“JADE.”
Nakita niyang nakatayo sa may pintuan mismo ng waiting room si Cindy. Nangunot ang noo niya nang mapunang hindi ito naka-uniform.
Mabilis na bumangon ang matinding galit sa dibdib niya sa pagkakakita dito. Anong ginagawa ng babaing ito dito? Aawayin nanaman siya? Nang mula sa likuran ni Cindy ay lumitaw si Louis agad na napanatag kalooban niya.
“May sasabihin yata si Cindy sayo” sabi ni Louis saka ito lumapit sa kaniya.
Tiningnan niya ang binata at nang ngitian siya nito parang nakita niya sa mga mata nito ang sinabi nito sa kaniya noong mapasukan siya nito sa CR noong isang araw.
“Tahan na, I’m here. Wala ng pwedeng manakit sayo.”
Noon nabuhay sa dibdib niya ang lakas ng loob na salubungin ng tingin ng kaharap.
