Nanginginig ang mga binti ko habang pabalik-pabalik na naglalakad dito sa loob ng kuwarto. Hindi ko rin mapigilan ang pagkagat sa kuko ng thumb ko sa sobrang kaba at pag-aalala para sa tatay ko.
Ngayon na ang araw na nakatakdang makipagkita si Daddy kay Ricky Diaz. Ni hindi pa rin malinaw sa akin ang plano ni Mykolas tungkol doon. Pero kung ano man 'yon, sana ay hindi mabulilyaso. Wala sanang maging problema, at hindi sana mapahamak ang daddy ko.
Ilang araw na rin ang lumipas nang malaman ko ang tungkol kay Ricky Diaz at doon sa babaeng akala niya ay ako. Hindi na ulit namin iyon napag-usapan ni Mykolas dahil iniiba na lang niya ang usapan kapag binubuksan ko ang tungkol doon. Ang lagi na lang niyang sinasabi ay huwag akong lumabas ng apartment o huwag pumunta sa kung saan-saan hangga't
