MASAYA SI EUNA dahil unti-unting nababalik ang pagkakaibigan nila ni Ivo. Kabisado na rin nya ang ugali ng binata kapag ito ay wala sa mood na makipag-usap sa lahat. Alam nya kung kailan sya dapat magsalita o hindi.
Paminsan-minsan pa rin na sumasakit ang ulo nito pero nandoon naman sya palagi sa tabi nito. Hindi pa rin sya bumabalik sa pagiging private nurse nito. Tumutulong din sya sa paghahanap ngunit si Ivo mismo ang may ayaw.
"Ayaw ko sa kanya. Masyadong madaldal," ani Ivo habang umiinom sila ng tsaa sa hardin.
"Pero kahit naman ganoon si Cheska, mabait at mapagkakatiwalaan iyon."
Kaibigan nya si Cheska noong college at kahit hindi sila masyadong close nito, alam nyang may magandang record ito. Masipag at maaasahan talagang nurse.
"How did you know?" kunot ang noong tanong nito.
