TULALA SI ATHENA habang lulan ng elevataor paakyat ng penthouse ni Jeric. Kababalik niya lang galing Costa Fuego. Alas sais pa lamang ng gabi pero pakiramdam niya ay ilang araw na siyang hindi natutulog dala ng sobrang pagod.
Para na siyang lumulutang sa ere. She was drained emotionally, physically, mentally…
Nakausap niya ang doctor sa provincial hospital na pinagdalhan ng ama niya. Ayon dito ay sobrang liit na lamang ang tsansa na maka-survive pa si Don Alvaro dahil sa patong-patong na komplikasyon. Sa katunayan, isang milagro na nga lamang daw na buhay pa ito ngayon. Pinayuhan siya nito na i-uwi na lamang sa bahay ang ama dahil wala na rin namang magagawa pa ang doktor.
Ngunit ayaw itong sukuan ni Athena. Hindi siya susuko hangga’t alam niyang nagawa na niya ang lahat ng paraan.
