الغجر

ابواب الشر _ الفصل الثالث

الجزء الرابع

( يوم في وسط الاسبوع )

ملك : زين... مدام دينا عايزاك في المكتب

انا : تمام يا ملك روحي انتي كملي شغلك

روحت لدينا المكتب و دخلت وقعدت قدامها و ولعت سجاره

دينا : زين انا مش مصدقه ان خلاص كابوس كريم ده انتهي بجد انا كنت حاسه اني هموت قبل ما اخلص منه

انا : هو ممكن يكون الموضوع خلص بالنسبالك بس بالنسبالي انا لسه كتييير اووي

دينا : بتقول حاجه يا زين

انا : لا ولاه حاجه المهم دلوقتي ان الشركه رجعت تشتغل تاني بعد ما الحوارات دي كلها خلصت عشان الناس دي ملهاش ذنب

دينا : طيب وانت ليه مش عايز تمسك انت الاداره و رفضت اما طلبت منك كده ؟؟

انا : كان لازم انتي اللي تعرفي كل حاجه بتتعمل ازاي و تمسكي شغلك بنفسك... انتي دلوقتي صاحبه الشركه لازم تفهمي كل حاجه عنها عشان لو بعد كده حد مسك الاداره ميضحكش عليكي

دينا : بس بردو انا عايزه اردلك الجميل بأي طريقه

انا : ياستي لو احتاجت حاجه هبقا اطلبها منك

دينا : ياعم ماشي بس هزعل بجد لو احتاجت حاجه و مطلبتش... المهم احكيلي بقا عملت ايه في الاسبوع اللي اتقفلت فيه الشركه بعد اللي حصل

انا : ياااااه ده حصل كتير اوي....

# # # # # # # # # # # # # # # # # # # # # # # # # # # # # # # # # # # #

فلاش بااااااك

بعد ما اتقبض علي كريم و روحت دخلت البيت وقفلت الباب ولسه بلف وشي لاقيت نفسي في الصحرا اللي فيها الابواب و المتعاقد واقف قدامي

المتعاقد : اهلا يا زين

انا : ايه ده هو مش التحدي كده المفروض خلص

المتعاقد : احنا اللي نقول خلص ولاه مخلصش بس متخافش التحدي خلص و مخيبتش ظننا فيك فعلا يا زين

انا : طيب اشمعني انت اللي ظهرت مش الفازع

المتعاقد : الفازع كده دوره انتهي معاك و اناا اللي هظهرلك بعد كل باب لحد ما تدخل الباب اللي بعده

اناا اماا بصيت كده علي الباب الاول لاقيته ملفوف حواليه سلاسل كبيره و مكتوب علي الباب تم اجتياز التحدي والباب التاني مفتوح فتحه بسيطه و مكتوب عليه ( المصلح )

المتعاقد : انت كده عديت الباب الاول يا زين و مكافئتك هتبقا فلوس و قدره خاصه تختارهاا بنفسك بس زي ما قلتلك قبل كده مش هتبقا حاجه خارقه يعني مينفعش اخليك تطير او تعدي من الحيطه مثلا و حاجات زي كده

انا : طيب انت قلت قبل كده انك تقدر تخليني اسمع علي مسافات بعيده صح اناا عايزك تخليني كده

المتعاقد : بسيطه جدا.... هات ايدك

مسك ايدي و كان بيرسم عليها اشكال و دوائر علي الهوا وبعدين خلص و قالي

المتعاقد : تم تنفيذ طلبك

انا : ايه ده بس اناا مش حاسس بأي اختلاف

المتعاقد : عشان انت هنا في مكاننا و بنخليك تسمع اللي احنا عايزينك تسمعه بس لكن اماا ترجع مكانك هتعرف الفرق ...... ودلوقتي يلاا عشان تدخل الباب التاني

مشيت ناحيه الباب التاني و فتحت الباب و دخلت لاقيت نفسي رجعت بيتي و كأني لسه داخل من الباب بالظبط لكن لاقيت واحد واقف قدامي كان شاب كده و شكله كويس و لابس بدله شكلها شيك جدا و شكلهاا يدل علي انهاا غاليه اوووي وقالي

المصلح : اهلا بيك يا زين في باب المصلح و......

انا: عارف عارف متكملش......محدش يقدر يشوفك او يسمعك غيري و التحدي هيبقا ابن تيييت و منيل بنيله سوده عليا وعلي اللي خلفوني ها ايه تاني

المصلح : برافو يا زين احلي حاجه فيك انك بتتأقلم بسرعه بس في حاجه انت نسيتها خالص

انا : ايه ده استني طيب متقولش هجيبها اهو... قول اول كلمه منها كده طيب

المصلح : انت نسيت انك مهما كنت فاكر اننا متوقعين او هتتعود علي تصرفاتنا معاك تبقي عبيط

انا : بصراحه انت صح و....

لسه بكمل كلامي لاقيت الموبايل بيرن لكن صوته كان عالي جدا كنت حاسس ان ودني هتتفرتك من الصوت مع ان صوت موبايلي مش عالي للدرجه دي طلعت الموبايل بصعوبه ورديت لاقيتها ملك لسه بحط الموبايل علي ودني سمعت اول كلمه منها رميت الموبايل علي الارض لاني حسيت ان ودني اتخرمت فعلا فا المكالمة فصلت اما الموبايل وقع علي الارض بصيت للمصلح وقلتله

انا : انا ايه اللي بيحصلي ده انتو عملتو فيا ايه

المصلح : هههههههه متخافش اوي كده هتتعود مع الوقت

انا : وقت ايه انا مش هعرف اعيش كده ومعرفش هتاخد وقت قد ايه لحد ما اتعود

المصلح : طيب هات ايدك

وعمل نفس الرسومات اللي عملها المتعاقد و قالي كده انت هتسمع كويس و مش هتتإذي من الصوت الطبيعي بعد كده زي رنه التليفون او الجرس وكده

وبعدين شيلت الموبايل من علي الارض وكلمت ملك تاني

ملك : ايه يابني مختفي فين بالك فتره و المكالمه قفلت ليه اما كلمتك

انا : لا مفيش كنت بخلص الحوار اللي قلتلك عليه في البيت ده بتاع التصليحات

ملك : طب تمام هتيجي تاخد حاجتك اللي عندي دي امتي ولاه مش عايزها

انا : ياستي هاجي اخدهاا هبقا اكلمك اما اكون جي

ملك : مالك يابني لو في حاجه قولي

انا : مفيش يا ملك حاجه صدقيني هبقا اكلمك بعدين عشان مش عارف اتكلم دلوقتي سلام

المصلح : انت دلوقتي خدت نص مكافئتك بس و النص التاني اللي هو الفلوس هتلاقيه في الاوضه بتاعتك

( بصراحه اناا مكنتش عايز فلوس بس اناا كده كده بتمرمط يبقا هاخدهاا )

دخلت الاوضه لاقيت النور كان مطفي و حسيت اني دايخ اوووي و فجأه اغمي علياا و فوقت بعدهاا بفتره معرفش قد ايه بالظبط لاقيت نفسي في مكان زي مخزن واسع و وفي حاجات كتير و اناا مرمي علي الارض و رجلي مخرومه من عند الفخده الشمال كده زي كأني و اخد فيها رصاصه و بينزل منها دم كتير اووووي اناا فضلت اصررخ من الوجع و المنظر اللي شايفه ومش عارف اناا فين وبعد شويه حسيت كأني شوفت حد بيتحرك وسط الحاجات الموجوده في المخزن لكن معرفتش اشوف مين فا فضلت انادي عليه يلحقني عشان دمي هيتصفي و هموت لكن بعدين الحركه هديت شويه و بعدها بدأ يتحرك تاني بس اماا قرب مني بصيت عليه ده كان علي وشه حاجه زي اللي بتبقا ملفوفه علي وش المومياوات و بيعدين اختفي و ظهر من مكان تاني غير اللي كان واقف فيه فا اناا فضلت اقوله انت عاوز ايه مني و هتعمل فيا ايه لاقيته قرب مني و اناا عمال ازحف وارجع بضهري عشان ميقربش مني لحد ما وصلت للاخر وراياا حيطه قام جه و قعد قدامي وقالي

شخص : ( بيتكلم بكل برود ) زيييين بحييك بجد علي انجازاتك رغم انهاا حاجه تافهه.... عرفت تحط علي كريم الراجل اللي كان عايز يموتك ( بيسقف )

انا : انت مين و عايز مني ايه.... انت.... انت ناوي تموتني ؟

شخص : هسألك كام سؤال لو جاوبت عليهم هتخرج من هنا لو مجاوبتش كل حبايبك هيموتو وانت مش هتخرج من هنا بردو

انا : سؤال ايه انت مجنون اناا دمي بيتصفي.... طيب وديني اي مستشفي واناا هعملك كل اللي انت عايزه رجلي الشمال فيها جرح وهموت قبل ما اجاوبك علي اي حاجه اصلا

الشخص : انت متأكد ان الجرح في رجلك الشمال اصلا

انا: اه طبعا انت مش شايف......

و ببص علي رجلي الشمال لاقيتها سليمه مفيهاش حاجه و بصيت علي رجلي اليمين لاقيت الجرح بقا فيهاا

انا : اييييييييه بقااااا

شخص : ( مش مهتم بكلامي ) اول سؤال يا زين... حاجه بتت**ر من غير ما تلمسها

انا ساكت بفكر في السؤال وهو عمال يكرر الجمله ويخبط بإيده علي الحيطه انا من كتر الخوف و التوتر مش عارف اعمل ايه وعمال افكر لحد ما عرفت

انا : الوعد

شخص : امتي يبقا الباب باب ومش باب

انا : اما يبقا مفتوح فتحه بسيطه

شخص : كل شخص يملكه و مفيش حد يقدر يخسره

انا : مش عارف مش عارف

هو عمال يكرر السؤال و يزود الخبط علي الحيطه و يخبط اقوي و يعلي صوته و يكرر السؤال

شخص : كككل شششخخخص يملللكه ومفيييش حد يقدرررر يخسرررره

انا مش عارف الاجابه و خايف اوووي من اللي ممكن يحصل في اي وقت و حسيت بوجع رهيب في دماغي وفجأه صحيت علي صوت الموبايل بتاعي بيرن وكنت نايم علي السرير عادي وكان حسين صاحبي رديت عليه و اناا بنهج جامد وكانت الساعه حوالي 8 pm

انا : ايه يا حسين

حسين : ايه يسطا فينك مختفي يعني ومبتكلمنيش

انا : لا مفيش يسطا حوار كده هبقا احكيلك عليه بعدين

حسين : انت مالك بتنهج كده ليه انت مع واحده يابني

انا : ياعم اتنيل واحده ايه

حسين : طيب انزلي عشان اناا زهقان نقعد مع بعض و احكيلي

قفلت معاه و قمت ظبط نفسي و لبست و نزلت و قاعد مع حسين ع القهوه

حسين : كنت بتعمل ايه واناا بكلمك.... ابقي حمار ان مكنش معاك واحده ومش عايز تقولي

انا : ياعم واناا لو معايا واحده هخاف اقولك ليه يعني ابوياا .... كنت لسه صاحي وبحلم بكابوس

حسين : طب احكيلي يسطاا انا بحب الحاجات دي

انا : احكيلك ايه بس يسطاا ده كان حلم غريب اوووي و عارف ايه الاغرب اني كنت حاسس انه حقيقي جدا ومعرفتش اني كنت بحلم غير اما صحيت

لقيت حسين بيبصلي و مبيتكلمش خالص ولاه بيتحرك وفجأه لاقيت نفسي صحيت تاني علي صوت الموبايل بيرن و كنت نايم علي السرير بردو

اناا صحيت مفزوع و خايف جدا

المصلح كان واقف جمب السرير وبيضحك

المصلح : اهلا بيك يا زين في باب المصلح..... مهما فكرت نفسك حفظتنا او هتتوقع تصرف*نا فكر تاني واتأكد انك في الاخر بردو هتطلع غلطان ...وبعدين اختفي

ينعل ام حياتي ياعم علي ام اليوم اللي شوفتكو فيه و قمت من علي السرير و ماشي خايف و قلقان جدا اطلع بحلم تاني بردو وبصيت جمب السرير و اناا ماشي لاقيت 3 شنط علي الارض فتحتها لاقيتهاا مليانه فلوس شيلتهم تحت السرير و خرجت من الاوضه دخلت الحمام

( يوم تاني غيره )

قاعد في البيت حوالي الساعه 6 pm ومضون عايز انزل قلت اكلم اي حد انزل معاه افتكرت الواد ( علي ) صاحبي قلت اكلمه

اناا : الو... ايه يا رااايق واحشني يسطاا

علي : حبيبي يسطاا انت ايه اخبارك

اناا : تمام يا حبي تعالي ننزل كده عشان زهقان

علي : تمام طب ما تكلم الواد حسين ينزل معاناا

انا : لا حسين لا

علي : في ايه يابني انتو متخانقين

انا : لا لا مفيش حاجه هبقا اقولك اماا ننزل

علي : تمام هستناك علي القهوه

نزلت القهوه و قابلت علي

وصف علي ( هو في طولي كده بس رفيع و اسمراني شويه و صاحبي من زمان و بنشيل عن بعض مصايب كتير اووي وهو في كليه صيدليه )

علي : ايه ياعم بقا بقالك فتره مبتسألش وسمعت انك نزلت شغل جديد مع الواد حسين ايه الدنيا هناك وعامل ايه في الشغل ده

انا : اه ياعم بقالي فتره كده والدنياا هناك جميله و الواد حسين كالعاده بحركاته دي اللي مابتتغيرش

علي : هههههههه اه انت هتقولي ده بيت**ف يسلم علي اي واحده ميعرفهاش

انا : هههههه انت شغال فين دلوقتي

علي : شغال في شركه ادويه مع عمي ما انت عارفه

انا: حلو اووي يسطاا..... والله وحشتني قعدتنا

واحناا قاعدين علي جاله مكالمه وفضل يتكلم كده حوالي 10 دقايق و شكلها كانت مكالمه شغل وبعدين قفل و قالي

علي : بقولك ايه يسطاا هاخدك معايا مشوار كده بسرعه ومتخافش معاياا عربيه يابن التيييت

انا: ايه ده جيبتها امتي دي و.....

علي : ياعم اخلص تعالي نروح و هقولك في الطريق

ركبنا العربيه و فضلنا ماشيين كده شويه حلوين و بعدين و صلنا قدام مستشفي و علي قالي تعالي معاياا و دخلنا المستشفي علي بيتكلم مع اللي شغال في الاستقبال و بعدين قالي خليك هنا 5 دقايق و راجعلك وبعدين مشي و اناا و اقف لوحدي فا قلت اطلع سجاره بس ايييه اناا في مستشفي و كنت واقف زهقان فا بدأت اسمع اصوت بتهمس في ودني و حسيت بصداع شديد و بعدين لاقيت نفسي بمشي جوه المستشفي و عمال ادخل في ممرات لحد ما لاقيت قدامي سلم نزلت السلم كان في باب و صوت الهمس عمال يعلي اوووي و اناا مش قادر من الصداع فا لاقيت نفسي بفتح الباب كل ده وحاسس اني مش متحكم في جسمي فتحت الباب ودخلت

# يتبع

# # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # # #