NAKARATING NAMAN KAMI AGAD SA BAHAY. Medyo natawa pa nga ako kasi pagkababa namin sa sasakyan ay agad naming narinig si Tatay na kumakanta ng My Way sa videoke.
At mula sa gate ay natanaw namin ang ilan sa mga kapitbahay namin na kaibigan ni Tatay na nakaupo at nakapalibot sa iisang mesa habang nag-iinuman. Naagaw naman namin ang atensiyon nila nang pumasok na kami.
“Anak!” masayang saad ni Tatay, agad naman akong nagmano sa kanya.
“Tay,” bati ko rin.
“Tito,” halos sabay pa na saad nina Leon at Joy tapos ay nagmano rin kay Tatay.
“Pasok na kayo sa loob, nandoon ang Tita at Nanay niyo. May pancit at shanghai, nagluto rin ng ulam ang Tita niyo para kung sakali na gusto niyong kumain ng kanin,” mahabang saad pa niya.
Tumango na lang ako at sinunod namin ang sinabi niya. Nagtataka ako ku
