات قلبي انتظمت و جمود اعصابي و اطرافي اتفك بس كل اللي جه ف دماغي ف الوقت ده التفكير الساذج جدا بتاع الافلام ده ان اناا كان عندي اخ توأم و اتفرقنا واحنا اطفال ومحدش حكالي عنه وكده يعني و خصوصا ان طريقه كلامه مفيهاش حاجه غريبه ومبهمه جدا بس ف نفس الوقت كان في تفكير تاني انه لو هو بني ادم فعلا دخل هنا ازاي و اناا قافل الباب و محدش معاه نسخه من المفتاح وبعدين بقا ف اللي اناا فيه ده و اللي خرجني من دوامه التفكير دي كان صوته وهو بيقول

انا2: طيب مش تقعد وانا افهمك كل الكلام اللي انت بتفكر فيه ده

انا: ( طبعاً حسيت زي اللي اتكهرب وهو جسمه مبلول واتأكدلي انه مش بني ادم فا كان لازم افهم ايه اللي انا فيه دلوقتي ده ) انت عرفت منين اللي انا بفكر فيه

انا2: انت لو تقعد وتهدي نفسك هفهمك بس قبل اي حاجه اناا مش بني ادم اه لكن ظهرتلك بالشكل ده عشان مينفعش اظهرلك بشكلي الاصلي اول مره لانك لسه عقلك مش مهيأ انه يستوعب الصدمه وممكن تموت اذا كان انت كنت هيجيلك سكته قلبيه واناا ظاهرلك بالشكل ده امال لو شوفت شكلي العادي

انا: يعني انت مش عايز تظهرلي بشكلك الحقيقي عشان ميحصليش حاجه فا تقوم تظهرلي بشكلي انا لا فكره حلوه فعلا وبعدين لحظه واحده كده اول مره اللي انت بتقول عليها دي معني كده انك هتظهرلي تاني ؟؟

انا2: اناا كنت عايز اظهرلك بشكل حد قريب منك جدا عشان تطمنلي لدرجه اني فكرت اظهرلك في شكل ابوك بس قلت طبعا انك لو شوفت حد ميت بالنسبالك من زمان لسه عايش هتحصله ف قبر واحد وبصراحه ملاقتش حد اقربلك من نفسك خصوصا انك عايش لوحدك ومفيش حد معاك حتي عشان اظهر ف شكله واكيد هظهرلك تاني لان اناا جايلك لسبب لولاه مكنتش هتشوفني اصلا

انا: لا انت زي الفل كنت هتظهرلي ف شكل ابوياا الميت فا قلت لا اظهرله ف شكله هو العيب فيا اناا فعلا كمل ايه هو السبب ده

انا2: السبب ان احنا اخترناك عشان تشارك ف تحدي اسياد الابواب الخمسه

انا: انتو مين اللي اخترتوني اناا مش فاهم حاجه و تحدي ايه واسياد ايه اللي انت بتتكلم عنهم

انا2: احناا 5 اسياد ب 5 ابواب اخترناك عشان تعمل التحدي بتاعنا

انا: مش فاهم بردو بس اشمعني اناا يعني وافرض قلتلك مش عايز اعمل اللي انت بتقول عليه ده

انا2: اشمعني انت دي ترجعلناا احناا كا اسياد الابواب الخمسه لان لازم اللي نختاره يبقا موافقين عليه كلنا و كل واحد فينا بيراقبك فتره عشان يشوف اذا كانت تنطبق عليك المواصفات المطلوبه للتحدي ولاه لا لكن انت معندكش اختيار اصلا عشان ترفض احنا اختارناك و انت هتشارك و الا بقا تستحمل اللي هيحصلك ومظنش انك هتقدر وهيبقي مصيرك زي اللي رفض قبلك يشارك ف لعبتنا

انا: ايه اللي هيحصل يعني ا

نا2: شكلك مش مصدق بس اماا تشوف بعينك هتعرف و هتصدق و هتشارك بمزاجك احسنلك

لاقيته بيقرب مني و بيحط ايده علي كتفي و فجأه المكان اللي احنا فيه اتبدل و ظهرنا في مكان اناا عارفه كويس جدا ده كان بيت اختي و احنا واقفين و شايفينهم لكن هما مش شايفينا و لاه حد حاسس بينا اصلا و شايف اختي و ولادها و جوزها قاعدين بياكلو و بيهزرو مع بعض و بيضحكو وعادي جدا لكن فجأه ظهر ورا كل واحد منهم خيال طويل جدا واسود من غير ملامح و الشخص اللي شبهي ده اتكلم وقالي

انا2: لو مش عايز تشارك براحتك جدا بس شايف الاسره السعيده دي كلهاا..... هتموت

وفجأه المشهد اتبدل تاني و ظهرنا في بيت اختي التانيه لكن كانت اختي و جوزها قاعدين بيتف*جو علي التليفزيون و ولادها كل واحد ف اوضته بس نفس الخيالات الطويله دي واقفه عند كل واحد فيهم

انا2: بص بقا ببساطه كده لو رفضت تشارك كل القريبين منك هيموتو حتي اصحابك و اي حد ليه علاقه بيك و هنخليك تتمني تحصلهم بس مش هتعرف لحد ما ف الاخر هنخليك تموت نفسك

اناا كل اللي جه ف دماغي ساعتها شكل اختي و جوزها و اولادها وهما قاعدين و عايشين حياتهم و مبسوطين و اختي التانيه بردو و اكيد مش هتردد ثانيه واحده اني ارمي نفسي ف النار عشانهم فا وافقت واناا حاسس ان دي هتبقا نهايتي بس معنديش اختيار تاني و لو الموضوع فيه ضرر ليا اناا بس احسن ما يضر حد تاني قريب مني

انا: اناا موافق بس ايه اللي يضمنلي انك متأذيش حد منهم

انا2: الموضوع متوقف عليك انت و انصحك انك متحاولش تهرب ف اي مكان ف الارض كلها لاننا هنوصلك و اوعي تفكر تحكي لاي حد لانك هتتسبب ف موته

المشهد اتبدل تاني و ظهرنا ف ارض صحراويه واسعه جدا متقدرش تشوف اخرهاا ع مرمي نظرك و فيهاا خمس ابواب كبيره جدا الباب الاول مفتوح فتحه بيسطه و مكتوب عليه من بره ( الفازع )

انا2: ده الباب الاول باب الفازع ادخل وهيبقا اللعبه بدأت و هتشارك معاناا

انا: بس اناا لسه معرفتش ايه هي اللعبه او التحدي ده و ايه السبب انكو اختارتوني اناا بالذات مع ان اللي انا شوفته و اللي انتو تقدرو عليه بيأكدلي انكو مش محتاجين حد زيي اكيد

انا2: احنا اخترناك عشان تشارك ف التحدي عشان تسلينا لان هي دي وسيله الترفيه المفضله بالنسبه لينا و قواعدهاا ان سيد الباب اللي انت هتبقا فيه هو اللي هيبقا معاك دايما ف اي وقت بس محدش يقدر يشوفه او يسمعه غيرك انت و هو اللي هيقولك التحديات اللي تعملها و يقرر انت نجحت فيها ولاه لا و لو ده حصل يبقا انت خلصت الباب الاول و بعدين تدخل اللي بعده و في المقابل هتاخد فلوس كتير او قدره خاصه تساعدك انك تعدي الباب اللي بعده بس مش هتبقا حاجه خارقه اوي يعني زي انك تطير او تطلع نار من بؤك مثلا هتبقا حاجه بسيطه شويه زي انك تقدر تقرا افكار حد معين او تقدر تسمع صوت من مسافات بعيده او تشوف لمسافه بعيده بردو وحاجات بسيطه زي كده

و في صوت ف دماغي عمال يقولي ادخل ادخل يا زين

انا2: يلاا يا زين الفازع بيناديك

دخلت الباب واول ما دخلت لاقيت نور عالي جدا في وشي جي من كل اتجاه وواحده جميله جدا ظهرت من وسط النور ده و قالتلي اهلا بيك يا زين ف باب الفازع

انا: ايوه انتو كلكو بتقولو الفازع الفازع والاسم اصلا بيدل انه هيبقا شيطان بقرون مثلا او....

البنت: اناا الفازع يا زين

انا: لا ده كده احلو الكلام اوي بقا القمر ده يبقا فازع طب ازاي ده حتي يبقا حرام يعني

البنت: هههههه يازين انت ساذج جدا احنا مش بني ادمين زيك و نقدر نظهر ف اي شكل يعجبنا انت نسيت الكلام اللي قالهولك (المتعاقد )

انا: مين المتعاقد ده

البنت: ده سيد الباب الاخير باب المتعاقد و الكلام اللي قالك عليه و اقنعك انك تشارك معانا ده ال*قد.... ودلوقتي انت هترجع اوضتك وتنام وتمارس حياتك عادي جدا و افتكر الكلام اللي قاله المتعاقد لو حد عرف اي حاجه من الكلام ده هيموت وتوقع اني اقولك في اي وقت التحدي اللي عايزاك تعمله و في اي مكان يلا بقا مش عندك شغل الصبح روح نام

وفجأه كل حاجه اختفت و لاقيت نفسي في البيت فا دخلت اوضتي و قعدت علي السرير وبفكر ف كل اللي حصل فجأه ده و بقول ياتري ايه اللي هيحصل وايه اللي انا داخل عليه ده و طبعا كميه الصدمات اللي اتعرضتلها و التفكير خلوني انام زي القتيل وصحيت الصبح ع صوت موبايلي بيرن كان حسين صاحبي

انا: الو ايه يابني

حسين: هو ايه اللي ايه يابني اصحي ياعم عشان متتأخرش

انا: حاضر خلاص صحيت انت نزلت ولاه لسه طيب

حسين: هنزل من البيت اهو اشوفك هناك

انا: تمام

وقفلت وقمت غسلت وشي و وانا في الحمام قدام المرايه عمال افكر ف اللي حصل امبارح وغسلت وشي و خرجت ولسه بفكر سمعت صوت بيقول...

الفازع: صباح الخير يا زين مش انتو بتقولو كده لبعض اما بتبقو لسه صاحيين

اناا اتفزعت لاني كنت سرحان و بفكر بعدين لاقيت البنت اللي هي الفازع و اقفه قدامي

انا: ايه ده هو التحدي الاول هيبدأ بالسرعه دي

الفازع: لا مش عايزاك تبقا خايف و قلقان كده عشان ميبانش عليك حاجه اهدي خالص و لما التحدي يبدأ اناا هقولك

انا: اه طبعا طبعا اهدي ما هو الكلام سهل

و سيبتها و روحت الاوضه عشان البس هدومي و انزل الشغل و خلصت ونزلت وهي معاياا طبعا و ركبت المترو و فعلا مكانش حد شايفهاا وهي طبعا عماله تكلمني واناا مبردش

الفازع: شايف الراجل اللي واقف هناك ده ايه رأيك اطلب منك تروح تسرق منه فلوسه او استني استني شايف اللي هناك ده باين عليه صاحي مش طايق نفسه ايه رأيك اخليك تروح تلبسه مصيبه اناا بصتلها و برقتلها بعيني واستنيت اول ما المحطه بتاعتي جت و وخرجت من المحطه

انا: انتي ايه اللي بتعمليه ده انتي عايزه توصلي لايه بالظبط

الفازع: ولاه حاجه يا زين اناا بعمل كده لمصلحتك عايزاك تبقا متعود ع الضغط النفسي عشان الضغط اللي هتتعرضله الفتره اللي جايه و كمان عشان عايزاك تفهم ان فعلا ممكن التحدي يبدأ في اي وقت بس التحدي مش هيبقا الكلام الاهبل و***ب العيال اللي كنت بقولك عليه ده انك تسرق فلوسه او تلبسه مصيبه انت كل تحدي هتتحط فيه الغلطه ف التحدي ممكن يبقا قصادها حياتك

اناا: اناا ايه اللي بيحصلي ده اناا كان زنبي ايه بس

الفازع: لا لا يا زيزو امسك نفسك احنا لسه مبدأناش

مهتمتش للكلام و مشيت و بعدين وصلت الشغل و دخلت سلمت ع صاحبي حسين

حسين: مالك يابني عامل ليه كده

انا: لا مفيش يسطا انت عارف بس اني مش متعود اصحي بدري المهم اناا فين المكان اللي هشتغل فيه

حسين: في القاعه دي معاياا بس انت هتبقا علي المكتب اللي في الاخر ده

القاعه اللي اناا كنت شغال فيها دي كانت القاعه التانيه ( دي القاعه اللي كان فيها الستات اللي اتكلمت عنها في الجزء الاول ) و كل اللي هتعمله حاليا بس انك هتتصل بالناس و تعرض عليها عروض و تحاول تقنعهم انهم يقبلوها و انهاا مهمه ليهم و كل شخص هيبقا عندك معلومات عنه و عن سنه و كل حاجه هتحتاجها علي الجهاز اللي انت شغال عليه واوعي تخاف او ترتبك او تغلط في اي حاجه لازم العميل يحس انك من بلده و اوعي يحس انك مش اجنبي عشان ميحصلش مشاكل ( طبعا عايزين تعرفو طبيعه الشغل ايه طيب هي كانت شركه ادوات طبيه المفروض انك بتعرض الادوات الطبيه دي علي الناس ف دوله اجنبيه ضمن التأمين الصحي وكده بس هي فاتحه فرع هنا ف مصر عشان طبعا ارخصلها كا دفع مرتبات للناس اللي شغاله و كا ضرائب وكل الكلام ده )

انا: طب تمام اوي متخافش ياعم هروح اناا بقا اشوف الدنياا كده ولو احتاجت حاجه هسألك

روحت قعدت ع المكتب و بصيت ع الناس كده بصه سريعه كانو قاعدين علي مكاتبهم و بدأو يركزو و يبدأو شغل بس كل حد كنت ببصله كان بيبتسملي كا نوع من الترحيب عشان جديد وكده الشغل كان 8 ساعات و ساعه استراحه غداء وبدأت اشتغل وكل ده الفازع واقف جمبي

وبعد فتره كده من الشغل جت استراحه الغداء و خرجت في صاله الاستراحه و لقيت المدير جاي علياا

المدير: ازيك يا زين

اناا: تمام حضرتك عامل ايه

المدير: تمام ايه اخبار الشغل يا بطل حسين فهمك الي المفروض تعمله

انا: ايوه حضرتك فهمني كله تمام

المدير: طيب يا بطل شد حيلك و بالمناسبه اناا اسمي كريم ممكن تقولي يا مستر كريم و اه بالمناسبه بردو اختارلك اسم تاني بدل زين بس يكون اسم اجنبي عشان لو حد من العملاء سألك عن اسمك مش هينفع تقوله زين طبعا

انا: تمام يا مستر كريم هفكر في اسم كده و هتصرف انا متقلقش حضرتك

خلصت كلام مع مستر كريم و بعدين مشي و حسين جه وقف معايا وسالني المدير كان بيكلمني في ايه و قلتله و اكدلي علي كلامه و انه نسي يقولي الحته بتاعت الاسم دي

انا: ولاه يهمك ياعم عادي روح بقا هاتلنا اكل عشان ننجز قبل ما الاستراحه تخلص

راح حسين يجيب اكل و لاقيت واحده جايه علياا قمر اوي

واحده: ازيك انت اسمك زين صح

انا: تمام انتي ايه اخبارك ...ايوه اسمي زين

واحده: واناا ملك

انا: عاشت الاسامي

ملك: انت صاحب حسين صح

انا: ايوه صحاب من زمان اوي

ملك: ياه اللهيكون ف عونك بصراحه

انا: هههههههه اشمعني يعني

ملك: لا مفيش هو جدع و طيب وكل حاجه بس تحس انه مش اجتماعي اوي يعني مبيحبش يتعرف علي ناس جديده تحسه رخم شويه

انا: رخم !!! ايه يسطا في ايه هو كده فعلا مبياخدش علي الناس بسرعه بس ده عشان هو غلبان مش رخم

كنت بكلمها و بعدين طلعت علبه سجاير و طلعت منها سجاره فا هي قالتلي لو سمحت ممكن سجاره فا اديتها واحده وولعتلها و ولعت لنفسي

ملك: انت اشتغلت فين قبل كده بقا باين عليك و اخد عالشغلانه و اللغه بتاعتك كويسه و عارف تتعامل يعني

انا: ايوه اشتغلت كذا شغلانه زي دي فا واخد ع الجو شويه بس كل مكان ليه نظامه ولسه هتعود بقا

كان حسين جه و قعد جمبي كأن ملك مش موجوده ولاه سلم عليها حتي و قالي امسك الاكل بتاعك اهو فا اناا بصيتلهاا قامت بصتلي و ضحكت بعدين قامت وقالتلي هسيبكو براحتكو بقا عشان تعرفو تاكلو

انا: ايه يسطاا اللي انت عملته ده البت كانت قاعده كنت سلم عليهاا حتي كده ت**فها انت كأنك قلتلهاا انت ايه اللي مقعدك هنا قومي امشي

حسين: ياعم لا اناا مقصدش كده خالص و انت عارف اناا بس عشان معرفهاش اوي فا مبتكلمش معاها

انا: ده انت غ*ي يابني هو السلام فيه اعرفه ومعرفوش اتزفت كل بقا عشان الوقت

خلصنا اكل و رجعنا شغلنا وطول ما اناا قاعد ع المكتب ملك تبصلي و تبص علي حسين و تضحكلي واناا كنت بضحك بصراحه المهم يوم الشغل خلص و كنت قايم امشي خلاص لاقيت ملك جايه علياا سلمت عليا و قالتلي بقولك ايه هات رقمك فا اديتهولها وبعدين قالتلي اشوفك بكره بقا وانا سلمت علي حسين و مشيت و واناا خارج من الشركه سمعت صوت الفازع بيكلمني

الفازع: حلوه ملك و دمها خفيف مش كده

انا: يخربيتك اوعي يكون اللي ف دماغي صح

الفازع: لا لا قلتلك التحدي مش هتتوقعه و مش هيبقا لعب عيال بس مين عارف يمكن اقولك تعمل اي حاجه انا حره

انا: ليييه بقا اناا مبقتش عارفلك حاجه

وروحت البيت و دخلت غيرت هدومي و قعدت و ولعت سجاره وسرحت شويه وحه ف دماغي حوار الاسم اللي المفروض اختاره ده وبعدين لاقيت رقم بيرن عليا فا رديت وكان صوت ملك

انا: الو

ملك: ازيك يازين اناا ملك

انا: عارف عرفتك من الصوت وبعدين ايه اللي ازيك يابنتي تمام ما انتي لسه شايفاني من شويه

ملك: ههههه ياعم ما هما بيقولو كده يعني هقولك ايه يعني انا بكلمك عشان تسجل رقمي اصلا يا فصيل

انا: طب ياسيدي شكرا هسجله حاضر .. . .. بقولك ايه صح انتي اختارتي الاسم التاني ده ايه

ملك: Eva ( بمعني حواء بالعربي )

انا: اسم جميل طيب اقترحي عليا انا بقا اسم حلو عشان مبضون جدا حاليا ومش فايق اختار اسامي والشغل ده

ملك: طب ايه رأيك ف Kris اسم حلو و لايق عليك اصلا

انا: اه اشطا اي حاجه

وبعد شويه رغي كده قفلت معاها و قعدت افكر فيها كده شويه وطبعا الرخمة اللي لازم تقطع علياا تفكيري كل مره بتستني الاوقات دي عشان تتكلم

الفازع: ايه يا زين انت اعجبت بت البت طب افرض هي بتكلمك بنيه صافيه

الفازع: ها ها ها ايه ياض العسل ده انت غ*ي يابني قلتلك نقدر نتشكل ف اي شكل احنا عايزينه

انا: طب ما تتشكلي ف شكل ملك و حياه امك ونلعب عريس و عروسه

الفازع: لا اناا ممكن اتشكل ف شكل تاني و هيعجبك اوي وهنلعب بردو بس هتبقا انت العروسه ومتستفزنيش عشان ممكن اتغابي و اعلمها

انا: لا ياعم خلصانه هسكت

وبعدين حسيت اني جعان فا نزلت اشتريت اكل لاني عايش لوحدي زي ما قلت و مبعرفش اطبخ اوي يعني بعرف اعمل الحاجات البسيطه دي بس مكنتش قادر بصراحه اعمل حاجه و بعدين وقفت شويه في البلكونه و وولعت سجاره و عملت شاي بس حصل حاجه غريبه اوي لاقيت الفارع واقف جمبي و باصص للسما و مركز شويه كأنه سرح ف حاجه و بعد كده بصلي و ضحك و دخل جوه اناا مفهمتش في ايه بس مركزتش بصراحه و عارف اني لو سألته مش هيجاوب كنت خلصت السجاره و طفيتها و دخلت جوه اناا كمان و بعدين حسيت اني عايز انام فا روحت قعدت ع السرير و النوم غلبني بعدين صحيت الصبح لاقيت الفازع و شه لازق في وشي و قالي

الفازع: التحدي بدأ يا زين.......

# # # # # # # # # # # # # # # # # # # # # # # # # # # ## # # # # # # # # # # # # # # #