Bernadette's Pov:
Malinis ang paligid ng eskwelahan nang dumating kami, wala akong makitang kahit isang estudyanteng pakalat-kalat. Iilang beses pa akong lumingon pero walang bakas ng kahit sino. Halos mamilipit na din ang leeg ng mga babaeng kasama ko kakatingin sa paligid.
"Nasaan ang mga estudyante dito?" Nakakunot-noong tanong ni Alyssa. Katulad ko ay sinusuyod din n'ya ang paligid at bakas ng pagtataka sa kanyang mukha.
Kibit-balikat lamang ang naging sagot nina Fern.
"Bernadette!"
Kumakaway si Venice habang patakbong lumapit sa amin. Saglit na pinasadahan pa n'ya ng tingin ang mga kasama ko bago ako hinarap. "Saan ka ba nanggaling? Kanina ka pa namin hinahanap! Ang dami mong na-miss na mga kaganapan!"
Saglit na napasulyap ako sa mga kasama ko bago nag-aalangang sinagot s'ya.
