***
Halos tulala si Avah na nasa malalim pa ring pag-iisip dahil sa dalang cardigan. Makailang ulit nga siyang napahinto sa paglalakad patungo sa supermarket para paulit-ulit itong kilatisin. Napapailing pa rin siya habang 'di makapaniwala. Isang malaking palaisipan para sa kaniya ang pagsulpot ng makikinang na bato rito sa cardigan.
Hindi pa rin niya lubos maisip ang nangyayari.
Paanong biglang may tutubong mga bato rito, na para ba itong na-magic ng kung ano?
"Magic?" usal niya sa sarili. "Imposible..."
Mayamaya pa, napatingala na si Avah nang makarating sa malaking supermarket na sadya. Medyo maraming mamimili ngayon, palibhasa weekend. Kumuha siya ng may katamtamang laki ng pushcart at nagsimula sa paglilibot. Sumalubong sa kaniya ang magiliw na musika na maririnig sa mga speaker,
