صراع اسياد الصعيد

الحلقة الثامنة

الحلقه الثامنه

شريف رايح جاي زي البركان فاضلة شوية وينفجر من الغضب مش بعد ما عمل المستحيل علشان تكون ليه في الاخر تسيبة وكمان بالطريقة دي طلع موبيلة وكلام واحد من رجالته ..

شخص :: تحت امرك يا شريف بيه ؟

شريف : عايز مراقبة ل ملك متغبش عن عينك ولا ثانيه بتروح فين بتقابل مين حتي النفس اللي بتتنفسه عايزاك تراقبه ..فاهم

شخص :: فاهم يا افندم اعتبرة تم !

شريف بغضب : ماشي يا ملك انا هعرف ازاي اجيبك راقعه تحت رجليا ...

حسين مع ملك

حسين :: نفذتي اللي في دماغك شريف مش هيسكت ولو فاكرة انه هيسكت تبقي بتحلمي انتي بتلعبي بالنار يا ملك .

ملك : يعمل اللي يعملة انا مش هضيع مهيب من ايدي تاني كفايا اني خسرته زمان ..

حسين : لو فاكرة ان مهيب نسي كل اللي عملناها فيه زمان وسامح بسهولة كده تبقي هبلة عندي احساس انه راجع ينتقم لكرامته وبس..

ملك : يبقي انت متعرفش مهيب ..مهيب جواه ابيض ميعرفش الانتقام ولا الكره وانا واثقه انه بيعشقني مش بس

بيحبني .. ابتسمت دا غير لما يعرف اني احتفظت ببنته وانه عنده بنت هيحبني اكتر واكتر..

حسين بتريقة : وانتي فاكرة انه هيتقبل وجود بنته كده فجأه في حياته!!

دي حكايه بنته دي كفيلة تخليه يكرهك طول عمره ..علشان خبيتي عليه المده دي كلها وكمان كتباها بإسم راجل غيره

يعني الحاجه اللي فاكره انها هتقربك منه مش بعيد تخلي المسافات تبعد بينكم بزيادة ..انتي رجعتي فتحتي علي نفسك نار جهنم من تاني نار انتي مش قدها ..

ملك : يا بابا افهم حتي لو مهيب مظهرش في حياتي تاني ..انا كنت استحاله اكمل مع شريف علشان اكتشفت اني عمري ما حبيته انا بس انبهرت بيه وبكدبه عليا انه بيحبني بس بعد كده اكتشفت اني غلط وان الفلوس مش كل حاجه وان الحب الحقيقي بيكون بالإهتمام بشخص اللي بتحبة وبس ..

حسين : ومقولتيش لنفسك الكلام ده ليه قبل كده زعلتي مني لما قولت ليكي انكم مش مناسبين لبعض وانك مش هتستحملي عيشة اقل من عيشتك

قولتي لا هستحمل وبحبه يا بابا وكانت النتيجة ايه جيتي لحد عندي وقولتي عايزا اطلق ..فجاة دلوقتي الفلوس بقت مش كل حاجة وان الحب والاهتمام هما اهم حاجة ..

ملك : انت بتلومني علي ايه متنساش انك كمان كنت فرحان بقرار طلاقي وكنت اول واحد دعمتني فية علشان مصلحتك مع شريف وبردو انت معاك حق انا فعلا مستحملتش العيشه مع مهيب وكانت الحياه صعبة ...

واتحرمت من حاجات كتير مقدرتش استحملها بس مكنتش محرومه من الحب وده اللي انا اكتشفة متأخر اوي ان الحب اهم مليون مرة من اي حاجة في الدنيا ومش مستعدة اخسر مهيب تاني لاني متأكده انه لسه بيحبني و هيعمل المستحيل علشاني..

حسين : وانا شايف ان مهيب راجع ينتقم منك بس ولو احساسي دا صح هتدخلي دايرة الانتقام من شريف ومهيب وهتكوني انتي وبس الخسرانه في الاخر...

قال كلامه ومشي وسابها وهي نفخت بضيق ومسكت موبيلها ترن علي مهيب وكالعاده مش بيرد ..وبنرفزة وبعدين بقي !!

في البلد ؛

الكل متجمع علي سفرة الفطار ما عدا حنين ومهيب ..

الجد خطاب : هما العرسان لسه نايمين ولا ايه ؟

ناديه : ايوا محبتش اخبط عليهم وقولت اسيبهم براحتهم ولما يصحوا هدخلهم فطار ليهم ..

الجد ابتسم : انا بس بطمن عليهم خليهم براحتهم..

حنين كانت واقفه باصه ل مهيب وهو نايم وبتفكر هتعمل ايه هتتخلي عنه في الظروف دي ولا هتتصرف ازاي مهيب حبها الاول والاخير ومتقدرش تعيش للحظة من غيرة خدت نفس عميق يا الله خليك معايا.. بصتلة بشوق وحب مش مستعده اخسرك يا مهيب بعد ما بقيت ملكي انت بتاعي أنا وبس وهعمل المستحيل علشانك حتي لو حياتي معاك هتكون تمثليه هحولها لحقيقة ومش هضيعك من ايدي زي زمان ....

قربت منه ومدت ايدها حطتها علي شعره و ابتسمت اتجرأت اكتر ولمست وشه عنيها مركزه اكتر علي شفايفة اتمنت لو ليها الحق فيهم غمضت عنيها بضعف وض*بات قلبها بدق بعنف لسه هتقرب الباب خبط اتنفضت وراحت تجري علي الباب تفتحة ..

زياد : خالو فين ؟؟

حنين ابتسمت : نايم تعالي صحيه..

زياد دخل علي خاله وفضل يبوس ويحضن فيه لحد ما صحي وحنين واقفة متابعاه....

زياد : كل ده نوم يا خالوا ..

مهيب : ليه هي الساعة كام !

زياد ببراءه : مش عارف بس احنا كلنا صحينا من زمان وانت بس اللي نايم !

مهيب ابتسم : وانا كمان صحيت اهوو

بص علي حنين اللي متابعة الحوار ومبتسمة : صباح الخير ..

حنين : صباح النور ..

مهيب بص ل زياد طيب استناني برا يا زيزو خمس دقايق وجاي ..

زياد : بس متتأخرش !

مهيب ضحك : حاضر ..زياد سمع الكلام وقام خرج

مهيب بتنهيده قام قرب من حنين : قولتي ايه يا حنين !؟

حنين وهي عنيها في الارض : قولت ايه في ايه ؟

مهيب : في العرض اللي عرضته عليكي امبارح ..موافقة علية ؟

حنين سكتت شوية تفكر : طيب لو قولت موافقة !

مهيب ابتسم : دي حاجة اكيد هتسعدني ومش هنساها ليكي طول حياتي

حنين وهي بتهرب منه علي الباب : وأنا موافقة ..

مهيب فضل باصص كتير علي الباب اللي خرجت منه واتنفس بعمق وقام وغير هدومه وخرج سلم علي ابوه وعمة وجده وقعد وسطهم

وحنين مع امها بتسألها ايه الاخبار ؟

حنين ب**وف : كويسين يا ماما !

ام حنين بإبتسامة : يارب دايما يا حببتي

طيب نادي لجوزك وتعالوا افطروا ..

حنين : حاضر ..

سامح بيهمس ل مهيب : عامل ايه دلوقتي

مهيب : الحمد لله كويس ! وهنسافر النهاردة كمان ان شاء الله وهما بيتكلموا حنين دخلت وسلمت عليهم وقالت ل مهيب ان الاكل جاهز ..قعدوا كلوا في **ت قاطعه مهيب : جهزي نفسك علشان هنسافر النهارده ..

حنين هزت دماغها : تمام ..خلصوا أكل وقامت تحضر نفسها للسفر اختها سهيلة دخلت تغلس عليها بتفتح شنطة حنين بتقفلها وريني كده فيها ايه الشنطة دي ..

حنين بغيظ : مفيهاش وبطلي غلاسه بقي ..

سهيلة غمزت بعنيها : والحاجات دي جبتيها امتا ؟

حنين : دي ماما اللي جبتها انا حتي معرفش فيها ايه ؟

سهيلة : طب وريني نشوف سواء

حنين : بطلي رخامه وروحي شوفي انتي رايحه فين ..

سهيلة بغلاسه اكتر : انا رخمة بقي وبتشد منها الشنطه لحد ما تفتحت ووقع منها الحاجات علي الارض في نفس الوقت اللي مهيب فتح الباب ودخل ..حنين بصت ل مهيب وللحاجة اللي علي الارض واتصدمت وبدأت تلمها وتحطها تاني في الشنطة..وسهيلة اول ما شافت مهيب دخل الاوضة ات**فت منه....احم بعد اذنكم ..وخرجت وسابتهم لواحدهم..

مهيب اتجاهل اللي حصل ودخل غير هدومه بص علي حنين : خلصتي !

حنين : اه كل حاجة تمام !

طيب يلا بينا...

ركب العربية هو وحنين وزياد كمان اللي مرضاش يسيب خاله نهائي..اما سامح فخد مراته وحماه وحماته وابنه عمر معاه ....

بعد وقت طويل وصلوا القاهرة علي بيت فخر ومن تعب الطريق الكل طلع علي اوضته يرتاح ..

مهيب مع حنين : دي هتكون الاوضة بتاعتنا لحد ما الفيلا تخلص تشطيب ..ساعتها هيكون ليكي جناح خاص بيكي وهيكون اوسع من كده ..

حنين ابتسمت : اي مكان انت فيه بالنسبالي الجنة وما فيها..

مهيب ابتسملها وراح علي الدولاب يغير هدومه

حنين قربت منه ووقفت وراه ومدت ايدها هي تختار ليه هيلبس ايه ..مهيب كان محاصر بينها وبين الدولاب وهي اختارت بجامه عجبتها دي هتكون حلوه عليك ..

مهيب لف ليها وهنا عنيهم اتقابلت مع بعضها مهيب اكتشف ان عنيها لونها عسلي وجميل فضلوا باصين لبعض من غير اي كلام لحد ما قاطعهم خبط علي الباب ..خالوو افتح .. حنين رجعت خطوة لوارء.

ومهيب فتح الباب وزياد نط في حضنة عايز ايه ياض انت هو مش كنت نايم ..

زياد : اه بس صحيت وعايز اكل من ايدك مكرونه بشاميل من اللي انت بتعملها..

مهيب : بس كده عيوني ليك هاخد دوش سريع بس وهعملك اللي انت عايزو ..

خليك مع حنين وانا خمس دقايق وجاي ..

حنين قربت منه وخدته في حضنها وبتبوسه من خدة : تعرف يا زيزو انك شبة خالك مهيب بالظبط..

زياد : طبعا لازم ابقي شكلة علشان انا بحبه علشان لما بتحبي حد اوي بتكوني شبة اوي اوي..

حنين ضحكت : انت جبت الكلام الحلو ده منين ؟

زياد شاور علي دماغه : من هنا يا طنط ..

طيب تعرفي يا طنط انك انتي كمان شبة خالو مهيب ..اه صدقي كلامي ..طيب مش انتي كمان بتحبية ..

حنين هزت دماغها : انا مش بس بحبة انا بموت فية !!

مهيب كان طالع من الحمام وسمع كلامها بس معلقش راح علي زياد يلا بينا اصلي انا كمان جوعت ويادوب نلحق نعمل المكرونة ..حنين انا كمان هاجي اساعدكم ..دخلوا المطبخ التلاته.

مهيب بدأ يحضر صنيه المكرونه وحنين منبهرة في طريقة في الطبخ

زياد نفخ الدقيق في وش مهيب وحنين مقدرتش تمسك نفسها وماتت ضحك علي شكل مهيب ..

زياد اتغاظ انها ضحكت علي خاله فعمل نفس الحركه معاها وقعد يبصلهم هما الاتنين ويضحك ..قضوا وقت في اللعب ومهيب بيحضر ليهم الاكل لحد ما خلص و راحوا علي السفرة يدوقوا ..المكرونه..

حنين كانت متشوقة تدوقها من ايده اول ما كلت عجبتها جدااا : بجد طعمها تحفة ..

مهيب ابتسم : بالهنا بص ل زياد ايه رايك يا زيزو ..

زياد : تحفة طبعا يا خالو ..

مهيب بتنهيدة افتكر ملك وازاي كانت بتكره المكرونه..**

عجبتك يا حببتي المكرونه؟

ملك وهي بتعلب بالشوكه في الطبق : اه عجبتني !

مهيب : ومالك بتقوليها من غير نفس اوي كده ؟!

ملك : عادي يعني اصلك بتسألني عن حاجة تقريبا بكولها كل يوم فمش كل يوم بقي تسألني..

مهيب بزهق : في ايه يا ملك مش طريقة دي يعني تعامليني بيها مبقتش اعمل حاجة وتعجبك في ايه !

ملك بصوت عالي : فيه اني زهقت ونفسيتي تعبت خلاص الايام بقت شبه بعضها انت طول اليوم في الشغل وانا لوحدي قاعده في البيت بين اربع حيطان لا بخرج ولا بشوف بنيأدمين لما ق*فت عايزني اتعامل ازاي بقي !

مهيب بصوت هادي : طيب ما انتي عارفه الظروف من الاول انا بسابق الزمن علشانك بشتغل 12 ساعة غير اني برجع اشوف كمان شغل البيت وبحاول مقصرش معاكي وانتي كنتي مستحمله ده من الاول ايه اللي جد بقي مخليكي كده ...

ملك : اللي جد اني مبقتش مستحمله العيشة دي أنا أجمل ايام حياتي مقضياها في البيت اصحابي بيكلموني اخرج مبعرفش اخرج معاهم وانت يا ام في الشغل يا ام نايم لما نفسيتي خلاص تعبت...

مهيب : طيب انا في ايدي ايه أعملة ومعملتش انا صحيح طول الوقت في الشغل بس كل ده ليه مهو علشانك انتي وابني ...

ملك : أنا اصلا كل اللي شاغل تفكيري هو ابني ازاي هيستحمل عيشه زي دي ازاي هدخلة مدارس كويسه احنا يدوب مرتبك مكفينا ما بالك بقي لما يكون عندنا عيل !!

مهيب بعصبية : كفايا يا ملك مش عايز اسمع منك حاجة انا تعبت وانا بحاول ارضيكي ومش عارف ...

ملك : عايز ترضيني بجد اشتغل مع بابا هيد*ك راتب اعلي او علي الاقل خليني استعمل الفيزا بتاعتي

مهيب بصلها كتير وقام وقف : تصبحي علي خير ! لما تشبعي لمي السفرة مكانك..

ملك قامت وراه : انت ليه ماردتش علي كلامي !

مهيب : علشان معنديش كلام ارد بيه عليكي..وعلشان قولتلك مليون مرة اني مش هقبل بجنيه واحد يدخل بيتي غير فلوسي ولو ناقصك حاجه انا هجبهالك غير كده لا ..

ملك : ناقصني عربيتي اللي انت حرمتني منها ؟!

مهيب : قولتلك في اقرب فرصه هنشتري واحده لينا احنا الاتنين وكنت هشتري واحده لولا تحكمات ابوكي ان اجيب الشقه في المكان ده ورافضه اننا نعيش مع بابا رغم اني كنت مشطب شقتي وسبتها علشان ارضيكم ...

ملك : وانت كنت عايزني اعيش مع اهلك في بيت واحد ...

مهيب : ممكن بقي تبطلي خناق علشان انا تعبان وعايز انام لاني خلاص بجد مبقتش طايق اسمع صوتك..

ملك بصدمة : تمام انا بقي هريحك مني خالص ودخلت تلم حاجتها وم**مه تمشي ..

مهيب نفخ بضيق : وراح وراها وكل ما تحط في الشنطة هدوم يخدها يعلقها تاني ملك اعقلي انتي ايه جرالك طيب أنا آسف خلاص ..

ملك بعصبية : وانا قولت همشي ومش هعيش معاك تاني ..

مهيب شدها لحضنة بيحاول يمص عصبيتها علشان خاطري اهدي علشان اللي في بطنك معمليش كده ..

ملك : وده كل اللي انت خايف عليه اللي في بطني وبس..

مهيب بتعب : خلاص بقي يا ملك ابوس ايدك كفايا حقك عليا انا آسف ممكن تهدي بقي ....

ملك خدت نفسها وهو شدها لحضنة وبدأ يبوسها من رقبتها بهدوء بس اتصدم لما بعدت عنه وقالته انها تعبانه و عايزة تنام

سابها وخرج يلم السفرة هو مضايق ومخنوق مهما يعمل مش عارف يراضيها ..

بااااااااااااااااك**

زياد بيهز مهيب : خالو مش بتاكل ليه دي مكرونه تجنن أنا و طنط حنين خلصناها كلها ..

مهيب ابتسم : شبعت يا زياد خلص اكل وحصلني علشان تنام في حضني ..

دخل الاوضة وفتح موبيلة لقي رسايل كتير من ملك رد عليها ..

ملك بزعل : كدا بردو يا مهيب بقالي يومين معرفش حاجة عنك كنت هتجنن عليك..

مهيب بجمود : معلش ما انتي عارفه كنت في فرح ومعرفتش افتح الموبيل ..

ملك : خلاص اهم حاجة اني اطمنت عليك انت واحشتني اووي.

مهيب: وانتي كمان ..عملتي ايه مع شريف ..المحامي قالك ايه ؟

ملك : شريف جه هنا وكان زي النار اللي عايزا تأكل اي حد ..بس المحامي طمني وقالي كل حاحة هتخلص بسرعه..

مهيب ابتسم : كويس اوي ..صحيح بنتك عامله ايه..

ملك بإبتسامة : قصدك بنتنا ؟؟

مهيب :............

نكمل الحلقة الحاااية علشان نعرف رد فعل مهيب وياترا دة هيغير كل تخطيطة للانتقام