Nagkamalay na akong muli. Ganoon pa man ay tanging kadiliman lamang ang aking nakikita. Pakiramdam ko ay may takip ang aking mga mata. Tinangka ko ring magsalita ngunit tanging impit na pagsigaw lamang ang aking naririnig mula sa sarili ko. May busal din ang aking bibig. Sinubukan kong kumilos ngunit nakatali ang aking magkabilang kamay at ang aking mga paa.
“Gising na boss. Naandito kami ngayon sa bahay nina Guzman. Hindi naman namin alam kung saan dadalhin ito, eh. Dapat ba ay sa bahay niyo na ito idiniretso?”
Nakarinig ako ng isang boses ng lalaki. Agad akong kinilabutan at natakot. Akala ko ay iyong mga tauhan ni Silas ang aking sinamahan. Nagkamali ba ako?
“Hindi ka na pupunta rito, boss? Anong gagawin namin sa kanya?” Muli kong narinig na sabi ng isang lalaki. Bukod sa ilang tawa
